ក្រុមសិល្បៈកុមារកំព្រានិងក្រីក្រ តាហ្វុយស្សូ មានសមត្ថភាពតែខ្វះការគាំទ្រ

2017-07-26 23:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងជើងចាស់ តាហ្វុយស្សូ បានលើកឡើងក្នុងបណ្ដាញសង្គមរបស់ខ្លួនថា ក្រុមសិល្បៈកុមារ "របាំខ្មែរ" ដែលបង្កើតចេញពី "សមាគមចលនាវប្បធម៌ជាតិដើម្បីកុមារកំព្រា និងក្រីក្រ" របស់លោកពេលនេះ រៀនចេះសព្វគ្រប់ និងពោរពេញដោយសមត្ថភាពហើយតែហាក់មិនសូវមានទីផ្សារ។

អាន៖ ជុំវិញជំងឺតាហ្វុយស្សូ

ជុំវិញបញ្ហានេះ លោក ស៊ូ វណ្ណៈ កូនប្រុសតារាកំប្លែងខាងលើបញ្ជាក់ប្រាប់ Sabay ថា៖ "ពិតណាស់! ពេលនេះពួកគេមួយចំនួនធំៗ និងមានសមត្ថភាពអាចសម្ដែងបានហើយ តែមិនសូវទទួលបានទីផ្សារ ព្រោះមិនសូវមានអ្នកស្គាល់"។

លោកបន្តទៀតថា សមាជិកក្រុមដែលអាចសម្ដែងបានពេលនេះមាន១០នាក់ ពោលគឺប្រុស៥ ស្រី៥ចំណែកកុមារផ្សេងទៀតនៅតូចៗមិនទាន់អាចចេញសម្ដែងនៅឡើយទេ។ ងាកមកទីផ្សារវិញលោក វណ្ណៈ បានឲ្យដឹងថា កន្លងមកមានខ្លះដែរ គឺខាងផលិតកម្មហង្សមាសទាក់ទងទៅសម្ដែងវីដេអូចម្រៀងខារ៉ាអូខេ និងតាមការប្រគំតន្ត្រីផ្សេងៗ។

លោកបន្ថែមថា រាល់ការទាក់ទងឲ្យចេញសម្ដែងនៅទីជិតឆ្ងាយនានា ក្រុមដែលទទួលការបណ្តុះបណ្ដាលដោយផ្ទាល់ពីតារាកំប្លែងដែលមានជំងឺមហារីកថ្លើមដំណាក់កាលធ្ងន់ធ្ងរប្រចាំកាយរូបនេះនឹងព្យាយាមសម្ដែងជូនទាំងអស់មិនថានៅតាមខេត្តជិតឆ្ងាយប៉ុណ្ណាទេ កុំឲ្យតែចំថ្ងៃប៉ះពាល់ដល់ថ្ងៃការសិក្សា ឬប្រលងរបស់ក្រុមទៅបានហើយ។

គួរបញ្ជាក់ថា ក្រុមសិល្បៈកុមារ "របាំខ្មែរ" នេះមានជំនាញដូចជា៖ សម្ដែងភាពយន្ត យីកេ របាំ ល្ខោនបាសាក់ ជាដើម។ លោកបន្តថា បើចង់ទាក់ទងឲ្យទោសម្ដែងអាចទាក់ទងតាមលេខ ០១២ ៨៤០ ៤៤១ (លោកតាហ្វុយស្សូ) ០១៦ ៦២២ ២០០ និង ០១១ ៦២២ ២១១(ស៊ូ វណ្ណៈ) ឬអាចចូលទៅកាន់ Page របាំខ្មែរ ROBAM KHMER ។

អត្ថបទ៖ សុខណា