គ្រូ Tiger សប្បាយចិត្តឈ្នះ ស៊ីម៉ាក់ ៣-០ រំពឹងរក្សាកំណត់ត្រាមិនចាញ់យូរអង្វែង
- 2017-09-18 02:22:44
- ចំនួនមតិ 0 | ចំនួនចែករំលែក 0
គ្រូ Tiger សប្បាយចិត្តឈ្នះ ស៊ីម៉ាក់ ៣-០ រំពឹងរក្សាកំណត់ត្រាមិនចាញ់យូរអង្វែង
ចន្លោះមិនឃើញ
លោក Oriol Mohedano គ្រូបង្វឹកក្លឹប Cambodian Tiger បង្ហាញការសប្បាយចិត្តចំពោះលទ្ធផលយកឈ្នះទៅលើក្រុម មជ្ឈមណ្ឌលកម្ចាត់ម៉ីនកម្ពុជា ៣-០ កាលពីម្សិលមិញក្នុងការប្រកួតលីគកំពូលសប្ដាហ៍ទី១៦ និងរំពឹងរក្សាកំណត់ត្រាល្អមិនទាន់ចាញ់នេះយូរបន្តទៀត។
អតីតគ្រូបង្វឹកភ្នំពេញក្រោនរូបនេះបានចូលដឹកនាំ Cambodian Tiger នាកំឡុងខែមេសា ឆ្នាំ២០១៧។ គិតមកដល់ពេលនេះលោកដឹកនាំបានចំនួន ៧ប្រកួតមកហើយ ក្នុងការប្រកួតលីគកំពូលកម្ពុជា ក្នុងនោះជួយឲ្យក្លឹបមួយនេះឈ្នះ ៥ និងស្មើ២ ដែលជាកំណត់ត្រាល្អមួយនៅ Tiger។
ទាក់ទងនឹងការចូលខ្លួនដឹកនាំមិនទាន់ចាញ់គ្រូបង្វឹករូបនេះបាននិយាយថា កីឡាករគ្រប់គ្នាមានការតាំងចិត្តក្នុងការលេង និងមិនទាន់រំពឹងឈានទៅរកការបញ្ចប់រដូវកាលក្នុងប្រអប់ Top 4 នៃតារាងលីគកំពូលកម្ពុជាឡើយ។ លោកថា ចំណុចសំខាន់ត្រូវគិតពីបញ្ហាចំពោះមុខ ស្វែងរកពិន្ទុពីដៃគូឲ្យបានរាល់ការប្រកួតដែលនៅសល់។
បើគិតត្រឹមសប្ដាហ៍ទី១៦ Cambodian Tiger ស្ថិតនៅលេខ ៥ ក្នុងតារាងលីគកំពូលកម្ពុជាដោយមាន ២៨ ពិន្ទុតាមពីក្រោយក្រុមលេខ ៤ បឹងកេតដែលមាន ៣០ពិន្ទុ៕