នាយករដ្ឋមន្ត្រីថៃដឹងកន្លែងលាក់ខ្លួនរបស់អ្នកស្រី Yingluck ហើយ
- 2017-09-28 12:02:03
- ចំនួនមតិ 0 | ចំនួនចែករំលែក 0
នាយករដ្ឋមន្ត្រីថៃដឹងកន្លែងលាក់ខ្លួនរបស់អ្នកស្រី Yingluck ហើយ
ចន្លោះមិនឃើញ
ថ្ងៃនេះ នាយករដ្ឋមន្ត្រីថៃ Prayut Chan-o-cha បាននិយាយថា អតីតនាយករដ្ឋមន្ត្រីថៃ អ្នកស្រី Yingluck Shinawatra កំពុងស្ថិតក្នុងទីក្រុង Dubai នៃរាជាណាចក្រអារ៉ាបរួម។
លោក Prayut Chan-o-cha បានថ្លែងទៅកាន់អ្នកសារព័ត៌មានថា៖ ខ្ញុំទទួលបានព័ត៌មានមិនផ្លូវការ ពីក្រសួងការបរទេសថា អ្នកស្រី Yingluck កំពុងស្ថិតក្នុងទីក្រុង Dubai។ នាយករដ្ឋមន្ត្រីថៃរូបនេះបានបន្តទៀតថា នៅពេលនេះ ក្រសួងការបរទេស កំពុងតែតាមដានស្វែងរកពីទីតាំងពិតប្រាកដ ដែលអ្នកស្រី Yingluck កំពុងស្ថិតនៅ។ លោក Prayut ក៏បានថ្លែងទៀតថា៖ "ឥឡូវ ប៉ូលិសត្រូវតែចាត់វិធានការ និងសហការសម្របសម្រួលជាមួយក្រសួងការបរទេស និងអង្គការប៉ូលិសអន្តរជាតិ ដើម្បីដោះស្រាយរឿងនេះ"។ ទោះជាយ៉ាងណា បើតាមការរាយការណ៍របស់សារព័ត៌មានអន្តរជាតិល្បីឈ្មោះ Reuters យោងតាមប្រភពពីរាជាណាចក្រអារ៉ាប់រួមបានឲ្យដឹងថា អ្នកស្រី Yingluck បានចាកចេញពីទីក្រុង Dubai ទៅទីក្រុងឡុងដុង ចក្រភពអង់គ្លេស តាំងពីថ្ងៃទី ១១ ខែកញ្ញាមកម្ល៉េះ។
អ្នកស្រី Yingluck បានភៀសចេញពីប្រទេសថៃ តាំងពីខែមុន។ កាលពីម្សិលមិញនេះ អ្នកស្រី ត្រូវបានតុលាការជាន់ខ្ពស់ថៃកាត់ទោសឲ្យជាប់ពន្ធនាគាររយៈពេល ៥ឆ្នាំ ទាក់ទងនឹងរឿងអាស្រូវពុករលួយគម្រោងស្រូវអង្កររបស់រដ្ឋាភិបាលអ្នកស្រី អំឡុងពេលអ្នកស្រីធ្វើជានាយករដ្ឋមន្ត្រីថៃ ពីឆ្នាំ ២០១១ ដល់ឆ្នាំ ២០១៤។ គួរបញ្ជាក់ផងដែរថា រដ្ឋាភិបាលអ្នកស្រី Yingluck Shinawatra ត្រូវបានយោធាថៃធ្វើរដ្ឋប្រហារកាលពីថ្ងៃទី ២២ ឧសភា ឆ្នាំ ២០១៤ ដែលជារដ្ឋប្រហារទី ១៩ នៅក្នុងប្រទេសថៃ គិតតាំងពីឆ្នាំ ១៩៣២មក៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
