ភូមិតូចមួយជាប់ឈ្មោះជា ភូមិស្អាត និងមានអនាម័យបំផុតនៅអាស៊ី តែមិនសូវមានអ្នកស្គាល់

2017-08-29 03:49:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ភូមិតូចមួយនៅភាគខាងកើតនៃប្រទេសឥណ្ឌា មិនត្រឹមតែគេយកធ្វើជាគំរូ នៅទូទាំងប្រទេសនោះទេ តែនៅទូទាំងតំបន់អាស៊ីទាំងមូលតែម្ដង។

ភូមិតូចនោះមានឈ្មោះថា Mawlynnong មានប្រជាពលរដ្ឋរស់នៅប្រហែល ៦០០ នាក់ប៉ុណ្ណោះ ហើយវាត្រូវបានគេដាក់រហស្សនាមឲ្យថា «សួនច្បារព្រះ» និង «ភូមិស្អាតបំផុតនៅអាស៊ី» ចាប់តាំងពីឆ្នាំ២០០៣ មកម្ល៉េះ។ នៅឆ្នាំ ២០០៥ វាត្រូវបានទទួលស្គាល់ជាផ្លូវការដោយរដ្ឋាភិបាលឥណ្ឌា ថាជាភូមិស្អាតមានអនាម័យបំផុតនៅក្នុងប្រទេស។

រហូតមកដល់សព្វថ្ងៃនេះ ភូមិ Mawlynnong នៅតែបន្តទទួលបានការសរសើរ ដោយសារតែមានការចូលរួមរបស់ប្រជាពលរដ្ឋ ក្នុងការថែរក្សាអនាម័យរបស់ភូមិ។

យោងតាមប្រភពព័ត៌មាន បានឲ្យដឹងថា ក្មេងៗត្រូវទទួលខុសត្រូវចំពោះការបោសសម្អាតដី និងស្លឹកឈើដែលបានជ្រុះ ចេញពីដងផ្លូវនានា ជារៀងរាល់ព្រឹក មុនពេលទៅសាលារៀន។ ស្លឹកឈើដែលបានប្រមូល ត្រូវយកទៅធ្វើជាជីកំប៉ុស។ ជាមួយគ្នានេះដែរ ភូមិតូចខាងលើ បានហាមឃាត់ការជក់បារី និងការប្រើប្រាស់ថង់ប្លាស្ទិកទៀតផង។

មិនតែប៉ុណ្ណោះ ស្ទើរតែក្នុងភូមិទាំងមូល សុទ្ធតែដំណើរការលើថាមពល ដែលភាគច្រើនគឺជា ថាមពលពន្លឺព្រះអាទិត្យ ដែលបង្ហាញឲ្យឃើញពីការប្ដេជ្ញាចិត្តរបស់ពួកគេ ចំពោះការថែរក្សាបរិស្ថានយ៉ាងខ្លាំង។

យ៉ាងណាមិញ គេជឿជាក់ថា ភូមិ Mawlynnong ធ្លាប់កើតមានជំងឺអាសន្នរោគ កាលពី ១៣០ ឆ្នាំមុន ទើបបណ្ដាលឲ្យមានការខិតខំប្រឹងប្រែង ថែរក្សាអនាម័យក្នុងចំណោមប្រជាពលរដ្ឋដែលរស់នៅទីនោះ ដើម្បីទប់ស្កាត់ការសាយភាយរបស់វា៕