“The Dark Tower” ជាប់ចំណាត់លេខ១ក្នុងសប្ដាហ៍ដែលរកប្រាក់ចំណូលតិចបំផុតប្រចាំរដូវក្ដៅនេះ!

2017-08-08 04:54:37
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់ចុងសប្ដាហ៍មុននេះ គឺជាសប្ដាហ៍មួយដែលប្រាក់ចំណូល Box Office រកបានតិចបំផុតសម្រាប់រដូវក្ដៅឆ្នាំនេះ ដោយសារតែមិនសូវមានភាពយន្តថ្មីៗ ដែលមានលទ្ធភាពចូលក្នុងតារាងរឿងអាចរកចំណូលបានច្រើន។

អាន៖ Atomic Blond និង The Emoji Movie បង្ហាញខ្លួនក្នុងតារាង Box Office!

ភាពយន្តរឿង "The Dark Tower” ជាប់ចំណាត់លេខ១ជាមួយនឹងប្រាក់ចំណូល ១៩,៥លានដុល្លារសម្រាប់រយៈពេលបីថ្ងៃដំបូង។ ប្រាក់ចំណូលនេះគឺតិចជាងប្រាក់ចំណូលដែលគេប៉ាន់ស្មានកំណត់ទុកគឺប្រហែល ២០ទៅ២៥លានដុល្លារ សម្រាប់ចុងសប្ដាហ៍។ ចំពោះមូលហេតុដែលភាពយន្តនេះអាចរកប្រាក់ចំណូលតិចដូច្នេះគឺដោយសារតែមិនសូវមានការនិយាយច្រើន (និយាយពីមាត់មួយទៅមាត់មួយ) សរសើរពីរឿងនេះ ក៏ដូចជាភាពអវិជ្ជមានពីបណ្ដាអ្នកវិភាគរឿងថា សាច់រឿងនេះបានដកស្រង់ពីសៀវភៅយកសម្ដែងជាភាពយន្តគឺមិនសូវល្អ។

Poster សម្រាប់រឿង "The Dark Tower"

ចំណែកឯភាពយន្តដែលជាប់ចំណាត់លេខពីរវិញគឺភាពយន្តរឿង "Dunkirk” ដែលអាចរកចំណូលបាន ១៧,៦លានដុល្លារ សម្រាប់សប្ដាហ៍នេះដែលសរុបទាំង៣សប្ដាហ៍ភាពយន្តនេះរកចំណូលបាន ១៣៣,៥លានដុល្លារតែនៅសហរដ្ឋអាមេរិក។

ភាពយន្តរឿង "The Emoji Movie” អាចរកចំណូលបាន ១២,៣លានដុល្លារ ដែលចំណូលសរុបគឺ ៤៩,៤សម្រាប់ពីរសប្ដាហ៍កន្លងទៅនេះ។ ទោះបីជាមានការរិះគន់ច្រើន ក៏ភាពយន្តនេះអាចរកចំណូលបាន ៦២,១លានដុល្លារទូទាំងពិភពលោក ដែលចំណាយដើមទុនថតអស់ ៥០លានដុល្លារ។

ភាពយន្តកំប្លែង "Girls Trip” អាចរកចំណូលបាន ១១,៤លានដុល្លារសម្រាប់សប្ដាហ៍ទី៣នេះ ដែលជាប់ចំណាត់ថ្នាក់លេខ៤។

ចំណែកឯភាពយន្តដែលជាប់ចំណាត់ថ្នាក់លេខ៥ គឺរឿង "Kidnap” ដែលជារឿងប្រភេទ Thrillerសម្ដែងដោយតារាល្បី "Halle Berry” សម្រាប់ប្រាក់ចំណូល ១០,២លានដុល្លារ។ ភាពយន្ត "Spider-Man: Homecoming” អាចរកចំណូលបាន ៨,៨លានដុល្លារចំណែកឯភាពយន្តរឿង "Atomic Blonde” អាចរកចំណូលបាន ៨,២លានដុល្លារ ធ្វើឲ្យភាពយន្តទាំងពីរនេះជាប់ចំណាត់ថ្នាក់លេខ ៦ និង ៧។

Poster សម្រាប់រឿង "Kidnap"

Poster សម្រាប់រឿង "Detroit"

ភាពយន្តលក្ខណៈ Drama រឿង "Detroit” ជាប់លេខ៨សម្រាប់ចំណូល ៧,២លានដុល្លារ ខណៈដែលរឿង "War for the Planet of the Apes” ជាប់ចំណាត់ថ្នាក់លេខ៩សម្រាប់ប្រាក់ចំណូល៦លានដុល្លារ។

សម្រាប់ចំណាត់ថ្នាក់លេខ១០គឺបានទៅលើរឿង "Despicable Me 3” សម្រាប់ប្រាក់ចំណូល ៥,២លានដុល្លារ៕

នេះជាបណ្តា Trailer សម្រាប់រឿងចំណូលថ្មីលើ Box Office៖

Trailer សម្រាប់រឿង "Dark Tower"