តិចនិកថតរូបរថយន្តឲ្យមើលទៅទាក់ភ្នែកគេគ្រប់គ្នា

2017-09-16 02:41:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រហែលជាធ្លាប់បានចូលរួមការដាក់បង្ហាញរថយន្តស្អាតៗនៅកន្លែងណាមួយ ឬប្រហែលជាអ្នកបានឃើញនូវទីសាធារណៈណាមួយ និងអ្នកមានរថយន្តខ្លួនឯងយ៉ាងស្អាត ហើយចង់ផ្ដិតយករូបភាពទាំងនេះឲ្យបានល្អ។ ការថតរូបភាពរថយន្តមិនតែងតែងាយស្រួលនោះទេ ប៉ុន្តែប្រសិនបើអ្នកធ្វើតាមការណែនាំឲ្យបានត្រឹមត្រូវ អ្នកអាចពង្រឹងគុណភាពរូបភាពអ្នកបានល្អ។ ការសាកល្បងថតម្ដងហើយម្ដងទៀត ជាវិធីដ៏ល្អសម្រាប់សិក្សាលើលក្ខខណ្ឌ និងពន្លឺផ្សេងគ្នាចំពោះទិដ្ឋភាពរថយន្ត។ ម្យ៉ាងទៀត វាមិនតម្រូវការឧបករណ៍ច្រើននោះទេ ដោយគ្រាន់តែមានកាមេរ៉ា រថយន្ត និងឆន្ទៈក្នុងការផ្ដិតយករូបភាពឲ្យបានល្អ ដែលអ្នកអាចពិនិត្យមើលគំនិតខាងក្រោមបាន៖

ការប្រើប្រាស់ឧបករណ៍

ឧបករណ៍ពីរសំខាន់សម្រាប់ថតគឺកាមេរ៉ា និងរថយន្ត។ សូម្បីតែ iPhone ក៏អាចចាប់យករូបភាពគួរឲ្យចាប់អារម្មណ៍ផងដែរ ប៉ុន្តែប្រសិនបើអ្នកចង់បានលទ្ធផលមើលទៅដូចអ្នកអាជីព អ្នកអាចថតជាមួយនឹងកាមេរ៉ា DSLR។ ម្យ៉ាងទៀតអ្នកអាចប្រើប្រាស់ Wide lens (ប្រហែល 24mm) ដែលនឹងជួយអ្នកចាប់យករូបភាពបានល្អជាមួយនឹងបរិស្ថានជុំវិញ។ មួយវិញទៀត Macro lens (ប្រហែល 100mm f/2.8) ក៏អាចជួយអ្នកពេលអ្នកចាប់យករូបភាពជិតកៀកនឹងរថយន្តផងដែរដូចជា យ៉ាន់ឡាន ឬសមាសធាតុគ្រឿងបរិក្ខារខាងក្នុង។ ពេលអ្នកកំណត់ Settings កាមេរ៉ា អ្នកគួរថតក្នុងទម្រង់ RAW ដែលផ្ដល់ឲ្យអ្នកនូវលទ្ធភាពក្នុងកែតម្រូវពេលក្រោយបានងាយស្រួល។

Tripod ជាគំនិតដ៏ល្អក្នុងការជួយផ្ដល់លំនឹងដល់កាមេរ៉ា ដែលអាចឲ្យអ្នកថតជាមួយនឹង Exposure វែង ដែលអនុញ្ញាតឲ្យពន្លឺបន្ថែមចូលពេលអ្នកថតក្រោមលក្ខខណ្ឌងងឹត។ ប្រសិនបើអ្នកថតរូបរថយន្តនៅខាងក្រៅ អ្នកគួររក្សាសភាពស្អាតតាមតែអាចទៅរួច មុនពេលអ្នកចេញពីផ្ទះ ឬអាចយកប្រដាប់សម្អាតតាមមុនពេលថត។

ពិនិត្យមើលទីតាំង

ប្រសិនបើអ្នកមានជម្រើសសម្រាប់ថតនៅទីតាំងផ្សេងគ្នា អ្នកគួរគិតគូរពីប្រភេទទីតាំងដែលសាកសមនឹងរថយន្តរបស់អ្នក (ពណ៌ ឬរូបរាង) ព្រោះវានឹងផលិតរូបភាពស៊ីគ្នាបានយ៉ាងល្អ ប៉ុន្តែអ្នកគួរព្យាយាមជៀសវាងការថតនៅចំណតរថយន្ត ព្រោះគំនូសសរនៅលើថ្នល់ ឬដីនោះមិនធ្វើឲ្យរូបភាពលេចធ្លោល្អនោះទេ។

