“Annabelle: Creation” បន្លាចអ្នកមើលរហូតបានចំណាត់លេខ១ប្រចាំ Box Office ចុងសប្ដាហ៍នេះ

2017-08-14 04:36:14
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់សប្ដាហ៍នេះប្រាក់ចំណូលប្រចាំសប្ដាហ៍បានកើនឡើងជាមធ្យម បើប្រៀបធៀបជាមួយនឹងប្រាក់ចំណូលកាលពីសប្ដាហ៍មុន នេះដោយសារតែវត្តមាននៃភាពយន្ត "Annabelle: Creation”។

Poster សម្រាប់រឿង "Annabelle: Creation"

សម្រាប់៣ថ្ងៃដំបូងចាប់ពីភាពយន្តនេះដាក់បញ្ចាំង "Annabelle: Creation” អាចរកចំណូលបាន ៣៥លានដុល្លារបាត់ទៅហើយ។ ភាពយន្តនេះគឺជាភាពយន្តនិយាយពីហេតុការណ៍ផ្សេងៗដែលបានកើតឡើងមុនរឿង "Annabelle” ដែលបានដាក់បញ្ចាំងកាលពីឆ្នាំ ២០១៤ ហើយក៏ទទួលបានការកោតសរសើរនិងពេញចិត្តជាច្រើនបើធៀបទៅនឹងវគ្គមុន។

ភាពយន្តនេះដែរគឺជារឿងចុងក្រោយសម្រាប់ខ្សែរឿង "Conjuring Shared Universe” ដែលមានដាក់បញ្ចូលគ្នាទាំងអស់ទាំងខ្សែរឿង "Conjuring” និង "Annabelle” ធ្វើឲ្យសាច់រឿងទាំងអស់គឺតែងតែទាក់ទងគ្នាជានិច្ច។

បើប្រៀបធៀបទៅហ្នឹងរឿងចាស់ៗសម្រាប់បណ្ដារឿងដែលទាក់ទង "Annabelle: Creation” រកបានចំណូលតិចជាងគេសម្រាប់សប្ដាហ៍ដំបូងបើប្រៀបធៀបទៅហ្នឹងរឿងចាស់ៗ ក៏ប៉ុន្ដែនេះមិនមែនជាបញ្ហានោះទេ ដោយសាររឿងនេះចំណាយដើមទុនថតអស់តែ ១៥លានដុល្លារតែប៉ុណ្ណោះ។

ដោយគ្រាន់តែគិតពីចំណូលក្នុងសហរដ្ឋអាមេរិកតែប៉ុណ្ណោះ រឿងនេះអាចរកបាន២ដងនៃថ្លៃផលិតទៅហើយ បើគិតពីចំណូលសរុបទូទាំងពិភពលោកវិញរឿងនេះអាចរកបាន ៧១លានដុល្លារឯណោះ។

សម្រាប់រឿងដែលទទួលបានចំណាត់ថ្នាក់លេខពីរគឺរឿង "Dunkirk” ដែលរកចំណូលបាន ១១.៤លានដុល្លារ ធ្វើឲ្យចំណូលក្នុងស្រុកសរុបកើនឡើងដល់ ១៥៣,៧លានដុល្លារ។

រឿង "The Nut Job 2: Nutty By Nature” អាចរកចំណូលបាន ៨,៩លានដុល្លារសម្រាប់សប្ដាហ៍ដំបូង ហើយត្រូវបានគេកត់សម្គាល់ថាចំណូលនេះតិចជាងការរំពឹងទុក។

Poster សម្រាប់រឿង "The Nut Job 2: Nutty By Nature”

ចំណែកឯភាពយន្តដែលជាប់ចំណាត់ថ្នាក់លេខ៤គឺជារឿងដែលទទួលបានលេខ១កាលពីចុងសប្ដាហ៍មុនរឿង "The Dark Tower” ជាមួយនឹងប្រាក់ចំណូល ៧,៨លានដុល្លារ ដែលថយចុះដល់ទៅ៥៨.៩ភាពរយឯណោះ។

រឿង "The Emoji Movie” ទទួលបានលេខ៥ជាមួយនឹងចំណូល ៦,៦លានដុល្លារ ខណៈឯរឿង "Girls Trip” ទទួលបានចំណាត់ថ្នាក់លេខ៦ជាមួយចំណូល ៦,៥លានដុល្លារ។

សម្រាប់ភាពយន្តដែលជាប់ចំណាត់ថ្នាក់លេខ៧វិញគឺរឿង "Spider-Man:Homecoming” ជាមួយនឹងចំណូល៦,១លានដុល្លារ ធ្វើឲ្យប្រាក់ចំណូលក្នុងស្រុកសម្រាប់រឿងនេះគឺកើនឡើងដល់ ៣០៦,៤លានដុល្លារ។

រឿង "Kidnap” ទទួលបានចំណូល ៥.២លានដុល្លារសម្រាប់សប្ដាហ៍ទី២ ជាប់ចំណាត់ថ្នាក់លេខ៨។

ចំពោះភាពយន្ត "The Glass Castle” ក៏ជាភាពយន្តថ្មីមួយដែរដែលមានវត្តមានក្នុងតារាងកំពូលរឿងទាំង១០ ដែលទទួលបានចំណាត់លេខ៩ ចំពោះប្រាក់ចំណូល៤,៨លានដុល្លារ។

Poster សម្រាប់រឿង "Glass Castle"

សម្រាប់រឿងចុងក្រោយដែលជាប់ចំណាត់ថ្នាក់លេខ១០គឺរឿង "Atomic Blonde” សម្រាប់ចំណូល ៤,៥លានដុល្លារ ដែលធ្វើឲ្យប្រាក់ចំណូលក្នុងស្រុកសរុបសម្រាប់រឿងនេះកើនឡើងដល់ ៤២.៨លានដុល្លារ៕

នេះជា Trailer សម្រាប់រឿង "The Nut Job 2: Nutty By Nature”