អ្វីជាអត្ថន័យនៃការបោះបាយបិណ្ឌ?

2017-09-06 03:09:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះជាថ្ងៃបិណ្ឌទី១ ហើយព្រឹកមិញក៏មានប្រជាពលរដ្ឋខ្មែរដែលជាពុទ្ធបរិស័ទជាពិសេសយុវវ័យបានទៅបោះបាយបិណ្ឌនៅតាមទីវត្តអារាមនានាក្នុងព្រះរាជាណាចក្រកម្ពុជាទៅតាមជំនឿរបស់ពួកគាត់។ ជាមួយនឹងមានការចូលរួមពីប្រជាពុទ្ធបរិស័ទក្នុងការបោះបាយបិណ្ឌនេះក៏មានដែរនូវមតិមួយចំនួនដែលថាការធ្វើដូចនេះនាំឲ្យខាតប្រយោជន៍ផ្នែកសេដ្ឋកិច្ចទៅវិញទេ ដោយហេតុថាបាយជាច្រើនត្រូវគេយកទៅបោះចោល។

យ៉ាងណាមិញ ថ្ងៃនេះ Sabay សូមលើកយកការពន្យល់របស់ព្រះភិក្ខុ វ៉ង់ សុភស្ត ដែលជាសាស្រ្តាចារ្យផ្នែកទស្សនវិជ្ជានៃពុទ្ធិកសាលកវិទ្យាព្រះសីហនុរាជមកពន្យល់ពីការបោះបាយបិណ្ឌនេះ។

ព្រះអង្គរៀបរាប់ថា ក្នុងសម័យពុទ្ធកាលមិនមានការបោះបាយបិណ្ឌនោះទេ ហើយថាការបោះបាយបិណ្ឌនេះជាជំនឿរបស់ខ្មែរយើង និងចាប់ផ្តើមមានជាផ្លូវការនៅឆ្នាំ១៩៤៨ ក្នុងរាជព្រះបាទអង្គឌួង។ ព្រះអង្គមានសង្ឃដីកាបន្តថា ការបោះបាយបិណ្ឌនេះកើតមានឡើងដោយសារពុទ្ធបរិស័ទជឿថានៅក្នុងរយៈពេល១៥ថ្ងៃនៃថ្ងៃកាន់បិណ្ឌ និងភ្ជុំបិណ្ឌ យមបាលដោះលែងពពួកប្រែតជាញាតិ ឪពុកម្តាយ ដែលបានស្លាប់ទៅក្នុងហេតុចៃដន្យណាមួយមានបាបកើតក្នុងឋាននរកឲ្យមករកកូនចៅបងប្អូន។

(ព្រះភិក្ខុ វ៉ង់ សុភស្ត កំពុងពន្យល់អំពីអត្ថន័យការបោះបាយបិណ្ឌ)

ត្រង់ចំណុចនិយាយអំពីប្រែតនេះ ព្រះអង្គពន្យល់ថាក្នុងគម្ពីព្រះពុទ្ធសាសនាបានសម្តែងអំពីកំណើតក្នុងអបាយភូមិ កន្លែងដែលមិនរីកចម្រើន ឬមិនអាចសាងនូវវប្បធម៌បាន ក្នុងនោះមានកំណើតនរក ប្រែត អសុរកាយ និងកំណើតសត្វតិរច្ឆាន។ ព្រះអង្គបន្តថាមានតែកំណើតសត្វតិរច្ឆានទេដែលគេអាចមើលឃើញ ហើយកំណើតបីទៀតមិនអាចមើលឃើញនោះទេ។

ងាយមករឿងបោះបាយបិណ្ឌឯនេះវិញព្រះអង្គពន្យល់ថាការបោះបាយបិណ្ឌពិតជាខាតប្រយោជន៍ផ្នែកសេដ្ឋកិច្ចប្រាកដមែនបើសិនជាអ្នកទៅបោះបាយបិណ្ឌនោះមិនយល់អត្ថន័យរបស់ពិធីនេះ។ ព្រះអង្គបន្តថា ការបោះបាយបិណ្ឌជាការប្រមូលពុទ្ធបរិស័ទ ពិសេសយុវជនឲ្យចូលមកវត្តដើម្បីស្តាប់ព្រះធម៌ និងការទូន្មានអប់រំរបស់ព្រះសង្ឃ ឲ្យយុវជនទាំងនេះប្រព្រឹត្តនូវអំពើល្អ និងប្រាសចាសនូវអំពើអាក្រក់នានា។

(យុវជនកំពុងស្តាប់ការទូន្មានរបស់ព្រះសង្ឃ)

ព្រះអង្គមានសង្ឃដីកាបន្ថែមៈ «ជាការពិតហើយបើកាលណាយើងយកបាយទៅបោះពាសវាលពាសកាល វាធ្វើឲ្យខាតផ្នែកសេដ្ឋកិច្ចមែន... ប៉ុន្តែបើការណ៍ខ្លះយើងមិនបោះទុន មិនចំណាយខ្លះក៏វាអត់បានប្រយោជន៍មកវិញ...អាត្មាគិតថាដូនតាយើងបង្កើតពិធីហ្នឹងឡើងដើម្បីប្រមូលមនុស្សឲ្យចូលវត្ត...ថ្វាយបង្គុំព្រះ សុំសីល ហើយស្តាប់ឱវាទព្រះសង្ឃ»។

ព្រះអង្គពន្យល់ទៀតថាៈ «ព្រះសង្ឃឲ្យឱវាទកុំឲ្យប្រព្រឹត្តនូវអបាយមុខល្បែង ស្រី ស្រា ល្បែងស៊ីសងគ្រប់ប្រភេទ...ណែនាំពីតួនាទីក្នុងនាមជាកូនប្រុសស្រី ត្រូវមានតួនាទីយ៉ាងម៉េច ជាសិស្សមានតួនាទីយ៉ាងណា...ឲ្យប្រតិបត្តិខ្លួនឲ្យត្រឹមត្រូវជាកូនកតញ្ញូ លោកអប់រំទាក់ទងនឹងសីលធម៌សង្គម»។

(យុវជនកំពុងបួងសួងមុនចេញបោះបាយបិណ្ឌ)

ទោះយ៉ាងណាព្រះអង្គពន្យល់ដែរថាបើកាលណាមនុស្សគ្រប់គ្នាយល់ដឹង និងប្រកាន់ខ្ជាប់នូវសីលធម៌ ការរស់នៅប្រកបដោយធម៌ហើយនោះមិនចាំបាច់ទៅបោះបាយបិណ្ឌក៏បាន។ «សម្រាប់ប្អូនៗដែលមិនទាន់យល់ដឹងធម៌អារ្យណា មកវត្តបានស្តាប់ធម៌ដែរ អាហ្នឹងអាត្មានិយាយដដែលៗ...តែបើយល់ហើយមិនចាំបាច់មកបោះទេយកមកប្រគេនលោក ឬក៏ដាក់ទានដល់អ្នកក្រីក្រតែម្តងទៅក៏បាន»។ ព្រះអង្គបន្ថែម៕