Real ឬ Man Utd ជាម្ចាស់ពាន UEFA Super Cup យប់នេះ?

2017-08-08 07:11:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួត UEFA Super Cup រវាងជើងឯក UEFA Champions League និង UEFA Europa ចាប់ផ្ដើមនៅយប់នេះហើយវេលាម៉ោង ១:៤៥នាទី រំលងអាធ្រាត្រជាការប៉ះគ្នារបស់ក្លឹបយក្សពីរនៅអឺរ៉ុបមាន Real Madrid និង Manchester United។

Real Madrid ជាជើងឯក Champions League បានលើកពាន Super Cup នេះម្ដងហើយកាលពីរដូវកាលចាស់បន្ទាប់ពីយកឈ្នះ Sevilla ហើយមានភារៈការពារពាននេះម្ដងទៀតដោយត្រូវតទល់នឹង Manchester United ជើងឯក Europa League រដូវកាលមុន។

នៅពីពេលថ្មីៗក្រុមទាំងពីរទើបប៉ះគ្នារួចក្ដៅៗនៅពានមិត្តភាព International Champions Cup ហើយជាលទ្ធផល United ឈ្នះ២-១ នៅវគ្គទាត់ប៉េណាល់ទីកាត់សេចក្ដី។ ចាំមើលថាយប់នេះ ក្រុមលោក Mourinho នៅតែអាចយកឈ្នះ ឬត្រូវ Real Madrid សងសឹកបានវិញ?

ជើងកីឡាករ

Real Madrid មិនមានបញ្ហាកីឡាកររបួសនោះទេ ប៉ុន្តែ Ronaldo ដែលទើបមកហ្វឹកហាត់អាចលេងជាកីឡាករបម្រុងដូច្នេះជម្រើស១១នាក់ដំបូងមាន៖ អ្នកចាំទី Navas ខ្សែការពារ Carvajal, Ramos, Varane, Marcelo ខ្សែបម្រើ Modric, Casemiro, Kroos ខ្សែប្រយុទ្ធ Isco, Benzema និង Bale។

Manchester United មានបញ្ហាកីឡាករមួយចំនួនដែលអាចអវត្តមានដូចជា Baily, Jones, Rojo, Shaw និង Young ដូច្នេះជម្រើស១១នាក់អាចជា៖ អ្នកចាំទី De Gea ខ្សែការពារ Valencia, Lindelof, Smalling, Blind ខ្សែបម្រើ Herrera, Matic, Pogba ខ្សែប្រយុទ្ធ Rashford, Lukaku និង Mkhitaryan។

ស្ថិតិមួយចំនួន៖

ការប្រកួតនេះនឹងធ្វើនៅទីក្រុង Skopje ជាការប្រកួតក្លឹបអាជីពដែលរៀបចំដោយ UEFA លើកដំបូងក្នុងប្រទេសម៉ាសេដូនី។
Real Madrid ធ្លាប់លេងនៅ UEFA Super Cup ៦លើកហើយក្នុងនោះឈ្នះ៣ និងចាញ់២ ហើយបើឈ្នះយប់នេះពួកគេគឺជាក្នុងដំបូងក្នុងរយៈពេល២៧ឆ្នាំចុងក្រោយដែលអាចឈ្នះ Super Cup ២រដូវកាលជាប់គ្នាបន្ទាប់ពី AC Milan ធ្លាប់ធ្វើបានកាលពីរដូវកាល ១៩៨៩ និង១៩៩០។
Manchester United ធ្លាប់លេងនៅ Super Cup ៣ដង ដោយឈ្នះម្ដង និងចាញ់២ដង។
រាប់ទាំងយប់នេះផង Real និង United បានប៉ះគ្នា១១លើក ក្នុងនោះ Real ឈ្នះ៤, United ឈ្នះ ២ និងស្មើ៤។

សម្ដីគ្រូបង្វឹក

លោក Zidane គ្រូបង្វឹក Real Madrid៖"ពួកយើងនឹងលេងដូចដែលធ្លាប់លេងកន្លងមក។ ក្រុមទាំងមូលនឹងមិនផ្លាស់ប្ដូរច្រើនទេ។ ពួកយើងត្រៀមខ្លួនរួចជាស្រេចសម្រាប់ការប្រកួត និងដើម្បីឈ្នះពាន"។

លោក Jose Mourinho អ្នកចាត់ការក្រុម Man Utd៖"ពួកយើងពិតជាមានមោទនភាពដែលលេងទល់នឹងជើងឯកទ្វីបអឺរ៉ុប។ ខ្ញុំមានទំនាក់ទំនងល្អជាមួយកីឡាករ Real Madrid មួយចំនួន ប៉ុន្តែសម្រាប់ការប្រកួតលើទីលានគឺគ្មានការយោគយល់គ្នានោះទេ"៕