វេបសាយមានតម្លៃ ២៣ លានដុល្លារ លក់ដូរទំនិញខុសច្បាប់ត្រូវបានរឹបអូស
- 2017-07-23 05:44:11
- ចំនួនមតិ 0 | ចំនួនចែករំលែក 0
វេបសាយមានតម្លៃ ២៣ លានដុល្លារ លក់ដូរទំនិញខុសច្បាប់ត្រូវបានរឹបអូស
ចន្លោះមិនឃើញ
វេបសាយទិញ-លក់ផលិតផលខុសច្បាប់របស់ ឧក្រិដ្ឋជនអ៊ិនធឺណិតធំបំផុតមួយមានឈ្មោះថា AlphaBay ត្រូវបានបិទឈប់ដំណើរការ ដោយប្រតិបត្តិការអន្តរជាតិមួយក្រោមយុទ្ធនាការសហការណ៍គ្នារវាង Europol, FBI, DEA (Drug Enforcement Agency) និង Dutch National Police ។
មិនត្រឹមតែវេបសាយ AlphaBay តែមួយប៉ុណ្ណោះទេ ភ្នាក់ងារមានសមត្ថកិច្ចក៏បានរឹបអូសយក វេបសាយខុសច្បាប់មួយទៀតហៅថា HANSA (នេះបើតាម Europol បញ្ជាក់នៅក្នុងសន្និសិទ្ធសារព័ត៌មាននាពេលថ្មីៗនេះ)។
យោងទៅតាម Europol ប្រាប់ថា វេបសាយទាំងពីរនេះគឺ ទទួលខុសត្រូវក្នុងការធ្វើ ពាណិជ្ជកម្មទៅលើវត្ថុខុសច្បាប់ច្រើនជាង ៣៥០,០០០ គ្រឿងមានដូចជាគ្រឿងញៀន អាវុធ និងមេរោគកុំព្យូទ័រ។
កាលពីថ្ងៃទី ០៤ ខែកក្កដាកន្លងទៅ វេបសាយ AlphaBay ត្រូវបានបិទយ៉ាងលឿនដោយគ្មាន ការពន្យល់ពីអ្នកអភិបាលគ្រប់គ្រង(Admin) ដែលធ្វើឲ្យអតិថិជនមានការភ្ញាក់ផ្អើលជាខ្លាំង ក៏ប៉ុន្តែកាលពីសប្តាហ៍មុន វាត្រូវបានគេរាយការណ៍មកថា ការបិទវេបសាយទាំងនោះគឺដោយសារតែការឆ្មក់ចាប់ ដោយអាជ្ញាធរមានសមត្ថកិច្ចអន្តរជាតិ។
នៅក្នុងនោះក៏មានការចាប់ឃាត់ខ្លួនលោក Alexandre Cazes ជនជាតិកាណាដាអាយុ ២៦ឆ្នាំ ដែលត្រូវបានសង្ស័យថាជាប់ពាក់ព័ន្ធទៅនឹងវេបសាយ AlphaBay ហើយរង់ចាំការធ្វើបត្យាប័នទៅសហរដ្ឋអាមេរិក (តែត្រូវបានធ្វើអត្តឃាតខ្លួនឯងនៅក្នុងគុកនាថ្ងៃបន្ទាប់)។
បើតាមលោក Rob Wainwright ដែលជានាយកប្រតិបត្តិនៃ Europol បានឲ្យដឹងថា នេះគឺជាជោគជ័យដ៏ធំមួយរបស់អាជ្ញាធរនៅក្នុង Europe និង US។ ដោយសារកិច្ចសហការណ៍គ្នាក្នុងកម្រិតសាកលរបស់អាជ្ញាធរមានសមត្ថកិច្ច គឺប្រៀបបានទៅនឹងការផ្ញើរសារមួយថាយើងមាននូវយន្តការជាក់លាក់ក្នុងការកំណត់អត្តសញ្ញាណឧក្រិដ្ឋជន ទោះបីជានៅក្នុង Dark Web ក៏ដោយ។