ជ្រើសរើសមុំឲ្យបានត្រឹមត្រូវ

ប្រសិនបើអ្នកថតរូបរថយន្តផ្ទាល់ខ្លួន អ្នកអាចបម្លាស់ទីជុំវិញបានសម្រាប់ស្វែងរកនូវមុំដែលល្អបំផុត។ អ្នកថតរូបជាច្រើនបានដាក់កាមេរ៉ានៅកម្រិតទាប ស្ទើរតែមើលឡើងលើទៅរថយន្ត ដើម្បីមើលទៅគួរឲ្យចាប់អារម្មណ៍។ ការថតរូបនៅជ្រុងខាងមុខរបស់រថយន្តក៏មានលក្ខណៈធម្មតាផងដែរ។ ការថតមុំនេះអាចបង្ហាញរថយន្តបានច្រើនក្នុង Frame តែមួយ ហើយបានលាក់បាំងនូវ Reflection (មើលឃើញអ្នកថតតាមពីផ្ទាំងណាមួយ) ផងដែរ។ ការថតរូបចំហៀងរបស់រថយន្ត អាចធ្វើឲ្យផ្នែកចំហៀងដ៏ធំនោះចូលក្នុងកញ្ចក់ធំមួយដែលទំនងជា Reflect ទៅនឹងអ្នក។ អ្នកអាចប្រើប្រាស់ Photoshop សម្រាប់កែប្រែបាន ប៉ុន្តែវាមានភាពងាយស្រួល ប្រសិនបើអ្នកកំណត់វាពីដំបូង។ អ្នកគួរកំណត់ទីតាំងរថយន្ត ដូច្នេះផ្នែកល្អបំផុតនៃផ្ទៃខាងក្រោយដែលបានជ្រើសរើសស្ថិតនៅពីក្រោយវា ហើយប្រសិនបើអ្នកអាចប្រើប្រាស់រថយន្តដើម្បីលាក់បាំងនូវ Distractions ដូចជា គំនូសផ្លូវជាដើម កាន់តែល្អ។ ម្យ៉ាងទៀតពេលអ្នកចតរថយន្ត គួរបង្វែរកង់ចេញពីកាមេរ៉ា ដែលមើលទៅកាន់តែស្អាត។

ពិនិត្យមើលភាពលម្អិត

អ្នកគួរបង្ហាញនូវភាពលម្អិតជិតៗ ដោយថតនូវគ្រឿងបរិក្ខាររបស់រថយន្ត ដែលអាចពិនិត្យមើល ស្បែកកៅអីអង្គុយ ឬចង្កូត, ប្រអប់លេខ ឬអ្វីក៏ដោយដែលធ្វើឲ្យរថយន្តលេចធ្លោ។ អ្នកគួរពិនិត្យនូវផ្នែកខាងក្រៅផងដែរ ប្រហែលជាមាននូវបំពង់ស៊ីម៉ាំងភ្លោះនៅខាងក្រោយ។ ប្រសិនបើវាជារថយន្តលក្ខណៈ High-performance ប្រហែលជាមាននូវស្លាកសញ្ញា V8 មួយនៅចំហៀងដែលល្អសម្រាប់រូបភាពបង្ហាញពីថាមពលរបស់ម៉ាស៊ីនខាងក្នុង។ អ្នកក៏អាចពិនិត្យមើលស្លាកសញ្ញាផ្សេងៗផងដែរ នៅជុំវិញរថយន្ត។

រំកិលកាមេរ៉ាសម្រាប់សកម្មភាពខ្លាំងៗ (បើកបរលើផ្លូវ)

ការរំកិល ឬបង្វិល សំដៅលើការរំកិលកាមេរ៉ាទៅតាម Subject ដើម្បីរក្សាឲ្យ Subject នៅក្នុង Frame ពេលវាឆ្លងកាត់អ្នក។ វាប្រហែលជាស្តាប់ទៅធម្មតា ប៉ុន្តែវាជាបច្ចេកទេសមួយទាមទារការសាកល្បងច្រើនដែរ។ ខណៈវាមានភាពងាយស្រួលក្នុងការប្រើប្រាស់ Shutter speed លឿនខ្លាំង (លើសពី 1/1,000 sec) ដើម្បីបង្កករូបភាពរថយន្តជាលក្ខណៈ Motion ដែលជាវិធីសាស្ត្រសាមញ្ញធ្វើឲ្យរថយន្តមើលទៅដូចចតនៅកណ្តាលផ្លូវ។ អ្វីដែលអ្នកត្រូវការធ្វើដើម្បីចាប់យកសកម្មភាពគឺប្រើប្រាស់ Shutter speed យឺត ប្រហែលជា 1/180 sec ឬអាចត្រឹម 1/80 sec។ បន្ទាប់មកដូចដែលអ្នករំកិល ឬរុញជាមួយកាមេរ៉ា រថយន្តនឹងរក្សាការ Focus បានច្បាស់ល្អ ខណៈផ្ទៃខាងក្រោយនឹងព្រាល ។ រថយន្តអាចនឹងបើកឆ្លងកាត់អ្នកលឿន ហើយអ្នកគួរកំណត់កាមេរ៉ា ក្នុងការប្រើប្រាស់ Burst mode ផងដែរ ដូច្នេះអ្នកអាចមានជម្រើសរូបភាពច្រើន។

មុនរថយន្តមកដល់នៅទីតាំងដែលអ្នកថត អ្នកគួរតែអាចងាយស្រួលងាកខ្លួនតាមបណ្ដោយដំណើររបស់រថយន្តដែលឆ្លងកាត់។ ម្យ៉ាងវិញទៀត អ្នកគួរប្រើប្រាស់ Manual focus សម្រាប់ការថតរូបនេះ ចំពោះផ្នែកនៃផ្លូវដែលអ្នកដឹងថារថយន្តនឹងត្រូវឆ្លងកាត់។

ពង្រឹងគុណភាពរូបក្រោយការថត

ការថតរូបមិនប្រាកដថាបានល្អគ្រប់យ៉ាងនោះទេ ដូច្នេះពេលខ្លះអ្នកគួរប្រើប្រាស់កម្មវិធីកាត់តសម្រាប់ជួយកែប្រែតំបន់ភ្លឺ ឬងងឹត ឬកំណត់ពណ៌បន្ថែម សម្រាប់បង្កើនគុណភាពរូបភាពឲ្យកាន់តែទាក់ទាញ និងចាប់អារម្មណ៍។ អ្នកអាចប្រើប្រាស់កម្មវិធី Adobe Lightroom ឬ Photoshop ឬ កម្មវិធីផ្សេងៗ សម្រាប់កាត់តរូបភាពទាំងនោះ៕