ដូចក្នុងរឿង Fast and Furious! ក្រុមចោរប្លន់ឡានដឹក iPhone កំពុងបើកលើផ្លូវ

2017-08-01 02:03:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ូលិសហុល្លង់បានចាប់ខ្លួនបុរស ៥ នាក់ដែលជាប់សង្ស័យថាមានបំណងចង់លួច iPhone ជាច្រើនគ្រឿងមានតម្លៃប្រមាណ ៦០ ម៉ឺនដុល្លារ ពីឡានទឹកទំនិញដែលកំពុងធ្វើដំណើរ។

ក្រុមប៉ូលិសហុល្លង់ឲ្យដឹងថាជនសង្ស័យទាំង ៥ មានអាយុចន្លោះពី ៣៣ ទៅ ៤៣ ឆ្នាំ ដោយសុទ្ធតែមកពីប្រទេសរ៉ូម៉ានី។ ក្រុមនេះបានប្រើប្រាស់រថយន្តកែច្នៃដោយបើកចូលទៅកៀកនឹងគូថក្រោយនៃរថយន្តដឹកទំនិញ ដើម្បីឲ្យជនសង្ស័យម្នាក់ឡើងតោងលើរថយន្តដឹកទំនិញ រួចទម្លាយចូលទ្វារក្រោយនៃរថយន្តដឹកទំនិញដែលកំពុងបើកលើដងផ្លូវ។ ក្រោយមកជនសង្ស័យក៏ហុចប្រអប់ iPhone ពីឡានដឹកទំនិញចូលទៅក្នុងរថយន្តកែច្នៃរបស់ខ្លួនតាមប្រហោងលើដំបូលរថយន្ត។

Ed Kraszewski អ្នកនាំពាក្យរបស់ក្រុមប៉ូលិសហុល្លង់ឲ្យដឹងថារឿងរ៉ាវនេះបានកើតឡើងនៅរាត្រីថ្ងៃទី ២៤ ខែកក្កដា លើផ្លូវហាយវេ A73 នាខេត្ត Limburg ប្រទេសហុល្លង់។ អ្នកនាំពាក្យរូបនេះក៏បានឲ្យដឹងដែរថាក្រុមសមត្ថកិច្ចបានស៊ើបអង្កេតពីចោរប្លន់ឡានដឹកទំនិញយូរមកហើយ ប៉ុន្តែនៅតែមិនជឿថាក្រុមចោរអាចប្លន់ដោយរបៀបនេះបាន។

លោក Kraszewski បានបន្ថែមថា ៖ "រថយន្តដឹកទំនិញធ្វើដំណើរពីគោលដៅ A ទៅ B ដោយមិនបានឈប់ឡើយ។ ប៉ុន្តែទូរសព្ទបែរជាបាត់។ ដូចនេះវាប្រាកដជាបានកើតឡើងតាមវិធីនេះ ហើយពេលនេះយើងក៏មានភស្តុតាងដោយមានរថយន្តកែច្នៃ រួមជាមួយនឹងរបស់ដែលចោរលួច”។

អ្នកនាំពាក្យដដែលនេះក៏បានរំលឹកថាហេតុការណ៍ស្រដៀងគ្នានេះធ្លាប់កើតមានឡើងដែរនៅតំបន់អឺរ៉ុប ដោយគោលដៅរបស់ពួកគេចង់ប្លន់តែស្មាតហ្វូនទំនើបៗតម្លៃថ្លៃ ហើយមកទល់ពេលនេះមិនទាន់ចាប់ជនដៃដល់បាននៅឡើយទេ។ ក្រុមចោរប្លន់បានរងការចោទប្រកាន់ថាបានលួចទូរសព្ទថ្លៃពីរថយន្តដឹកទំនិញ ១៧ គ្រឿងឡើងទទេស្អាតចាប់តាំងពីឆ្នាំ ២០១៥៕

វីដេអូដែលបង្ហាញពីហេតុការណ៍លួចស្រដៀងគ្នា ៖