ជីវិតកសិករពិការ ផ្ញើវាសនាលើចម្ការឈូកបឹងអូតុំ
- 2017-07-10 08:23:41
- ចំនួនមតិ 0 | ចំនួនចែករំលែក 0
ជីវិតកសិករពិការ ផ្ញើវាសនាលើចម្ការឈូកបឹងអូតុំ
ចន្លោះមិនឃើញ
កសិករពិការជើង ជា សៅ បានចាប់យកមុខរបរដាំឈូកក្នុងបឹងអូតុំ ដើម្បីបន្តក្តីសង្ឃឹមរបស់ខ្ខួនក្នុងការរកស៊ីចិញ្ចឹមភរិយា និងកូនពីរនាក់ បន្ទាប់ពីលោកមិនជោគជយ័ ក្នុងការតស៊ូលើរបរចិញ្ចឹមគោអស់ជាច្រើនឆ្នាំ។
ក្នុងទឹកមុខស្រស់ស្រាយលោក សៅ ប្រាប់ Sabay ថា បន្ទាប់ពីលោកចាប់ផ្តើមចិញ្ចឹមគោមិនសូវបាន ផល រយៈពេលច្រើនឆ្នាំមក លោកក៏សម្លឹងឃើញវាលដីល្បាប់ក្នងបឹងអូតុំនេះនៅទំនេរ ហើយលោកក៏បានទិញឈូកមកដាំ លើផ្ទៃដីជាង ១ ហិកតា។ បើគិតមកទល់ពេលនេះ លោកដាំបានពីរឆ្នាំហើយ បើទោះបីជាមុខរបរនេះ មិនផ្តល់ប្រាក់កម្រៃអ្វីធំដុំក៏ដោយ។
ទោះបីជាយ៉ាងណា លោកសម្ដែងការសប្បាយចិត្ត ដោយជាមធ្យមលោកអាចរកចំណូលបានពី ៦ ទៅ ៧ ម៉ឺនរៀលក្នុង១ថ្ងៃ ពីការលក់ផ្លែឈូក និងបន្លែផ្សេងៗទៀត ល្មមនឹងអាចផ្គត់ផ្គង់ការចំណាយផ្សេងៗ នៅក្នុងគ្រួសារបន្ថែមលើមុខរបរធ្វើស្រែ។
កសិករវ័យ ៣៥ ឆ្នាំរស់នៅភូមិស្វាយអំពារ ឃុំស្រង៉ែ ស្រុកទ្រាំង ខេត្តតាកែវបន្តថា៖ ”ចាប់ពីរសៀលម៉ោង១ទៅ ខ្ញុំត្រូវស្ថិតនៅជាប់ជាមួយចម្ការឈូក ដើម្បីបេះឈូក និងដកក្រអៅឈូក ព្រមទាំងមើលថែទាំការពារ កុំអោយមានគោ ឬសត្វផ្សេងៗមកយាយី។ នៅព្រឹកបន្ទាប់ព្រហ៊ាមស្រាងៗ ត្រូវរៀបចំឥវ៉ាន់ដាក់លើម៉ូតូ យកទៅបោះឱ្យម៉ូយនៅផ្សារតាកែវ ដែលម៉ូយខ្លះមកតាំងពីផ្សារល្វេ ខាងត្បូងព្រៃសណ្តែកឯណោះ។”
កសិករដដែលបានបន្តថា ក្រៅពីលក់ឈូក លោកនៅមានដីដាំព្រលិតដែលក្នង ១ថ្ងៃ អាចដកបាន ១៥០ ដុំ(១ដុំថ្លៃ ៣៥០៛) និងកញ្ឆែត ៣០ ដុំ (១ដុំថ្លៃ៧០០៛)។
“ឈូកឆ្នាំនេះមិនជាធ្លាក់តម្លៃអីទេ តែសំខាន់គឺវាមិនសូវផ្លែតែម្តង។ អ្នកទិញមិនខ្វះទេ ព្រោះខ្ញុំលក់តែ ផ្លែខ្ចី តែវាមិនសូវផ្លែដូចឆ្នាំទៅមិញ”។ លោក សៅ និយាយ៕