កវីនិពន្ធ១២រូប ដែលទទួលបានការគាំទ្រ តែមិនសូវបង្ហាញមុខជាសាធារណៈ

2017-08-25 04:15:35
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បៈចម្រៀងខ្មែរសព្វថ្ងៃ កំពុងតែរីកចម្រើនលំដាប់ ដោយមានអ្នកនិពន្ធ និងតារាចម្រៀងជាច្រើនរួមគ្នាផលិតបទថ្មីៗ ដើម្បីជាចំណីអារម្មណ៍ចែកជូនដល់អ្នកស្ដាប់។ ពិតណាស់ ទម្រាំតែចម្រៀងមួយបទអាចលេចចេញជារូបរាងបាន គឺត្រូវមានការសហការដោយអ្នកចម្រៀង តន្រ្តីករ កវីនិពន្ធ និងអ្នកពាក់ព័ន្ធជាច្រើនទៀត។ ថ្ងៃនេះ Sabay នឹងបង្ហាញកវីវ័យក្មេងចំនួន ១២ រូបដែលស្នាដៃរបស់ពួកគេទទួលបានការអារម្មណ៍ខ្លាំង តែមិនសូវបានបង្ហាញមុខជាសាធារណៈ។

១ សោម ដូរ៉េ៖ លោកមានស្នាដៃជាច្រើនក្នុងវិស័យតែងនិពន្ធតែចម្រៀង២បទដែលទទួលបានការគាំទ្រខ្លាំងជាងគេគឺបទ "សង្សាលេងៗ" ច្រៀងដោយ ណុប បាយ៉ារិទ្ធ និង "លើលោកនេះខ្ញុំស្រឡាញ់ម៉ាក់ជាងគេ" ច្រៀងដោយ មាស សុខសោភា។

២ ម៉ម ពេជ្ជរិទ្ធ៖ ត្បិតតែនៅវ័យក្មេងមែនតែ ពេជ្ជរិទ្ធ មានស្នាដៃជាច្រើនក្នុងវិស័យតែងនិពន្ធបទ។ បទចម្រៀងល្បីៗស្ទើរទាំងអស់របស់ក្រុម "ក្មេងខ្មែរ" និង "SmallWorld SmallBand" សុទ្ធតែត្រូវនិពន្ធឡើងដោយស្នាដៃលោក។

៣ ពេជ្រ សោភា៖ អ្នកគាំទ្រវិស័យចម្រៀងភាគច្រើនស្គាល់ សោភា ត្រឹមតែជាអ្នកចម្រៀងប៉ុណ្ណោះ ប៉ុន្ដែរូបនាងក៏មានស្នាដៃជាច្រើនក្នុងការតែងនិពន្ធដែរ ដោយមានចម្រៀងមួយចំនួននាងនិពន្ធច្រៀងខ្លួនឯង និងមួយចំនួនទៀត នាងផលិតឲ្យតារាចម្រៀងផ្សេងទៀត។ តួយ៉ាងបទ "អូនទៅបានបើបងដេញ" របស់ ឆន សុវណ្ណរាជ។

៤ Noly៖ អ្នកណាៗក៏ស្គាល់ដែរ Noly Time ដែលជាម្ចាស់បទ "អារម្មណ៍ត្រូវការអូន"។ មិនត្រឹមតែនិពន្ធសម្រាប់ច្រៀងខ្លួនឯងទេ លោកនៅមានស្នាដៃជាច្រើនទៀតក្នុង និងក្រៅផលិតកម្ម ថោន។ ក្នុងនោះបទដែលត្រូវទទួលបានការគាំទ្រគួរឲ្យកត់សម្គាល់ គឺ "ម្នាក់ឯងមិនស្លាប់ទេ" ច្រៀងដោយ មាស សុខសោភា។

៥ Tempo Tris៖ បទចម្រៀងល្បីៗជាច្រើនដូចជា "គ្រលែង" "នឹកបងទេ?” និង "Dance and Smile” ត្រូវបាន សរសេរដោយកវីវ័យក្មេង Tempo។ លោកគឺជាអតីតអ្នកចម្រៀងក្នុងក្រុម Accord ហើយពេលនេះលោកជ្រកក្នុងផលិតកម្មថោន។

៦ ទ្រី សក្កដា៖ អ្នកចម្រៀងបទតែងនិពន្ធថ្មីរូបនេះ មានស្នាដៃជាច្រើនទាំងក្នុង និងក្រៅផលិតកម្មហង្សមាស។ ស្នាដៃថ្មីៗ ដែលគួរឲ្យកត់សម្គាល់ គឺបទ "ឈប់" ច្រៀងដោយ រ៉េត ស៊ូហ្សាណា និង "អ្នកមិនអីទេ" ដោយ ឈិន រតនៈ។

៧ Bmo៖ Bmo ដែលទើបទទួលរងរឿងអាស្រូវស្នេហាជាមួយ យូរី មិនមែនត្រឹមតែជាអ្នកចម្រៀងទេ លោកក៏មានទេពកោសល្យផ្នែកនិពន្ធផងដែរ។ បទចុងក្រោយដែលទទួលបានការចាប់អារម្មណ៍ជាងគេនោះ គឺ "Trust No Body” ច្រៀងដោយ យូរី។

៨ អ៊ីនូ៖ ណុប អ៊ីនូ ដែលត្រូវជាបងប្រុសបង្កើតរបស់ តារាចម្រៀង នីកូ ក៏ជាអ្នកមានទេពកោសល្យមិនធម្មតាខាងផ្នែកតែងនិពន្ធ។ ស្នាដៃជាច្រើនរបស់លោកបានធ្វើឲ្យកក្រើកដល់វិស័យចម្រៀងខ្មែរ។ ចម្រៀងចុងក្រោយរបស់លោកដែលទទួលមានការគាំទ្រយ៉ាងខ្លាំងនោះគឺ "មួយម៉ាត់បែក ពីរម៉ាត់បែក" ច្រៀងដោយ ឱក សុគន្ធកញ្ញា។

៩ Eno៖ អ្នកណាៗក៏ស្គាល់ដែរ តារាចម្រៀងសំឡេងខ្ពស់ប្រចាំផលិតកម្ម សាន់ដេ Eno ។ ការពិតលោកមានអាជីពមួយទៀតជាអ្នកនិពន្ធទំនុកចម្រៀង ដោយប្រើឈ្មោះថា ម៉ៅឃ្លី។

១០ Darex Wa៖ វ៉ា សុភាវឌ្ឍនា ឬ Darex Wa គឺជាអ្នកកវីមួយរូបប្រចាំផលិតកម្មថោន ស្នាដៃរបស់លោកទទួលបានការគាំទ្រ គឺបទ "យក្ខ" និង "ចប់ដោយរីករាយ" របស់ ឈិត សុវណ្ណបញ្ញា

១១ និង ១២ កៅ សុភា & YT៖ អ្នកគាំទ្រ ពិសេសយុវវ័យភាគច្រើនស្គាល់អ្នកទាំង២ជាអ្នកចម្រៀង ឬ Rapper តែការពិតអ្នកទាំង២បានរួមគ្នាធ្វើឲ្យបទមួយរបស់ អេដា កក្រើកគឺបទ “I dont want you back”៕