រកឃើញសាកសពព្រះនាងមួយអង្គ មានសភាពសឹងដូចដើម បន្ទាប់ពីគេរក្សាទុក៩០០ឆ្នាំ

2017-08-05 02:55:06
ចំនួនមតិ 0 | ចំនួនចែករំលែក 0

ចន្លោះមិនឃើញ

វាគឺជារឿងអព្ភូតហេតុដ៏អស្ចារ្យមួយ ដោយសាកសពព្រះនាងមួយអង្គ ត្រូវបានគេរកឃើញក្បែររង្វង់អាក់ទិក (Arctic Circle) ខណៈរោមភ្នែក និងសក់វែងរបស់ទ្រង់ មានសភាពសឹងតែដូចដើម បន្ទាប់ពីសុគតអស់រយៈពេល ៩០០ឆ្នាំ។

ជាមួយគ្នានេះដែរ ព្រះភ័ក្ត្រ និងលក្ខណៈជាច្រើនផ្សេងទៀត អាចមើលឃើញយ៉ាងច្បាស់ ដោយសារតែសាកសពទ្រង់ ត្រូវបានគេកប់ក្នុងដីកំណកដែលគង់នៅបានយូរ នៅសតវត្សទី១២។ ស្ថិតក្នុងព្រះជន្ម ៣៥ វស្សា ព្រះនាង គឺជាមនុស្សស្រីតែមួយអង្គគត់ ដែលត្រូវបានគេកប់ នៅក្បែរមនុស្សប្រុសជាង ៣០ នាក់។

គួរឲ្យដឹងថា សាកសពនេះត្រូវបានជីករកឃើញដោយ ក្រុមអ្នកបុរាណវិទូនៅកន្លែងបញ្ចុះសព Zeleny Yar ក្បែរទីក្រុង Salekhard ប្រទេសរុស្ស៊ី។ ព្រះនាង គឺជាសមាជិកម្នាក់នៃយុគសម័យអាថ៌កំបាំងមួយ ដែលឆ្លងកាត់តំបន់ប៉ូលនោះ។

អ្នកបុរាណវិទូ បានឆ្ងល់ថា ហេតុអ្វីបានជាព្រះនាង ជាមនុស្សស្រីពេញវ័យតែមួយអង្គគត់ ដែលត្រូវបានគេរកឃើញ នៅទីបញ្ចុះសពខាងលើ។ មិនតែប៉ុណ្ណោះ ដំបូងឡើយពួកគេធ្លាប់គិតថា វាជាទីបញ្ចុះសពមនុស្សប្រុសទាំងអស់ទៀតផង។ វាអាចមានន័យថា ព្រះនាង គឺជាសមាជិកវរជននៃសង្គម ដែលគង់នៅក្នុងតំបន់ត្រជាក់ខាងលើ។ ក្នុងនោះដែរ គេបានរកឃើញក្រវិល (Temple Ring) ជាច្រើននៅក្បែរព្រះនាង ប៉ុន្តែពុំមានភស្តុតាងបង្ហាញពីគ្រឿងអលង្ការ នៅក្នុងផ្នូររបស់ទ្រង់ឡើយ។ យ៉ាងណាមិញ ខណៈពេលដែលព្រះកេសរបស់ទ្រង់ ត្រូវបានគេថែរក្សាយ៉ាងល្អ ប៉ុន្តែរាងកាយទ្រង់មិនត្រូវបានគេថែរក្សាឡើយ៕