វ៉ែន សុផល៖ រំពឹងថាកីឡាករ ហ្វីលីក យកមេដាយមាសបាននៅស៊ីហ្គេម២០១៧នេះ

2017-07-14 03:06:03
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូប្រដាល់សកលជម្រើសជាតិកម្ពុជា វ៉ែន សុផល សង្ឃឹមខ្ពស់ថាហ្វីលីក មីលីនម៉ាលីន នឹងយកមេដាយមាសជូនកម្ពុជាបាននៅព្រឹត្តិការកីឡាស៊ីហ្គេមនាខែសីហា ខាងមុខនេះ។

កីឡាករ ហ្វីលីក

លោកគ្រូ វ៉ែន សុផល បានឲ្យដឹងថា សម្រាប់កីឡាករ ហ្វីលីក ម្នាក់នេះបើនិយាយពីសមត្ថភាពវិញគឺខ្លាំងដូចនិងកីឡាករ វ៉ែន រដ្ឋា អតីតអ្នកប្រដាល់សកលជម្រើសជាតិកម្ពុជា ដែលឈ្នះបានមេដាយប្រាក់ពេលស៊ីហ្គេម នៅសិង្ហបុរីអញ្ចឹង។ ដោយគ្រាន់តែពួកគេទាំងពីរប្រកួតក្នុងប្រភេទទម្ងន់ផ្សេងគ្នា វ៉ែន រដ្ឋា វ៉ៃក្នុងទម្ងន់ ៦៤គីឡូក្រាម ខណៈ ហ្វីលីក វ៉ៃក្នុងទម្ងន់ ៨១គីឡូក្រាម។

គ្រូជម្រើសជាតិរូបនេះបន្តថា លោកពិតជាសង្ឃឹមខ្លាំងលើកីឡាករសញ្ជាតិដើមគុយបាម្នាក់នេះ ព្រោះបើមើលពីការខំប្រឹងហ្វឹកហាត់រាល់ថ្ងៃគឺល្អខ្លាំងណាស់។ បើនិយាយពីបច្ចេកទេសវ៉ៃវិញកីឡាករខាងលើនេះ ឈ្លាសវៃមិនចេះតែវ៉ៃនោះទេ ហើយបើវ៉ៃវិញគឺវ៉ៃមិនដកដៃ ចំពោះការចូលការចេញ និងឆាបវិញដើម្បីវ៉ៃបានល្អណាស់ កម្លាំងដៃក៏ធ្ងន់ថែមទៀត។ ដោយនៅកម្ពុជាមិនសូវមានកីឡាករទម្ងន់ធ្ងន់ អញ្ចឹងហើយវាពិបាករកដៃគូហាត់សមឲ្យគេ ប្រសិនមានដៃគូហាត់សមខ្លាំងទៀតនោះ កីឡាករជម្រើសជាតិកម្ពុជាម្នាក់នេះនឹងរឹតតែខ្លាំងជាងនេះទៀត។

កីឡាករ ហ្វីលីក

បច្ចុប្បន្ននេះកីឡាករជម្រើសជាតិប្រដាល់សកលកម្ពុជាមាន៥រូបកំពុងហ្វឹកហាត់ត្រៀមចេញទៅស៊ីហ្គេមនាខែសីហា ឆ្នាំ២០១៧នៅប្រទេសម៉ាឡេស៊ី ក្នុងនោះមាន សាន តុលា ហង្ស រ៉ាម៉ន ណាត ស៊ីនិន ផល សោភ័ណ្ឌ និងកីឡាករ ហ្វីលីក មីលីនម៉ាលីន៕

អត្ថបទ៖ នួន ស៊ីណា