៣ ចំណុចធ្វើអ្នកគាំទ្រស្ទាក់ស្ទើរចិត្ត ពេលចង់ទិញ iPhone 8

2017-09-28 22:53:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ចង់ទិញទូរសព្ទមួយត្រូវចិត្ត មនុស្សរាល់គ្នាប្រាថ្នាឲ្យបានទាំងលក្ខណៈសម្បត្តិគ្រឿងល្អ សាកសមទៅនឹងថវិកាដែលខ្លួនបានចំណាយ។ ចំពោះ iPhone 8 ដែលទើបចេញលក់ជិត ១ សប្ដាហ៍ គួបផ្សំនឹងតម្លៃរាងខ្ពស់ដែរនោះ គេក៏សង្កេតឃើញនូវចំណុច ៣ យ៉ាងធំៗ ដែលហាក់បីធ្វើឲ្យអតិថិជនមិនពេញចិត្តជាមួយ iPhone ឆ្នាំ ២០១៧ នេះសោះ។

១.ថាមពលថ្មតូច

គួរណាស់តែឡើងស៊េរី iPhone ថ្មី ថាមពលថ្មមានទំហំធំជាងជំនាន់មុន ទើបជាអ្វីដែលអ្នកគាំទ្រចង់បាន។ ទោះបីផ្នែក Software និង Hardware លើ iPhone 8/8 Plus មានការវិវត្តក៏ពិតមែន តែទំហំថាមពលថ្ជារឿងចាំបាច់ដូចគ្នា។ តាមពិតទៅថ្មលើ iPhone ឆ្នាំ ២០១៧ មានការផ្លាស់ប្ដូរជាទម្រង់ខុសពីមុន ដើម្បីសម្របគាំទ្រជាមួយមុខងារសាកថ្មឥតខ្សែ Wireless Charging។

ខាងក្រោមបង្ហាញពីថាមពលថ្ម iPhone 8/8 Plus ដែលតិចជាង iPhone 7/7 Plus

- iPhone 8: 1821 mAh

iPhone 8 Plus: 2675 mAh
iPhone 7: 1960 mAh
iPhone 7 Plus: 2900 mAh

២.បញ្ហាសំឡេងរំខាន

ថ្មីៗនេះអ្នកប្រើ iPhone 8/8 Plus មួយចំនួនធំ កំពុងជួបបញ្ហា មានសំឡេងរំខានពេលហៅចេញនិងទទួលចូល។ ដំណោះស្រាយApple បានប្រាប់ឲ្យធ្វើការ Reset ម៉ាស៊ីនថ្មី។ ផ្ទុយទៅវិញនៅមានអ្នកប្រើមួយចំនួនតូច បន្តជួបបញ្ហានោះដដែល ហើយនេះធ្វើឲ្យអ្នកគាំទ្រមួយចំនួនស្ទាក់ស្ទើរចិត្ត នៅមិនទាន់ហ៊ានសាកល្បងចំណាយលុយខ្ទង់ពាន់ដុល្លារទិញយកមកប្រើប្រាស់នៅឡើយ។

៣.កញ្ចក់ក្រោយធ្លាក់បែកជារឿងទឹកភ្នែក

ដើម្បីគាំទ្របាននូវមុខងារសាកថ្មឥតខ្សែ Apple ត្រូវបង្ខំចិត្តប្ដូរសំបកខ្នងក្រោយពីជាតិលោហៈ មកជាកញ្ចក់វិញ។ ទទួលស្គាល់ថានៅលើត្រកូល Galaxy ជាគូប្រជែងមានជាយូរមកហើយ ប៉ុន្តែតម្លៃប្ដូរកញ្ចក់ក្រោយ iPhone 8/8+ ថ្លៃដល់ក្បែរ ១០០ ដុល្លារឯណោះសម្រាប់ទីផ្សារក្រៅស្រុក (http://kleykley.sabay.com.kh/article/973738#utm_campaign=onpage) ចុះទម្រាំទីផ្សារនៅស្រុកយើងវិញ។ នោះជារឿងដែលអ្នកប្រើត្រូវខ្វាយខ្វល់ចិត្តយ៉ាងខ្លាំង។

ប្រភព៖ idropnews ប្រែសម្រួល៖ កៅ រក្សា