ទៀតហើយ! អគ្គិភ័យឆាបឆេះផ្សារមួយកន្លែង យ៉ាងសន្ធោសន្ធៅ ក្នុងទីក្រុងឡុងដ៍

2017-07-10 00:52:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រើរថយន្តពន្លត់អគ្គិភ័យ ៦ គ្រឿង និងអ្នកពន្លត់អគ្គិភ័យ ៦០ នាក់
ធ្លាប់ត្រូវអគ្គិភ័យឆាបឆេះម្ដងរួចមកហើយ កាលពីឆ្នាំ ២០០៨
ប្រជាពលរដ្ឋរស់នៅក្បែរកន្លែងកើតហេតុ ត្រូវបានគេជម្លៀសចេញពីផ្ទះ

យ៉ាងហោចណាស់មានរថយន្តពន្លត់អគ្គិភ័យ ចំនួន ៦ គ្រឿង និងអ្នកពន្លត់អគ្គិភ័យ ៦០ នាក់ បានប្រឈមមុខជាមួយនឹង អណ្តាតភ្លើងយ៉ាងសន្ធោសន្ធៅ ដែលបានឆាបឆេះចេញពីផ្សារមួយកន្លែង មានឈ្មោះថា Camden Lock Market។

អង្គភាពពន្លត់អគ្គិភ័យ London Fire Brigade ត្រូវបានគេហៅ បន្ទាប់ពីមានអ្នកដំណើរសម្គាល់ឃើញថា ខាងក្នុងផ្សារមានភ្លើងឆាបឆេះ។ ទោះបីជាយ៉ាងណា គេមិនទាន់អាចកំណត់ចំនួនអ្នករងគ្រោះ នៅក្នុងហេតុការណ៍ខាងលើនេះបានឡើយ។

អ្នកនាំពាក្យម្នាក់ បាននិយាយថា «យើងត្រូវបានគេរាយការណ៍ពីករណីអគ្គិភ័យនៅម៉ោង ១២ និង ១០ នាទីរំលងអធ្រាត្រ (ត្រូវនឹងម៉ោង ៦ និង ១០ នាទីនៅកម្ពុជា) ថ្ងៃច័ន្ទ នៅផ្សារ Camden Lock Market»។

គួររំលឹកឲ្យដឹងថា តំបន់ខាងលើធ្លាប់ត្រូវបានអគ្គិភ័យឆាបឆេះយ៉ាងសន្ធោសន្ធៅម្ដងរួចមកហើយ កាលពីឆ្នាំ ២០០៨ ដោយបង្កឲ្យមានការបិទទ្វារជាច្រើនខែទៀតផង។ ផ្សារខាងលើនោះមានហាង និងតូប ជាង ១ ០០០ ដោយទាក់ទាញអ្នកទេសចររាប់ពាន់នាក់ក្នុងមួយសប្ដាហ៍។

យ៉ាងណាមិញ អង្គភាព London Fire Brigade បានឲ្យដឹងថា អគ្គិភ័យបានស្ថិតក្រោមការគ្រប់គ្រង ខណៈមិនមានរបាយការណ៍ពីអ្នកស្លាប់ និងរបួសឡើយ។ ចំណែកឯប្រជាពលរដ្ឋដែលរស់នៅក្បែរកន្លែងកើតហេតុ ត្រូវបានគេជម្លៀសចេញពីផ្ទះ ដោយគ្មាននរណាម្នាក់រងរបួសនោះទេ៕