ចាប់ខ្លួនវេជ្ជបណ្ឌិតវៀតណាមច្រើនរូប ក្រោយចេញថ្នាំមហារីកក្លែងក្លាយឲ្យអ្នកជំងឺ

2017-08-23 06:50:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមវេជ្ជបណ្ឌិតវៀតណាមជាច្រើននាក់នៅតាមមន្ទីរពេទ្យផ្សេងៗគ្នា ត្រូវបានចោទប្រកាន់ពីបទទទួលសំណូកពីក្រុមហ៊ុនលក់ថ្នាំឯកជនមួយនៅទីក្រុងហូជីមិញ ដើម្បីចេញវេជ្ជបញ្ជាឲ្យថ្នាំព្យាបាលជំងឺមហារីកក្លែងក្លាយទៅអ្នកជំងឺ។

ឈ្មោះវេជ្ជបណ្ឌិត និងមន្ទីរពេទ្យរបស់ពួកគេ មិនទាន់បញ្ជាក់ឲ្យដឹងនៅឡើយ ប៉ុន្តែតុលាការ ហូជីមិញ បានបើកសវនាការថា យ៉ាងហោចណាស់ទឹកប្រាក់ ៧,៥ទ្រីលានដុង ឬប្រមាណ ៣៣ម៉ឺនដុល្លារ បានប្រគល់ឲ្យក្រុមវេជ្ជបណ្ឌិតខាងលើ។

ការបង្ហើបឲ្យដឹងធ្វើឡើង ចំពេលសវនាការអតីតនាយកប្រតិបត្តិ និងបុគ្គលិកក្រុមហ៊ុន VN Pharma ដែលចោទប្រកាន់ថា បានក្លែងបន្លំលិខិតស្នាមនាំចូលថ្នាំមហារីកក្លែងក្លាយពីប្រទេសកាណាដា ចូលវៀតណាម។ សវនាការបានប្រព្រឹត្តិទៅកាលពីថ្ងៃច័ន្ទ។

ព្រះរាជអាជ្ញាអះអាងថា សំណុំរឿង VN Pharma ត្រូវបានរកឃើញកាលពីខែកញ្ញា ឆ្នាំ ២០១៤ បន្ទាប់ពីក្រសួងសុខាភិបាលបានស្នើប៉ូលិសឲ្យបញ្ជាក់ពីប្រភពថ្នាំព្យាបាលមហារីក H-Capita ដែលក្រុមហ៊ុននេះបាននាំចូលតាំងពីឆ្នាំ ២០១៣។ កាលពីខែឧសភា ឆ្នាំ ២០១៤ VN Pharma បានឈ្នះកិច្ចសន្យាពីនាយកដ្ឋានសុខាភិបាលទីក្រុងហូជីមិញ ក្នុងការចែកចាយថ្នាំមហារីក។

ក្រុមហ៊ុនបានអះអាងថា ថ្នាំមហារីកនេះផលិតដោយក្រុមហ៊ុន Helix Pharmaceuticals Inc. នៅប្រទេសកាណាដា ប៉ុន្តែក្រោយមកប៉ូលិសរកឃើញថា ក្រុមហ៊ុននេះមិនមានឡើយ។

ចំណែក CEO របស់ VN Pharma លោក Hung ក៏ត្រូវចោទប្រកាន់ថា បានណែនាំឲ្យបុគ្គលិកក្លែងបន្លំឯកសារ និងហត្ថលេខាពីក្រុមហ៊ុនឱសថ Helix ប្រទេសកាណាដា។ លោក Hung និងមនុស្ស ៦នាក់ទៀត ត្រូវបានចោទប្រកាន់។ ព្រះរាជអាជ្ញាបានស្នើឲ្យកាត់ទោសលោក Hung ចន្លោះពី ១០ ទៅ ១២ឆ្នាំ។ ឯមន្ត្រីសុខាភិបាលបានពិសោធន៍មើលឱសថទាំងនោះរួចអះអាងថា ច្រើនជាង ៩៧% មិនអាចប្រើប្រាស់ជាមួយមនុស្សជាដាច់ខាត៕

ចុចអាន៖

ប្រភព៖ vnexpress ប្រែសម្រួល៖ ឡេង ភារុណ