Justin Bieber បញ្ឈប់ការប្រគំតន្ត្រីទេសចរណ៍ដោយសារតែ...

2017-07-25 10:35:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះតារាចម្រៀង Justin Bieber បានប្រកាសប្រាប់សារព័ត៌មាន TMZ ថាខ្លួននឹងបញ្ឈប់ការប្រគំតន្ត្រីទាំង ១៤ ដែលមានទីតាំងនៅសហរដ្ឋអាមេរិកនិងអាស៊ី។

ការប្រគំតន្ត្រីនេះគឺជាតន្ត្រីទេសចរណ៍ "Purpose” ចាប់ផ្ដើមតាំងពីឆ្នាំ ២០១៥ ដែលគិតត្រឹមពេលនេះគឺបានសម្ដែង ១៥០ កន្លែងរួចមកហើយ។ តន្ត្រីទេសចរណ៍នេះរកចំណូលបានជាង ៩៣,២លានដុល្លារ សម្រាប់តែពាក់កណ្ដាលឆ្នាំ ២០១៧នេះ ជាមួយនឹងសំបុត្រទិញចូលរួមជាមធ្យម ៤០,០០០សម្រាប់ការប្រគំតន្ត្រីម្ដងៗ។

Justin Bieber បានឆ្លើយតបបែបនេះថា៖ "ខ្ញុំសុំទោសចំពោះអ្នកដែលមានអារម្មណ៍ថាខកចិត្ត ឫដូចជាត្រូវខ្ញុំកុហក។ ខ្ញុំបានចូលរួមច្រៀងសម្រាប់តន្ត្រីទេសចរណ៍នេះ២ឆ្នាំទៅហើយ ខ្ញុំចង់សម្រាក ហើយធ្វើរឿងលំហែអារម្មណ៍ខ្លះៗដូចជាជិះកង់លេងជាដើម"។

ប៉ុន្តែមានពិធីករសញ្ជាតិអូស្ត្រាលីម្នាក់លោក Richard Wilkins បានបញ្ជាក់ថាមូលហេតុដែល Justin Bieber សម្រេចចិត្តឈប់ប្រគំតន្ត្រីទេសចរណ៍នោះគឺដោយសារតែ ចង់ធ្វើយកចិត្តទុកដាក់ទៅលើជំនឿសាសនារបស់ខ្លួនវិញ ហើយអាចនឹងបង្កើតព្រះវិហារសាសនាគ្រិស្តដោយខ្លួនឯងទៀតផង។

លោក Richard Wilkins

ពិធីករដដែលនេះបានថ្លែងថា ខ្លួនទទួលបានព័ត៌មាននេះពីប្រភពផ្ទៃក្នុងមួយពិសេសសម្រាប់កម្មវិធីរបស់លោក។

នេះដោយសារតែថ្មីៗនេះ Justin Bieber ចាប់អារម្មណ៍និងចូលរួមកម្មវិធីទាក់ទងនឹងគ្រីស្ដសាសនាជាញឹកញាប់ ដោយបានចូលរួមសន្និសីទព្រះវិហារ Hillson កាលពីដើមខែនេះ ព្រមទាំងទាក់ទងជិតស្និទ្ធជាមួយនឹងមិត្តភ័ក្ដិខ្លួនដែលជាគ្រូប៉ាស្ទ័រសាសនាគ្រិស្តលោកCarl Lentz៕