រឿងថ្មីមិនគួរកើត ភ្លេចសិស្សក្នុងឡានសាលាអស់ ៥ម៉ោង រហូតបាត់បង់ជីវិត
- 2017-08-03 03:10:12
- ចំនួនមតិ 0 | ចំនួនចែករំលែក 0
រឿងថ្មីមិនគួរកើត ភ្លេចសិស្សក្នុងឡានសាលាអស់ ៥ម៉ោង រហូតបាត់បង់ជីវិត
ចន្លោះមិនឃើញ
ក្មេងអាយុ ៦ឆ្នាំម្នាក់ បានស្លាប់ក្នុងមន្ទីរពេទ្យ បន្ទាប់ពីអ្នកបើករថយន្តសាលាភ្លេចខ្លួន ទុកចោលក្នុងរថយន្តអស់រយៈពេល ៥ម៉ោង។ ហេតុការណ៍នេះកើតឡើងនៅខេត្ត Nakhon Si Ayutthaya ប្រទេសថៃកាលពីថ្ងៃចន្ទ ហើយក្មេងរងគ្រោះបានស្លាប់ក្នុងមន្ទីរពេទ្យនៅថ្ងៃពុធម្សិលមិញ។
កាលពីថ្ងៃចន្ទ ក្មេងប្រុសរងគ្រោះ និងសិស្ស ៧នាក់ទៀត ត្រូវបានរថយន្តមកទទួលទៅរៀននៅសាលា Choeng Len ក្នុងស្រុក Bang Sai ដូចសព្វមួយដង។ ពេលជូនក្មេងទាំងនោះដល់សាលា អ្នកបើករថយន្តបានបើកត្រលប់ទៅផ្ទះវិញ ដោយមិនបានពិនិត្យមើលថា ក្មេងទាំងអស់បានចុះពីលើរថយន្តហើយឬនៅនោះទេ។
អាចចាត់ទុកជារឿងមិនគួរកើតមួយ ព្រោះរាល់ដង នៅពេលដែលលោកទម្លាក់សិស្សអស់ លោក Bunlert Watthaki តែងបើកកញ្ចក់ និងជូតរថយន្តឲ្យស្អាត ទើបត្រលប់ទៅផ្ទះវិញ។ ប៉ុន្តែនៅថ្ងៃចន្ទនោះ មេឃងងឹត ពពកខ្មៅទាំងដុំ ទើបលោកប្រញាប់បើករថយន្តទៅផ្ទះវិញ ដោយមិនបានមើលឲ្យគ្រប់ជ្រុងជ្រោយ។ ប្រហែលម៉ោង ១រសៀល អ្នកធ្វើការនៅផ្ទះរបស់លោក បានឃើញសិស្សម្នាក់នៅក្នុងរថយន្ត ដោយមានអាការៈមិនប្រក្រតី ទើបប្រញាប់បញ្ជូនទៅមន្ទីរពេទ្យ។
អ្នកបើករថយន្តវ័យ ៥៧ឆ្នាំ បានធ្វើការឲ្យសាលាមួយនេះអស់រយៈពេល ៤ឆ្នាំមកហើយ ចំណែករថយន្តរបស់លោកគ្មានលិខិតអនុញ្ញាតឲ្យដឹកអ្នកដំណើរឡើយ។ មន្ត្រីប៉ូលិសបានអះអាងថា លោក Bunlert ត្រូវចោទប្រកាន់ ២ករណី គឺធ្វេសប្រហែសបណ្ដាលឲ្យមានព្យសនកម្ម និងបើករថយន្តដឹកមនុស្សទាំងគ្មានលិខិតអនុញ្ញាត ប៉ុន្តែមិនទាន់បញ្ជាក់ថានឹងមានទោសកម្រិតណាឡើយ។ ចំណែកលោក Bunlert លោកមានគម្រោងទៅបួសជាសង្ឃ ដើម្បីឧទ្ទិសកុសលដល់ Gaga។
គ្រួសារក្មេងរងគ្រោះ បានបញ្ជាក់ថា នឹងបរិច្ចាគរាងកាយរបស់ Gaga ឲ្យទៅខាងកាកបាទក្រហម និងកំពុងរៀបចំដាក់ពាក្យប្ដឹង។ ចំណែកម្ដាយរបស់ក្មេងរងគ្រោះរូបនេះ បានផ្ដាំផ្ញើអ្នកបើករថយន្តសាលាទាំងអស់ប្រុងប្រយ័ត្ន ចៀសវាងមានករណីមិនគួរកើតនេះទៀត៕