​កំពូល​ខ្សែ​ប្រយុទ្ធ All Stars ​កម្ពុជា ​២​រូប និយាយ​អ្វី​ខ្លះចំពោះ​ការ​ប៉ះ SCG Muangthong លើកទី២

  • 2017-07-13 02:56:06
  • ចំនួនមតិ

ចន្លោះមិនឃើញ

ការ​ប្រកួត​រវាង​ក្រុម Cambodian All Stars ​និង SCG Muangthong United ​កាន់​តែ​កៀក​មែន​ទែន​ហើយ ​ពោល​គឺ​នៅ​សល់​តែ​៣​ថ្ងៃ​ទៀត​ប៉ុណ្ណោះ។ ខណៈ​ដែល​សំបុត្រ​ចូល​មើល​ការ​ប្រកួត​ក៏​មាន​លក់​នៅ​មុខ​ពហុ​កីឡដ្ឋាន​ជាតិ​ផង​ដែរ។

ទន្ទឹម​នឹង​ការ​ប្រកួត​ជិត​ចូល​ដល់​យ៉ាង​នេះ សូម​ប្រិយមិត្ត​មក​អាន​មតិ​របស់​ខ្សែ​ប្រយុទ្ធ​ក្រុម All Stars ២​រូប ​ចំពោះ​ការ​ប្រកួត​ជាមួយ​ក្រុម SCG Muangthong ​ជា​លើក​ទី​២​នេះ៖

១ កែវ សុខផេង

សុខផេង ​ជា​ខ្សែ​ប្រយុទ្ធ​សំខាន់​ម្នាក់​សម្រាប់​ក្រុម Cambodian All Stars។ កីឡាករ​ដើម​កំណើត​នៅ​ខេត្ត​ក្រចេះ​រូប​នេះ ​បាន​និយាយ​ថា​ SCG Muangthong ​ឆ្នាំ​នេះ​កាន់​តែ​កើន​សមត្ថភាព​ជាង​ឆ្នាំ​មុន ព្រោះ​ពួកគេ​បាន​លេង​ជាមួយ​ក្រុម​ខ្លាំង​ៗ​ជា​ច្រើន។ យ៉ាងណាមិញ ​ទោះ​ជា​ឆ្នាំ​នេះ​ក្រុម​ជើង​ឯក​ថៃ​ខ្លាំង​យ៉ាង​ណា​ក៏​​ដោយ ក៏​សុខផេង​និង​មិត្ត​រួម​ក្រុម​ដទៃ​ទៀត ​ប្រឹងប្រែង​ដើម្បី​ឱ្យ​ការ​ប្រកួត​នៅ​ថ្ងៃ​ទី​១៦​ខាង​មុខ​នេះ ​កាន់​តែ​ជក់​ចិត្ត​សម្រាប់​អ្នក​គាំទ្រ។

២ Booysen Shane

កីឡាករ​ដើម​កំណើត​អាហ្វ្រិក​ខាង​ត្បូង ​និង​ចូល​លេង​ឱ្យ​ក្លឹប​ភ្នំពេញ​ក្រោន​រូប​នេះ ​គិត​មិន​ខុស​ពី​ កែវ សុខផេង ​នោះ​ទេ។ Booysen ​គិត​ថា​ SCG Muangthong ​ឆ្នាំ​នេះ​ខ្លាំង ​ពួកគេ​មាន​ការ​ប្រមូល​ផ្ដុំ​ល្អ ​និង​មាន​គោលដៅ​ច្បាស់​លាស់។ ការ​មក​កម្ពុជា​លើក​នេះ ​គឺ​ពួកគេ​មក​ដោយ​កម្លាំង​ចិត្ត​ចង់​ឈ្នះ ដូច្នេះ​ប្រកួត​ថ្ងៃ​១៦​ពិត​ជា​ការ​ប្រកួត​មួយ​ដែល​ពិបាក។ ទោះ​ជា​យ៉ាង​នេះ​ក្ដី កីឡាករ​រូប​នេះ​សន្យា​ថា​នឹង​ធ្វើ​ឱ្យ​ការ​ប្រកួត​ធំ​ប្រចាំ​ឆ្នាំ​នេះ ​កាន់​តែ​ល្អ​មើល​សម្រាប់​អ្នក​គាំទ្រ​គ្រប់​គ្នា។

ការ​ប្រកួត​នៅ​ថ្ងៃ​ទី​១៦​ខាង​មុខ​វេលា​ម៉ោង​៦:០០​នាទី​ល្ងាច​នោះ គឺ​ជា​ការ​ប៉ះ​គ្នា​លើក​ទី​២​សម្រាប់​ក្រុម​ទាំង​ពីរ។ ខណៈ​ដែល​ប្រាក់​បាន​ពី​ការ​ប្រកួត​ទាំង​អស់ គឺ​ SCG Muangthong United ​នឹង​ផ្ដល់​ជូន​ខាង​កម្ពុជា ដើម្បី​ជួយ​អភិវឌ្ឍ​វិស័យ​បាល់ទាត់​យុវជន​ទូទាំង​ប្រទេស​កម្ពុជា៕

ចុចអានអត្ថបទបន្ដ៖

អ្នក​គាំទ្រ​កម្ពុជា ​យល់​យ៉ាង​ណា​ចំពោះ​ការ​មក​សង​សឹក​របស់ SCG Muangthong លើ All Stars

កាន់​តែ​ច្បាស់​រឿង​លក់​​សំបុត្រ​ Cam- All Star ប៉ះ​​ SCG Muangthong United

ប្រុស​ស្អាត Charyl Chappius ​និយាយ​អ្វី​ខ្លះ​មុន​ហោះ​មក​កម្ពុជា


អត្ថបទ៖ មុន្នីរម្យ