ផ្ទះនៅលើកណ្តាលផ្លូវ អស់១៤ឆ្នាំ ទីបំផុតត្រូវកម្ទេចចោលហើយ ដោយសារហេតុផលមួយ
- 2017-09-25 07:16:08
- ចំនួនមតិ 0 | ចំនួនចែករំលែក 0
ផ្ទះនៅលើកណ្តាលផ្លូវ អស់១៤ឆ្នាំ ទីបំផុតត្រូវកម្ទេចចោលហើយ ដោយសារហេតុផលមួយ
ចន្លោះមិនឃើញ
បន្ទាប់ពីឈរនៅលើកណ្ដាលផ្លូវ អស់រយៈពេលជាងមួយទសវត្សរ៍ ផ្ទះដ៏ល្បីមួយខ្នងដែលស្ថិតនៅក្នុងទីក្រុងសៀងហៃ ទីបំផុតត្រូវបានគេកម្ទេចចោលហើយ ដោយចំណាយពេលត្រឹមតែ ៩០ នាទីប៉ុណ្ណោះ កាលពីព្រឹកថ្ងៃច័ន្ទ សប្ដាហ៍មុន។
យោងតាមប្រភពព័ត៌មាន បានឲ្យដឹងថា អស់រយៈពេល ១៤ ឆ្នាំហើយ ដែលផ្ទះកម្ពស់ ៣ ជាន់មួយខ្នងនេះ បានបង្ខំឲ្យផ្លូវធំ ៤ គន្លង នៅក្នុងស្រុក Songjiang ច្របាច់ចូលទៅជាផ្លូវ ២ គន្លងវិញ នៅត្រង់ចំណុចផ្លូវឆ្លងកាត់មុខផ្ទះនោះ បណ្ដាលឲ្យកកស្ទះ និងគ្រោះថ្នាក់ចរាចរណ៍ជាច្រើន។
ផ្ទះខាងលើត្រូវបានគេដាក់រហស្សនាមឲ្យថា «Nail House» ដោយសារតែភាពចចេសរឹងរូសរបស់ម្ចាស់ផ្ទះ ដែលបានបដិសេធយ៉ាងម៉ឺងម៉ាត់ មិនព្រមទទួលសំណងពីរដ្ឋាភិបាល បណ្ដាលឲ្យអ្នកម៉ៅការសំណង់ សម្រេចចិត្តសាងសង់ផ្លូវនៅជុំវិញផ្ទះនោះតែម្ដង។
ទោះបីជាយ៉ាងណា កាលពីដើមខែកន្លងទៅនេះ អតីតម្ចាស់ផ្ទះមានឈ្មោះថា Xu Yongtao អាយុ ៨៧ ឆ្នាំ បានយល់ព្រមប្រគល់ផ្ទះនោះ បន្ទាប់ពីមានជម្លោះដ៏ជូរចត់ ដែលអូសបន្លាយអស់រយៈពេលជាច្រើនឆ្នាំ។
យ៉ាងណាមិញ លោក Xu នឹងទទួលបានប្រាក់សំណង ចំនួន ២,៣ លានយ័ន ឬប្រហែល ៣៥០ ០០០ ដុល្លារ ជាមួយនឹងផ្ទះចំនួន ៤ ល្វែងទៀតផង។ កូនប្រសាប្រុសរបស់លោក Xu បានប្រាប់ក្រុមអ្នកសារព័ត៌មានថា គ្រួសាររបស់ខ្លួនកាន់តែចាស់ហើយ និងធុញទ្រាន់នឹងការប្រយុទ្ធប្រឆាំងជាមួយរដ្ឋាភិបាលខ្លាំងណាស់៕
ចុចអាន៖