អាជ្ញាធរបានបញ្ចេញព័ត៌មានឲ្យដឹងថា ខ្លួនបានធ្វើការគ្រប់គ្រងដោយសំងាត់ទៅលើវេបសាយ Hansa market កាលពីថ្ងៃទី ២០ ខែមិថុនា ឆ្នាំ២០១៧ ហើយរក្សាឲ្យវាដំណើរការយ៉ាងហោចណាស់អស់រយៈពេលប្រមាណជា ១ ខែ នៅក្នុងកិច្ចប្រឹងប្រែងរបស់ខ្លួនដើម្បីត្រួតពិនិត្យសកម្មភាពរបស់អ្នកទិញ-លក់ ដោយមិនឲ្យពួកគេដឹងខ្លួនឡើយ។ ហើយនៅក្នុងកំឡុងពេលជាមួយគ្នានេះ អាជ្ញាធរបានបិទវេបសាយ AlphaBay ដែលបង្ខំឲ្យអ្នកប្រើប្រាស់ចូលទៅវេបសាយ Hansa ដើម្បីធ្វើពាណិជ្ជកម្ម។
លោក Cazes បានធ្វើកំហុសឆ្គងមួយដែលឧក្រិដ្ឋជនភាគច្រើនធ្វើដែលអាចបង្ហាញនូវអត្តសញ្ញាណរបស់ខ្លួន ហើយឈានទៅដល់ការចាប់ឃាត់ខ្លួន។ គាត់បានប្រើប្រាស់អ៊ីម៉ែលផ្ទាល់ខ្លួនគឺ (Pimp_Alex_91@hotmail.com) ដើម្បីធ្វើការផ្ញើរចេញនូវ welcome & support emails ទៅកាន់សមាជិកទាំងអស់នៃវេបសាយ AlphaBay ។
អាជ្ញាធរបានដឹងថា អាស័យដ្ឋានអ៊ីម៉ែលនោះគឺជាកម្មសិទ្ធរបស់បុរសជនជាតិកាណាដាមានឈ្មោះថា Alexandre Cazes ដែលកើតថ្ងៃទី ១៩ ខែតុលា ឆ្នាំ១៩៩១ ហើយគឺធ្វើការជានាយកក្រុមហ៊ុនមួយឈ្មោះថា EBX Technologies។
រំឮកដែរថា បន្ទាប់ពីការបិទវេបសាយ Silk Road មកវេបសាយ AlphaBay ត្រូវបានបង្ហាញខ្លួនក្នុងឆ្នាំ ២០១៤ ហើយបានក្លាយទៅជាទីតាំងធំជាងគេមួយនៅក្នុង dark web សម្រាប់ការទិញ-លក់ផលិតផលខុសច្បាប់ មានដូចជា ថ្នាំញៀន លេខគណនី ឥណទានធនាគារដែលលួចបានមេរោគកុំព្យូទ័រ ជាដើម។
មុនពេលដែលបិទវេបសាយ AlphaBay មានអតិថិជនប្រមាណជា ២០០,០០០នាក់ ហើយនឹងអ្នកផ្គត់ផ្គង់ចំនួន ៤០,០០០នាក់ ដែលមានផលិតផលថ្នាំញៀនប្រមាណជាង ២៥០,000 ប្រភេទ, គណនីឥណទានធនាគារច្រើនជាង ១០០,000 ហើយនឹងឯកសារអត្តសញ្ញាណ, មេរោគកុំព្យូទ័រ, កម្មវិធីសម្រាប់ហេគចូលកុំព្យូទ័រ។
អាជ្ញាធរក៏បានរឹបអូសយកនូវ Bitcoins ដែលមានតម្លៃ 33.6 លានដុល្លារពីក្នុងវេបសាយនោះ ហើយក្រោយមកទៀតត្រូវបានដាក់ឲ្យដេញថ្លៃដោយ United States Marshals Service (USMS)៕