បន្តិចទៀត ផ្លូវជាតិលេខ២ លែងពិបាកធ្វើដំណើរហើយ

2017-07-10 01:41:29
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងសាងសង់ផ្លូវនេះ គ្រោងចំណាយថវិកាប្រមាណ ៥៦លានដុល្លារអាមេរិក ក្រោមកម្ចីឥណទានពីរដ្ឋាភិបាលនៃសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជាប្រមាណ៨លានកន្លះ
មានប្រវែងសរុប៦៦គីឡូម៉ែត្រ ចាប់ពីរង្វង់មូលក្រុងតាខ្មៅរហូតដល់រង្វង់មូលអូរចំបក់មានប្រវែង៥៧គីឡូម៉ែត្រ
៩គីឡូម៉ែត្រនៅលើផ្លូវជាតិ២២ គ្រោងក្រាលកៅស៊ូAC សង់ស្ពានថ្មី និងពង្រីកទទឹងផ្លូវឱ្យបាន១៣ម៉ែត្រ តាមទំហំចរាចរណ៍ និងតាមដំណាក់កាល
ចាប់ពីរង្វង់មូលគួរស្រូវទៅទិសខាងត្បូងប្រវែង៨គីឡូម៉ែត្រគម្រោងសាងសង់ជាបួនគន្លង។

ថ្លែងទៅកាន់អ្នកសារព័ត៌មានកាលពីម្សិលមិញក្នុងឱកាសចុះត្រួតពិនិត្យស្ថានភាពផ្លូវជាតិលេខ ២កាលពីម្សិលមិញនេះ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្រ្ដី ក្រសួងសាធារណការ និងដឹកជញ្ជូន បានមានប្រសាសន៍ថា បន្តិចទៀតនេះផ្លូវជាតិលេខ២ លែងពិបាកហើយ។ ដូច្នេះសូមបងប្អូនមេត្តាយោគយល់ យ៉ាងយូរចុងឆ្នាំ ២០១៨នឹងត្រូវជួសជុលរួចជាស្ថាពរហើយ។

ឯកឧត្ដម បានឱ្យដឹងដែរថា គម្រោងសាងសង់ផ្លូវនេះ គ្រោងចំណាយថវិកាប្រមាណ ៥៦លានដុល្លារអាមេរិកក្រោមកម្ចីឥណទានពីរដ្ឋាភិបាលនៃសាធារណរដ្ឋកូរ៉េ និងថវិកាបដិភាគរបស់រាជរដ្ឋាភិបាលកម្ពុជាប្រមាណ៨លានកន្លះ និងមានប្រវែងសរុប៦៦គីឡូម៉ែត្រ ចាប់ពីរង្វង់មូលក្រុងតាខ្មៅរហូតដល់រង្វង់មូលអូរចំបក់មានប្រវែង៥៧គីឡូម៉ែត្រ។ បន្ថែមលើពីនេះទៀត ៩គីឡូម៉ែត្រនៅលើផ្លូវជាតិ២២ គ្រោងក្រាលកៅស៊ូAC សង់ស្ពានថ្មី និងពង្រីកទទឹងផ្លូវឱ្យបាន១៣ម៉ែត្រ តាមទំហំចរាចរណ៍ និងតាមដំណាក់កាល ។ ចាប់ពីរង្វង់មូលគួរស្រូវទៅទិសខាងត្បូងប្រវែង៨គីឡូម៉ែត្រគម្រោងសាងសង់ជាបួនគន្លង។

បច្ចុប្បន្នដៃគូរអភិវឌ្ឍន៍ភាគីកូរ៉េ កំពុងជ្រើសរើសទីប្រឹក្សាបច្ចេកទេស ដើម្បីអាចចាប់ផ្តើមរៀបចំ design និង ជ្រើសរើសក្រុមហ៊ុនសាងសង់ ដោយដំណើរការនេះអាចចំណាយពេល១ឆ្នាំ ទំរាំបានអនុវត្តការសាងសង់ជាក់ស្តែង។

ដោយយល់ឃើញពីការលំបាករបស់បងប្អូនប្រជាពលរដ្ឋដែលធ្វើដំណើរលើផ្លូវនេះ ឯកឧត្ដមទេសរដ្ឋមន្ត្រីបានណែនាំឱ្យមន្ត្រីក្រោមឱវាទ ធ្វើរបាយការណ៍ដើម្បីដាក់ជូនសម្ដេចនាយករដ្ឋមន្ត្រី ស្នើសុំគោលការណ៍ស្វែងរកកញ្ចប់ថវិកាពិសេសមួយដើម្បីដោះស្រាយ ជួសជុលបណ្ដោះអាសន្នឱ្យបានទាន់ពេលវេលា ដោយមិនរង់ចាំរហូតដល់រយៈពេលមួយឆ្នាំនោះឡើយ។ ការសាងសង់នឹងត្រូវចាប់ផ្ដើមអនុវត្តឱ្យបានលឿន ទាំងយប់នឹងថ្ងៃ ដើម្បីកាត់បន្ថយការកកស្ទះ និងសម្រួលដល់ចរាចរណ៍ជូនដល់បងប្អូនប្រជាពលរដ្ឋ។

គួរបញ្ជាក់ថា កាលពីថ្ងៃទី០៩ ខែកក្កដា ឆ្នាំ២០១៧ កន្លងទៅនេះ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូមួយក្រុមអញ្ជើញចុះត្រួតពិនិត្យស្ថានភាពផ្លូវជាតិលេខ០២ ដែលកំពុងមានស្ថានភាពលំបាកធ្វើដំណើរខ្លាំង និងសិក្សាស្វែងរកដំណោះស្រាយដោយផ្ទាល់នៅនឹងកន្លែង។ ដូច្នេះបន្តិចទៀតបងប្អូនប្រជាពលរដ្ឋលែងពិបាកធ្វើដំណើរទៀតហើយ៕

អានអត្ថបទ៖ ពាក់ព័ន្ធ៖

អត្ថបទ៖ ថោ ច័ន្ទឬទ្ធិ

រូបភាព៖ ក្រសួងសាធារណការ