រូបរាងសម្រេចចុងក្រោយនៃ iPhone 8 តម្លៃ ១ ១០០ ដុល្លារ

2017-07-25 01:55:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញមានការប្រកាសចេញឲ្យដឹងពីតម្លៃ iPhone 8 ដោយអាចមានតម្លៃចាប់ពី ១ ១០០ ដុល្លារ ទៅ ១ ២០០ ដុល្លារ អាស្រ័យលើទំហំអង្គផ្ទុកទិន្នន័យ។ ថ្ងៃនេះក៏មានការបញ្ចេញរូបរាង Render ថ្មីជាបន្តទៀតដែលអះអាងថាជាការរចនាសម្រេចចុងក្រោយសម្រាប់ iPhone 8 ដោយនឹងមិនមានការកែប្រែអ្វីទៀតឡើយ។

ដូចដែលឃើញក្នុងរូបភាពអ៊ីចឹងស៊ុមជុំវិញអេក្រង់ OLED ទំហំ ៥,៨ អ៊ីញ មានកម្រាស់ស្ដើង។ នៅផ្នែកកណ្ដាលខាងលើនៃផ្ទៃអេក្រង់ជាទីតាំងសម្រាប់ដាក់ Sensor និង កាមេរ៉ា។ ចំណែកនៅជុំវិញនោះជាអេក្រង់សម្រាប់បង្ហាញសេវាទូរសព្ទ, កម្រិតថ្ម និង ព័ត៌មានដទៃទៀត។ ចំពោះប៊ូតុង Power ស្ថិតនៅទីតាំងដដែល ប៉ុន្តែមានទំហំធំជាងមុន ដោយគេសង្ស័យថាអាចនឹងមានបំពាក់នូវទ្រនាប់ស្កេនខ្ចៅដៃ។

ចំណុចផ្សេងៗទៀតដែលបង្ហាញក្នុងរូបភាពរួមមានរន្ធបំពងសំឡេងប្រភេទស្តេរ៉េអូ, រន្ធ Lighting សម្រាប់ដោតកាស និង ឆ្នាំងសាក និង កាមេរ៉ាភ្លោះរចនាបថបញ្ឈរ។ យ៉ាងណាៗកុំទាន់ជឿជាក់នឹងរូបរាងខាងលើថាជា iPhone 8 ១០០%អី ព្រោះថាមិនទាន់អាចទទួលយកបានជាផ្លូវការឡើយ ពោលមានតែរង់ចាំដល់ការប្រកាសចេញដោយ Apple ផ្ទាល់ប៉ុណ្ណោះ៕