ឃើញស្រ្តីចំណាស់ដើរឆ្លងផ្លូវដែក លោតចុះពីលើរថភ្លើងទៅជួយ ចុងក្រោយ ជួបរឿងអកុសលខ្លួនឯង

2017-07-10 02:32:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសនោះប្រថុយជីវិតរបស់ខ្លួន ជួយសង្គ្រោះស្រ្តីវ័យចំណាស់ម្នាក់
បុរសនោះបានទាញហ្វ្រាំងភ្លាមៗ ហើយបន្លឺសំឡេងស៊ីផ្លេឡើង
បុរសនោះបានលោតចុះពីលើរថភ្លើង

អ្នកមើលការខុសត្រូវលើរថភ្លើងម្នាក់ បានប្រថុយជីវិតរបស់ខ្លួន ជួយសង្គ្រោះស្រ្តីវ័យចំណាស់ម្នាក់ ប៉ុន្តែសំណាងអាក្រក់ បែរជួបរឿងដ៏អកុសលខ្លួនឯងទៅវិញ។

ហេតុការណ៍នោះបានកើតឡើងនៅពេលដែល លោក Xu Qiankai អាយុ ២៩ ឆ្នាំ កំពុងធ្វើដំណើរតាមរថភ្លើងមួយគ្រឿង នៅជាយក្រុង Chongqing ប្រទេសចិន កាលពីរសៀលថ្ងៃព្រហស្បតិ៍សប្តាហ៍មុន ហើយលោកក៏បានប្រទះឃើញ ស្រ្តីវ័យចំណាស់ម្នាក់បម្រុងនឹងឆ្លងផ្លូវរថភ្លើង។

លោក Xu បានទាញហ្វ្រាំងភ្លាមៗ ហើយបន្លឺសំឡេងស៊ីផ្លេឡើង ប៉ុន្តែស្រ្តីចំណាស់នោះ មិនបានរត់ចេញឡើយ (ដោយសារមានជំងឺថ្លង់) ហើយបែរជាឈរស្ងៀមនៅលើផ្លូវរថភ្លើងទៅវិញ។ មួយរំពេចក្រោយមក លោក Xu បានលោតចុះពីលើរថភ្លើង និងរត់សំដៅស្រ្តីនោះ ដោយរថភ្លើងនៅតែបន្តធ្វើដំណើរពីក្រោយលោក។

រយៈពេលមិនដល់ ១០ វិនាទីផង អ្វីៗក៏បានបញ្ចប់ទៅ ខណៈលោក Xu ពិតជាអាចជួយស្រ្តីចំណាស់នោះបានទាន់ពេលវេលាមែន ប៉ុន្តែលោកធ្វើមិនបានលឿនគ្រប់គ្រាន់ ដើម្បីជួយខ្លួនឯងឡើយ។ លោក Xu ត្រូវរថភ្លើងកិនចំជើងខាងស្តាំ។

ក្រោយពេលកើតហេតុ លោក Xu ត្រូវបានគេបញ្ជូនទៅកាន់មន្ទីរពេទ្យ ហើយក្រុមគ្រូពេទ្យត្រូវបង្ខំចិត្ត កាត់ជើងខាងស្តាំត្រឹមជង្គង់ របស់លោក Xu ចេញ។

«ទោះបីជាខ្ញុំបានបាត់បង់ជើងម្ខាងក្តី ប៉ុន្តែខ្ញុំបានជួយជីវិតមនុស្សម្នាក់។ ប្រសិនបើខ្ញុំត្រូវធ្វើវាម្តងទៀត ខ្ញុំនឹងធ្វើបែបនេះទៀត»។ នេះបើតាមសម្តី លោក Xu បាននិយាយប្រាប់ទៅកាន់សារព័ត៌មានមួយ ខណៈកំពុងដេកនៅលើគ្រែមន្ទីរពេទ្យ។