ដឹងមូលហេតុ ប្រធាន eSports ក្លឹប PSG ឈាមជ័រខ្មែរដាក់រហស្សនាម YellOwStaR
- 2017-09-05 07:57:30
- ចំនួនមតិ 0 | ចំនួនចែករំលែក 0
ដឹងមូលហេតុ ប្រធាន eSports ក្លឹប PSG ឈាមជ័រខ្មែរដាក់រហស្សនាម YellOwStaR
ចន្លោះមិនឃើញ
លោក គឹម បូរ៉ា ជាអតីតកីឡាអេឡិចត្រូនិកដ៏ដ៏ល្បីទូទាំងពិភពលោកដែលត្រូវបានគេស្គាល់រហស្សនាមថា YellOwStaR ដែលបច្ចុប្បន្នរូបគេជាប្រធានផ្នែកកីឡាអេឡិចត្រូនិក E-Sports របស់ក្លឹបបាល់ទាត់ដ៏កំពូលនៅប្រទេសបារាំងគឺ Paris Saint-Germain (PSG)។
ហេតុអ្វីបានជាអតីតកីឡាអេឡិចត្រូនិកដ៏ល្បីរូបនេះដាក់រហស្សនាមថា YellOwStaR? តាមប្រភពព័ត៌មានបង្ហាញថា រហស្សនាមរបស់គេគឺYellOwStaR មានអត្ថន័យពីរដាច់ដោយឡែកពីគ្នា។ ពាក្យ StaR គឺសំដៅលើ«ការយល់ដោយខ្លួនឯង ឬ self-explanatory» ខណៈពាក្យ 'Yellow' សំដៅលើប្រភពដើមរបស់លោកដែលមានឈាមជ័រនៅអាស៊ី (Asian origins)។
តាមពិតលោក បូរ៉ា កើតថ្ងៃទី១៥ ខែកុម្ភៈ ឆ្នាំ១៩៩២ស្ថិតនៅប្រទេសបារាំងដែលគ្រួសាររបស់លោកជាជនជាតិខ្មែរដែលបានភៀសខ្លួនកាលពីអំឡុងឆ្នាំ១៩៨០។ ដូច្នេះមានន័យថា ដោយសារលោកមានប្រភពដើមពីទ្វីបអាស៊ីពោលគឺមានឈាមជ័រជាខ្មែរទើបលោកដាក់រហស្សនាមថា YellOwStaR។
តាមប្រភពព័ត៌មាន esportswikis បានបង្ហាញថា លោក គីម បូរ៉ាចេះលេងហ្គេម ឬកីឡាអេឡិចត្រូនិកតាំងពីអាយុ២ឆ្នាំនៅលើ Megadrive។ អាយុ៨ឆ្នាំលោកចាប់លេងតាមកុំព្យូទ័រ និងឈានដល់លេងវិញ្ញាសាល្បីគឺ WarCraft 3។ បន្ទាប់មកលោកក៏ក្លាយជាកីឡាករអេឡិចត្រូនិកអាជីពដែលចូលរួមប្រកួតប្រជែងលក្ខណៈអន្តរជាតិ និងមានកេរ្តិ៍ឈ្មោះល្បីល្បាញ។
ចន្លោះឆ្នាំ២០១០ ដល់២០១៦ រូបគេជាអ្នកលេងវិញ្ញាសា MOBA League of Legends ដ៏ល្បីល្បាញ និងជោគជ័យម្នាក់នៅក្នុងប្រទេសបារាំង និងវិញ្ញាសា MOBA (Multiplayer Online Battle Arena)។ ឆ្នាំ២០១៦ ក្លឹបបាល់ទាត់ Paris Saint-Germain (PSG) បានប្រកាសបន្ថែមក្រុមកីឡា eSports ដោយបានជ្រើសរើសលោក គឹម បូរ៉ា ជាប្រធាន បន្ទាប់ពីរូបលោកបានប្រកាសចូលនិវត្តន៍ពីអាជីពកីឡាករនៅថ្ងៃទី២០ ខែតុលា ឆ្នាំ២០១៦។
ជោគជ័យកាលនៅជាកីឡាករ លោកធ្លាប់ទទួលបានចំណាត់ថ្នាក់លេខ២លើលោកជាមួយក្រុម Against All Authority (ឆ្នាំ២០១១)លើវិញ្ញាសា League of Legends។ លេងឲ្យ SK Gamingលោកបានជួយឲ្យទទួលបានលេខពីរប្រចាំទ្វីបអឺរ៉ុបកាលពីឆ្នាំ២០១២។ លោកធ្លាប់បានតំណែងជើងឯកជាច្រើនលើកលើព្រឹត្តិការណ៍ប្រចាំអឺរ៉ុប LCS Eu Spring (Fnatic)។ លោកទទួលបានប្រាក់រង្វាន់ចំនួន ១៦៧ ៦០៨,១១ ដុល្លារអាមេរិកពីការប្រកួតទាំងអស់ចំនួន៥១កម្មវិធី៕