អ្នកបម្រើការលើជើងហោះហើរ Delta វាយក្បាលអ្នកដំណើរ ២ដបស្រា ព្រោះតែ...

2017-07-09 08:35:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ហេតុការណ៍កើតឡើង ក្រោយហោះហើរបាន ១ម៉ោង
អ្នកដំណើរព្យាយាមបើកទ្វារអាសន្ន ពេលកំពុងនៅលើអាកាស
ប្រឈមការជាប់ពន្ធនាគារ ២០ឆ្នាំ និងពិន័យជាប្រាក់ ២៥ម៉ឺនដុល្លារ

អ្នកដំណើរម្នាក់ ត្រូវអ្នកបម្រើការលើជើងហោះហើររបស់ក្រុមហ៊ុនអាកាសចរណ៍ Delta វាយក្បាលពីរដបស្រា ដើម្បីបញ្ចប់ស្ថានការណ៍ដ៏វឹកវរ បន្ទាប់ពីរូបគេព្យាយាមបើកទ្វារអាសន្ន ហើយប្រតាយប្រតប់គ្នាជាមួយអ្នកបម្រើការលើយន្តហោះ ព្រមទាំងអ្នកដំណើរផ្សេងទៀត។

បើតាមអ្នកនាំពាក្យ FBI ឈ្មោះ Ayn Dietrich-Williams បានបញ្ជាក់ថា អ្នកដំណើរវ័យ ២៣ឆ្នាំឈ្មោះ Joseph Daniel Hudek IV បានព្យាយាមបើកទ្វារអាសន្ន ទើបនាំឲ្យមានការប្រតាយប្រតប់ជាមួយអ្នកបម្រើការ និងអ្នកដំណើរផ្សេងទៀត មុនពេលត្រូវអ្នកបម្រើការលើយន្តហោះ វាយដោយដបស្រា២។ បន្ទាប់ពីត្រលប់ក្រោយដល់ព្រលាន Seattle-Tacoma International Airport វិញ អ្នកដំណើរនោះត្រូវឃាត់ខ្លួនភ្លាមៗ។

ការទង្គិចគ្នារវាងអ្នកដំណើរ និងអ្នកបម្រើការលើយន្តហោះនេះ កើតឡើងជិតកន្លែងបញ្ជាការហោះហើរ នៃជើងហោះហើរ 129 របស់ក្រុមហ៊ុនអាកាសចរណ៍ Delta។ ជើងហោះហើរនេះ កំពុងដឹកអ្នកដំណើរ ២១០នាក់ និងក្រុមការងារលើយន្តហោះ ១១នាក់ ឆ្ពោះទៅក្រុងប៉េកាំង ប្រទេសចិន។ ចំណែកហេតុការណ៍ចម្រូងចម្រាស់ កើតឡើងប្រមាណ ១ម៉ោងក្រោយពេលហោះហើរ នៅត្រង់ចំណុចឆ្នេរភាគខាងលិចប្រទេសកាណាដា។

តាមរបាយការណ៍ដែលចេញកាលពីថ្ងៃសុក្របានឲ្យដឹងថា Hudek បានហៅស្រាបៀមួយកំប៉ុង មុនពេលយន្តហោះចាប់ផ្ដើមហោះហើរ ហើយគ្មានសញ្ញាណាបង្ហាញថារូបគេស្រវឹងឡើយ។ ប្រហែលមួយម៉ោងក្រោយមក អ្នកដំណើររូបនេះ បានដើរទៅបន្ទប់ទឹក និងត្រលប់មកវិញសួរអ្នកបម្រើការប៉ុន្មានសំនួរ រួចត្រលប់ទៅបន្ទប់ទឹកវិញម្ដងទៀត ក្នុងរយៈពេលប្រហែល ២នាទី។

ពេលត្រលប់មកវិញលើកទី២ Hudek បានតម្រង់ទៅទ្វារអាសន្ន រួចទាញគន្លឹះដើម្បីបើកនៅផ្នែកខាងស្ដាំនៃយន្តហោះ។ ភ្លាមនោះ អ្នកបម្រើការ ២នាក់ បានព្យាយាមហាមឃាត់ Hudek តែត្រូវគេច្រានចេញមកវិញ។ អ្នកបម្រើការ ក៏បានប្រាប់ទៅផ្នែកបញ្ជាការហោះហើរ ឲ្យហៅក្រុមការងារផ្សេងទៀតមកជួយបន្ទាន់ ដើម្បីបញ្ចៀសគ្រោះថ្នាក់។

ដោយសារក្រុមអ្នកបម្រើការលើយន្តហោះទប់ទល់មិនឈ្នះ អ្នកដំណើរលើនោះក៏បានព្យាយាមជួយឃាត់។ Hudek បានវាយអ្នកបម្រើការម្នាក់លើយន្តហោះ ចំមុខ ២ដង និងវាយអ្នកដំណើរម្នាក់ទៀតមួយដបស្រា ព្រមទាំងវាយដោយដៃជាច្រើនដងទៀត។ ក្រោយមក អ្នកបម្រើការម្នាក់ ក៏បានទាញដបស្រា២ មកវាយ Hudek ហើយដបមួយក្នុងចំណោមនោះ បានបែកស្រោចលើក្បាល Hudek។ អ្នកដំណើរនេះ ហាក់មិនថមថយកម្លាំងឡើយ ថែមទាំងសួរថា "ស្គាល់ខ្ញុំជាអ្នកណាអត់?” ទៀតផង។ បន្ទាប់ពីអ្នកដំណើរផ្សេងទៀតជាច្រើននាក់ បាននាំគ្នាជួយ ទើបចាប់ Hudek បានសម្រេច និងចងជាប់ រហូតចុះចតដោយសុវត្ថិភាព។

ក្នុងហេតុការណ៍នោះ មានអ្នករបួស ៣នាក់ គឺ Hudek, អ្នកបម្រើការលើយន្តហោះ និងអ្នកដំណើរម្នាក់ទៀត។ យន្តហោះបានហោះហើរម្ដងទៀត នៅរយៈពេល ៥ម៉ោងក្រោយ ចំណែក Hudek ត្រូវឃាត់ខ្លួនដើម្បីចាត់ការតាមច្បាប់ ហើយជាប់ចោទពីបទជ្រៀតជ្រែកការងាររបស់អ្នកបម្រើការលើយន្តហោះ។ សាលក្រមនឹងប្រកាសនៅសប្ដាហ៍ក្រោយនេះ ដែល Hudek ប្រឈមការជាប់ពន្ធនាគារ ២០ឆ្នាំ និងពិន័យជាប្រាក់ ២៥ម៉ឺនដុល្លារ៕

ចុចអានអត្ថបទ៖

ប្រភព៖ CNN ប្រែសម្រួល៖ គង់ វិសាល