ប្រវត្តិត្រួសៗ និងសមិទ្ធផលផ្សេងៗរបស់លោក Chester Bennington

2017-07-21 04:46:46
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីព្រឹកថ្ងៃទី ២០ ថ្ងៃព្រហស្បតិ៍ ម៉ោង៩ព្រឹកនេះ មានព័ត៌មានដ៏គួរឲ្យតក់ស្លុតនិងគួរឲ្យសោកស្ដាយមួយដោយសារតែ តារាចម្រៀង Vocal ប្រចាំក្រុមចម្រៀង Linkin Park លោក Chester Benningtonបានធ្វើអត្តឃាតដោយចងកខ្លួនឯង ដោយសារតែមានវិបត្តិផ្លូវចិត្ត។

លោក Chester Bennington

ពេលនេះមកដឹងពីជីវប្រវត្តិនិងសមិទ្ធផលផ្សេងៗរបស់លោកទាំងអស់គ្នា៖

ជីវប្រវត្តិ

លោក Chester Charles Bennington កើតនៅថ្ងៃទី២០ខែមិនាឆ្នាំ ១៩៧៦ (អាយុ ៤១ ឆ្នាំ) នៅទីក្រុង Phoenix រដ្ឋ Arizona សហរដ្ឋអាមេរិកជាតារាចម្រៀងនិងអ្នកសរសេរបទចម្រៀងសញ្ជាតិអាមេរិក ដែលត្រូវបានគេស្គាល់ថាជាតារាចម្រៀងសម្រាប់ក្រុមចម្រៀងចង្វាក់ Rock គឺក្រុម Linkin Park។ Chester ក៏ធ្លាប់ជាអ្នកច្រៀងប្រចាំក្រុមចម្រៀង Dead by Sunrise និង Stone Temple Pilots ផងដែរ។

Chester មានប្រវត្តិគ្រួសារដ៏ជូរចត់ដោយសារតែឪពុកម្ដាយខ្លួនបានលែងលះគ្នា កាលពីរួបគេមានអាយុ១១ឆ្នាំ ហើយត្រូវមករស់ជាមួយឪពុក។

បន្ទាប់ពីការលែងលះនោះមក Chester បានចាប់ផ្ដើមប្រឡូកក្នុងការប្រើប្រាស់គ្រឿងញៀនដូចជា កញ្ឆា ស្រា និងថ្នាំញៀនផ្សេងៗដូចជា កូកាអ៊ីន អាភៀន LSD និង Methamphetamine ជាដើម។ ប៉ុន្តែក្រោយមកលោកក៏បានជម្នះការប្រើប្រាស់គ្រឿងញៀនទាំងអស់នោះ ដោយមកនៅជាមួយម្តាយវិញពេលមានអាយុ១៧ឆ្នាំ ហើយចាប់ផ្តើមធ្វើការនៅ Burger King។

Chester ចាប់ផ្តើមប្រឡូកក្នុងសិល្បៈក្នុងឆ្នាំ ១៩៩៣ ជាមួយនឹងក្រុមចម្រៀង "Sean Dowdell and His Friends?” ប៉ុន្ដែដោយសារតែមានបញ្ហាជាច្រើនសមាជិកក្រុមនោះក៏បានបែកបាក់គ្នាជាបន្តបន្ទាប់។ រហូតដល់ឆ្នាំ ១៩៩៨ លោក Chester មានឱកាសក្នុងការសាកសំឡេង (Audition) សម្រាប់ចូលជាសមាជិកក្រុមចម្រៀង Linkin Park។ បន្ទាប់ពីបានជោគជ័យ នៅថ្ងៃទី២៤ខែតុលាឆ្នាំ ២០០០ ក្រុមចម្រៀងនេះក៏ចេញអាល់ប៊ុមដំបូង "Hybrid Theory” របស់ពួកគេ។

Chester ក៏ជាសមាជិកក្រុមចម្រៀងមួយឈ្មោះថា "Dead by Sunrise” ដែលបានចាប់ផ្តើមសម្ដែងនៅខែឧសភាឆ្នាំ ២០០៨ ហើយបានបញ្ចេញអាល់ប៊ុម "Out of Ashes” កាលពីថ្ងៃទី១៣ខែតុលាឆ្នាំ ២០០៩។

នៅខែកុម្ភៈឆ្នាំ ២០១៣ អ្នកច្រៀងនាំមុខរបស់ក្រុមចម្រៀង Stone Temple Pilots លោក Scott Weiland ដែលជាមិត្តជិតស្និទ្ធរបស់ Chester បានស្លាប់ដោយសារធ្វើអត្តឃាតដែលធ្វើឲ្យមានការភ្ញាក់ផ្អើលជាខ្លាំង។ បន្ទាប់មក Chester ក៏ត្រូវបានគេជ្រើសរើសជាអ្នកចម្រៀងនាំមុខប្រចាំក្រុម Stone Temple Pilots នៅខែឧសភាឆ្នាំ ២០១៣ រហូតដល់ឆ្នាំ ២០១៥ លោកក៏ត្រលប់មកក្រុមចម្រៀង Linkin Park វិញ។

លោក Chester មានកូនបង្កើតទាំងអស់ចំនួន ៥នាក់ និងកូនចិញ្ចឹមម្នាក់។

Chester និងមិត្តជិតស្និទ្ធិតារាចម្រៀង Scott Weiland

សមិទ្ធផល

តារារូបនេះទទួលបានការគាំទ្រនិងពេញនិយមខ្លាំងក្នុងឋានៈជាអ្នកច្រៀង (Vocalist) ប្រចាំក្រុមចម្រៀង Linkin Park ពេលចេញអាល់ប៊ុមដំបូង "Hybrid Theory” នៅឆ្នាំ ២០០០។

ក្រោយពីនោះមកក្រុមចម្រៀង Linkin Park បានបញ្ចេញអាល់ប៊ុមជាបន្តបន្ទាប់ដូចជា Meteora ឆ្នាំ ២០០៣ Minutes to Midnight ឆ្នាំ ២០០៧ A Thousand Suns ឆ្នាំ ២០១០ Living Things ឆ្នាំ ២០១២ The Hunting Party ឆ្នាំ ២០១៤ និង One More Light ឆ្នាំ ២០១៧។

ក្រុមច្រៀងនេះលក់អាល់ប៊ុមចម្រៀងបានដល់ទៅ ៧០លានអាល់ប៊ុមឯណោះ ដែលធ្វើឲ្យពួកគេក្លាយជាក្រុមចម្រៀងដែលរកប្រាក់ចំណូលបានច្រើនបំផុតលំដាប់ថ្នាក់ទី៤០។

បទចម្រៀង២បទរបស់ Linkin Park គឺជាប់ជាបទចម្រៀងអមត (Timeless Song) នៅលើបណ្តាញស្តាប់ចម្រៀង Spotify ដែល "Numb” ជាប់ចំណាត់ថ្នាក់លេខ៣ និង "In The End” ចំណាត់ថ្នាក់លេខ៦។ មានតែក្រុមចម្រៀង Linkin Park តែប៉ុណ្ណោះដែលមានបទចម្រៀង២បទក្នុងតារាងនេះ។

ក្រុមចម្រៀង Linkin Park ក៏បានធ្វើតន្ត្រីទេសចរណ៍ទូទាំងពិភពលោកដល់ទៅ ១០លើក ហើយមានបន្ថែម២លើកទៀតដែលជាការចូលរួមតន្ត្រីទេសចរណ៍ជាមួយសំណាក់ក្រុមចម្រៀងល្បីៗ។