ផ្ទុះសម្ដីរវាង CEO ក្រុមហ៊ុន Tesla និង Facebook ជុំវិញសង្គ្រាម AI

2017-07-27 01:57:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានប្រតិបត្តិក្រុមហ៊ុន Tesla និង SpaceX លោក Elon Musk បានហៅលោក Mark Zuckerberg យល់ដឹងខាងផ្នែកបច្ចេកវិទ្យា AI នៅមានកម្រិត ក្រោយសេដ្ឋីវ័យក្មេងជា CEO ក្រុមហ៊ុន Facebook បានរិះគន់លើទស្សនៈលោក ជាមនុស្សពុំមានទំនួលខុសត្រូវ។

មេបច្ចេកវិទ្យាទាំង ២ មានទស្សនៈផ្ទុយគ្នា ដោយលោក Zukerberg បានគាំទ្រឱ្យមានការអភិវឌ្ឍយ៉ាងពេញទំហឹងលើបច្ចេកវិទ្យា AI ខណៈលោក Musk បានគិតថាវាជាហានិភ័យអវិជ្ជមានមួយសម្រាប់មនុស្ស ហើយចង់ឱ្យក្រុមហ៊ុនដែលកំពុងធ្វើការលើបច្ចេកវិទ្យា AI មួយនេះ ចាប់ផ្ដើមកាត់បន្ថយល្បឿន ដើម្បីធានាថាពួកគេនឹងមិនបង្កើតគ្រោះថ្នាក់នៅថ្ងៃខាងមុខ។

អំឡុងពេល Live វីដេអូលើ Facebook នាចុងសប្តាហ៍លោក Zuckerberg បានឆ្លើយតបទៅនឹងសំណួរមួយដែលអ្នកទស្សនាបានចោទសួរ។ "ខ្ញុំបានទស្សនាវីដេអូសម្ភាសន៍របស់លោក Elon Musk ដោយគាត់កំពុងភ័យខ្លាចយ៉ាងខ្លាំងជុំវិញបច្ចេកវិទ្យា AI នាពេលអនាគត។ តើអ្នកគិតបែបណាចំពោះបញ្ហានេះ ហើយវាមានផលប៉ះពាល់ដល់ពិភពលោកយ៉ាងដូចម្ដេចខ្លះ?” នេះជាការចោទសួរពីអ្នកទស្សនា។

ភ្លាមៗប្រធានប្រតិបត្តិ Facebook បានឆ្លើយតបថា "ខ្ញុំមានភាពជឿជាក់ខ្លាំងចំពោះរឿងរ៉ាវនេះ ខ្ញុំគិតថាអ្នកអាចធ្វើវា ហើយពិភពលោកនឹងមានភាពប្រសើរឡើង ជាពិសេសចំពោះបច្ចេកវិទ្យា AI ខ្ញុំពិតជាជឿជាក់ខ្លាំងមែនទែន"។

លោកបន្តថា "ខ្ញុំពិតជាមិនយល់ មនុស្សដែលព្យាយាមបញ្ឈប់រឿងនេះ ព្រោះវាជាគំនិតអវិជ្ជមាន រហូតដល់ពេលខ្លះខ្ញុំគិតថាវាជាភាពមិនមានទំនួលខុសត្រូវមួយ"។

Zukerberge បន្តទៀតថា "នៅ ៥ ទៅ ១០ ឆ្នាំបន្ទាប់ AI នឹងធ្វើឱ្យមានការពង្រឹងបន្ថែមនូវគុណភាពសម្រាប់ការរស់នៅរបស់យើង។ បច្ចុប្បន្នមូលហេតុបណ្តាលឱ្យមនុស្សស្លាប់ច្រើនបំផុត គឺមកពីគ្រោះថ្នាក់នៃរថយន្ត ហើយបើអ្នកអាចដោះស្រាយជាមួយបច្ចេកវិទ្យា AI នោះក៏ជាការរីកចម្រើនមួយយ៉ាងខ្លាំង"។

លោកថា ទោះបីលោកធ្លាប់លឺមនុស្សនិយាយថា AI អាចបង្កផលប៉ះពាល់នៅពេលអនាគត ប៉ុន្តែដូចដែលអ្នកដឹងស្រាប់ហើយ ជាទូទៅបច្ចេកវិទ្យាមានល្អនិងអាក្រក់ សំខាន់លើការប្រើប្រាស់ដោយប្រុងប្រយ័ត្នពីខ្លួនយើងផ្ទាល់។

រំលឹកថាកន្លងទៅសម្រាប់ក្រុមហ៊ុន Facebook និង Google ដែលជាក្រុមហ៊ុនខាងបច្ចេកវិទ្យាកំពូលក្នុងលោក កំពុងស្ថិតក្នុងគម្រោងអភិវឌ្ឍបច្ចេកវិទ្យា AI នាពេលអនាគត។ ទន្ទឹមនោះ លោក Bill Gates ដែលជាស្ថាបនិក Microsoft ក៏ធ្លាប់បានលើកឡើងចំពោះបញ្ហានេះ ដោយគាត់មានការខ្វល់ខ្វាយពី AI ដូចគ្នា ដោយគិតថាដំបូងយើងអាចគ្រប់គ្រងវា ប៉ុន្តែក្រោយប៉ុន្មានទសវត្សទៅមុខ AI អាចនឹងវាយបកមកយើងវិញ។

ប្រភព៖ Independent ប្រែសម្រួល៖ ប៊ុណ្ណារ៉ា