មានកូនស្រី៧នាក់មិនស្កប់ចិត្ត ទិញកូនប្រុសម្នាក់មកស្នងត្រកូល បែរជួបរឿងអាក្រក់ទៅវិញ

2017-09-18 07:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្ដីប្រពន្ធជនជាតិចិនមួយគូ ដែលមានកូនស្រីផ្ទាល់ខ្លួន រហូតដល់ទៅ ៧ នាក់ បានចំណាយលុយជាង ១៤ ០០០ ដុល្លារ ទិញយកកូនប្រុសម្នាក់ទៀត ពីជនចម្លែក ដើម្បីឲ្យកូនប្រុសនោះមកស្នងត្រកូលនៅក្នុងគ្រួសារ តែចុងក្រោយបែរជួបរឿងអាក្រក់ទៅវិញ។

យោងតាមប្រភពព័ត៌មានក្នុងស្រុកមួយ បានឲ្យដឹងថា ទារកនោះមានអាយុទើបតែជាង ១ ខែប៉ុណ្ណោះ ដោយត្រូវបានគេចាប់ពង្រត់ និងលក់ទៅឲ្យប្ដីប្រពន្ធខាងលើ ប៉ុន្តែពួកគេបានប្រាប់តុលាការថា ពួកគេមិនបានដឹងអំពីការពិតនេះទេ។

លោក និងលោកស្រី Chen បានរៀបការអស់រយៈពេលច្រើនឆ្នាំមកហើយ និងអស់សង្ឃឹមយ៉ាងខ្លាំងក្នុងការមានកូនប្រុស ដោយសារតែការគិតបែបចាស់គំរឹលពីបុរាណ ដែលចង់បានកូនប្រុសមកស្នងត្រកូល។ ពួកគេបានព្យាយាម ប៉ុន្តែទទួលបានតែកូនស្រី រហូតដល់ទៅ ៧ នាក់ ដែលមានអាយុចន្លោះពី ២ ដល់ ១៨ ឆ្នាំ។ ដូច្នេះហើយទើបពួកគេសម្រេចចិត្តទិញកូនប្រុសម្នាក់តែម្ដង។

ក្រោយមក ប្ដីប្រពន្ធខាងលើ ត្រូវអ្នកស្គាល់គ្នាណែនាំទៅគ្រួសារដែលចង់លក់កូនប្រុស។ ពួកគេក៏បានធ្វើដំណើរពីទីក្រុង Shantou ទៅកាន់ ស្រុក Fengshun ដើម្បីទៅជួបបុរសម្នាក់ឈ្មោះ Wang ដែលអះអាងថាជាឪពុករបស់ទារកខាងលើ។

លោក Chen បានប្រាប់តុលាការថា លោក Wang បានធានាជូនពួកគេថា ទារកនោះមិនមែនត្រូវគេចាប់ពង្រត់មកទេ ប៉ុន្តែលោក Wang បានស្នើសុំលុយប្ដីប្រពន្ធមួយគូនេះ ចំនួន ១៤ ០០០ ដុល្លារ ជាថ្លៃចិញ្ចឹមបីបាច់។ បន្ទាប់មក ពួកគេបានប្រគល់លុយ និងចុះហត្ថលេខាយល់ព្រមជាមួយលោក Wang មុនពេលយកកូនប្រុសនោះមកទីក្រុង Shantou វិញ។

ផ្ទុយទៅវិញ រឿងដែលមិននឹកស្មានដល់ក៏បានកើតឡើង នៅពេលដែលប្ដីប្រពន្ធមួយគូនេះ ត្រលប់ទៅកាន់ Shantou វិញ ពួកគេក៏ត្រូវប៉ូលិសឃាត់ខ្លួនតែម្ដង ដោយអះអាងថា ទារកនោះត្រូវបានគេចាប់ពង្រត់ និងជួញដូរ។

បើតាមរបាយការណ៍បានឲ្យដឹងថា ទារកនោះត្រូវបានប្ដីប្រពន្ធមួយគូផ្សេងទៀតមកពីខេត្ត Yunnan លក់ទៅឲ្យមនុស្សម្នាក់ឈ្មោះ Peng។ ក្រោយមក Peng បានលក់ទារកនោះបន្តឲ្យទៅ លោក Wang។ លោក Wang ទទួលបានផលចំណេញប្រហែល ១ ០០០ ដុល្លារ ក្នុងការលក់ទារកនោះបន្ត ឲ្យទៅប្ដីប្រពន្ធត្រកូល Chen ខាងលើ។

យ៉ាងណាមិញ តុលាការបានចោទប្រកាន់មនុស្ស ៨ នាក់ ដែលជាប់ពាក់ព័ន្ធនឹងករណីជួញដូរមនុស្ស ខណៈលោក និងលោកស្រី Chen ត្រូវបានចោទប្រកាន់ពីបទទិញកុមារ ដែលត្រូវគេចាប់ពង្រត់៕

ចុចអាន៖

ប្រភព៖ Dailymail ប្រែសម្រួល៖ សេង ឡុង