អ្នកធ្វើដំណើរតាមផ្លូវជាតិលេខ២ ចាប់ពីថ្ងៃនេះទៅត្រូវជិះវាង
- 2017-08-02 02:25:31
- ចំនួនមតិ 0 | ចំនួនចែករំលែក 0
អ្នកធ្វើដំណើរតាមផ្លូវជាតិលេខ២ ចាប់ពីថ្ងៃនេះទៅត្រូវជិះវាង
ចន្លោះមិនឃើញ
ប្រជាពលរដ្ឋដែលធ្វើដំណើរតាមផ្លូវជាតិលេខ២ ដែលត្រូវឆ្លងកាត់ពីរង្វង់មូលក្រុងតាខ្មៅរហូតដល់ ព្រំប្រទល់ខេត្តតាកែវ ត្រូវធ្វើដំណើរវាងទៅតាមផ្លូវក្រវាត់ក្រុងទី២ជំនួសវិញ ដើម្បីជួយសម្រួល និងបញ្ចៀសការកកស្ទះចរាចរណ៍ អំឡុងពេលត្រូវជួសជុល។ នេះបើតាមការឱ្យដឹងពីប្រធានមន្ទីរសាធារណការខេត្តកណ្ដាល។
តាមការលើកឡើងរបស់ប្រធានមន្ទីរសាធារណការខេត្តកណ្ដាល បានឱ្យដឹងទៀតថា ប្រជាពលរដ្ឋដែលអ្នកប្រើប្រាស់ផ្លូវជាតិលេខ២ ចាប់ពីរង្វង់មូលក្រុងតាខ្មៅ ត្រូវវាងទៅតាមផ្លូវក្រវាត់ក្រុងទី២ ពីផ្លូវ៦០ម៉ែត្រ ទៅផ្លូវចម្ការដូង ឬផ្លូវវត្តព្រែកថ្លឹង ផ្លូវលេខ២០ ផ្លូវលេខ១២០ និងផ្លូវជាតិលេខ៣។
គួរជម្រាបជូនថា នៅយប់ថ្ងៃទី០១ ខែសីហា ឆ្នាំ២០១៧ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូមួយក្រុមអញ្ជើញចុះត្រួតពិនិត្យដំណើរការជួសជុល និងសាងសង់ផ្លូវជាតិលេខ២ ដែលកំពុងមានស្ថានភាពលំបាកធ្វើដំណើរ ដើម្បីពន្លឿនការជួសជុលនិងសាងសង់ ក៏ដូចជាការត្រួតពិនិត្យគុណភាពនៃការងារសាងសង់។
គម្រោងសាងសង់ផ្លូវនេះ គ្រោងចំណាយថវិកាប្រមាណ៥៦លានដុល្លារអាមេរិក ក្រោមកម្ចីឥណទានពីរដ្ឋាភិបាលនៃសាធារណរដ្ឋកូរ៉េ និងថវិកាបដិភាគរបស់រដ្ឋាភិបាលកម្ពុជាប្រមាណ៨លានកន្លះ មានប្រវែងសរុប៦៦គីឡូម៉ែត្រ។ ការជួសជុលនេះចាប់ពីរង្វង់មូលក្រុងតាខ្មៅរហូតដល់រង្វង់មូលអូរចំបក់មានប្រវែង៥៧គីឡូម៉ែត្រ។ ក្នុងនោះ៩គីឡូម៉ែត្រនៅលើផ្លូវជាតិ២២ គ្រោងក្រាលកៅស៊ូAC សង់ស្ពានថ្មី និងពង្រីកទទឹងផ្លូវឱ្យបាន១៣ម៉ែត្រ តាមទំហំចរាចរណ៍ និងតាមដំណាក់កាល ចាប់ពីរង្វង់មូលគួស្រូវ ទៅទិសខាងត្បូងប្រវែង៨គីឡូម៉ែត្រគ្រោងសាងសង់ជាបួនគន្លង៕
ចុចអានអត្ថបទពាក់ព័ន្ធ៖
ដឹងអត់ថា ផ្លូវ ស្ពាន ៧០% នៅកម្ពុជា ជាកម្ចីរបស់ប្រទេសណា?
រដ្ឋមន្ត្រី ស៊ុន ចាន់ថុល ផ្ញើសារពិសេស ទៅមន្ត្រីថ្លឹងឡានទាំង ២៤កន្លែង