ក្រុមម៉ូតូធំសិង្ហបុរី ជិះម៉ូតូរាប់រយគីឡូ ស្វែងរកប្រាក់ជួយមន្ទីរពេទ្យស្ត្រីនៅកម្ពុជា

2017-09-29 02:43:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមម៉ូតូធំ BMW Motorcycle Club សិង្ហបុរី និងកម្ពុជា បានរួមគ្នាធ្វើកម្មវិធីសប្បុរសធម៌ ជួយមន្ទីរពេទ្យព្យាបាលរោគស្ត្រីមួយ កាលពីម្សិលមិញ។

លោកស្រី Janne Ritskes ជាសហស្ថាបនិកនៃមន្ទីរពេទ្យស្ត្រី នគរទេព(រូបខាងឆ្វេង)

ក្រោយធ្វើដំណើរអស់រយៈពេលជាច្រើនថ្ងៃ ឆ្លងកាត់ប្រទេសជាច្រើនដូចជា សិង្ហបុរី ម៉ាឡេស៊ី ហ្វីលីពីន ឡាវ និងភូមា ក្រុមម៉ូតូធំសិង្ហបុរីដែលមានលោក Pinaki Ray ជាតំណាងបានមកដល់ទឹកដីកម្ពុជាដោយសុវត្ថិភាព។

ដោយមានការស្វាគមន៍យ៉ាងកក់ក្តៅពីក្រុមម៉ូតូធំកម្ពុជា BMW Motorcycle Club(Cambodia) បានជួបជុំគ្នា នៅក្នុងបរិវេណអង្គការ តាប៊ីតា ខាំបូឌា(Tabitha Cambodia)។

លោក Pinaki Ray ជាតំណាងក្រុមម៉ូតូធំសិង្ហបុរី

លោកស្រី Janne Ritskes ជាស្ថាបនិកអង្គការ តាប៊ីតា ខាំបូឌា និងជាសហស្ថាបនិកនៃមន្ទីរពេទ្យស្ត្រី នគរទេព បានឲ្យដឹងថា លោកស្រី រំភើបចិត្តជាខ្លាំង ដែលក្រុមម៉ូតូធំ BMW Motorcycle Club បានចំណាយពេលដ៏ច្រើននិងត្រូវធ្វើដំណើររាបរយគីឡូម៉ែត្រ ក្នុងដំណើរផ្សងព្រេងស្វែងរកថវិកា មកជួយមន្ទីរពេទ្យព្យាបាលរោគស្ត្រី ដែលកំពុងស្ថិតក្នុងដំណាក់កាលសាងសង់ មិនទាន់បញ្ចប់នៅឡើយ។

ក្រុមម៉ូតូធំសិង្ហបុរី និងកម្ពុជា ជាក្រុមម៉ូតូធំដែលមានឈ្មោះជាសមាជិកអន្តរជាតិនៃ BMW Motorcycle Club លើពិភពលោក ដែលតែងតែធ្វើកម្មវិធីសប្បុរសធម៌ជារៀងរាល់ឆ្នាំ នៅតាមបណ្ដាប្រទេសកំពុងអភិវឌ្ឍនានារួមទាំងកម្ពុជា។

ថវិកាដែលបានមកពីការធ្វើកម្មវិធីសប្បុរសធម៌ ដោយជិះម៉ូតូឆ្លងប្រទេសជាច្រើន ក្រុមម៉ូតូធំ បានស្វែងរកទឹកប្រាក់សរុបប្រមាណជា ២៣ ៩៥០ ដុល្លារ ដោយ BMW Motorcycle Club(Singapore) ស្វែងរកបានចំនួន ២២ ០០០ ដុល្លារ និងក្រុមម៉ូតូធំ BMW Motorcycle Club(Cambodia) ស្វែងរកបានចំនួន ១ ៨៥០ ដុល្លារ ត្រូវបានប្រគល់ជូនលោកស្រី Janne Ritskes ជាស្ថាបនិកអង្គការ តាប៊ីតា ខាំបូឌា។

ក្រុមម៉ូតូធំ កំពុងស្ដាប់ការរៀបរាប់ពីដំណើរសាងសង់មន្ទីរពេទ្យ

មន្ទីរពេទ្យ នគរពេទ ដែលមានលោកស្រី Janne Ritskes(យ៉េន រីស្កេស) ជាសហស្ថាបនិក ជាមន្ទីរពេទ្យសម្រាប់ស្ត្រីដំបូងគេនៅកម្ពុជា ដែលពិនិត្យនិងព្យាបាលរោគមហារីកដំណាក់កាលដំបូង ដែលតែងកើតមានលើស្ត្រីជាច្រើនពាន់នាក់ និងជាមន្ទីរពេទ្យស្រ្តី ដែលផ្ដល់ការប្រឹក្សាពីបញ្ហាស្ត្រីដោយមិនគិតថ្លៃ។

បច្ចុប្បន្ន មន្ទីរពេទ្យ នគរទេព កំពុងស្ថិតក្នុងការសាងសង់បានប្រមាណជា ៦០ ភាគរយ កំពុងខ្វះខាតថវិកាសម្រាប់សាងសង់ផងដែរ។ ប្រសិនបើប្រិយមិត្តមានចំណាប់អារម្មណ៍ចង់ចូលរួមជាសប្បុរសធម៌ អាចទំនាក់ទំនងបានតាមរយៈលេខ៖ 078 559798។

អង្គការ តាប៊ីតា ខាំបូឌា ជាអង្គការក្រៅរដ្ឋាភិបាល ដែលបានបណ្ដុះបណ្ដាលជំនាញវិជ្ជាជីវៈដល់ស្ត្រីទុរគត អនាថា ស្ត្រីមានផ្ទុកមេរោគ ឲ្យមានការងារធ្វើ និងការអភិវឌ្ឍសហគមន៍ ក្នុងគម្រោងជួយសាងសង់អណ្ដូងទឹក ស្រះទឹក ឬលំនៅដ្ឋានដល់ប្រជាពលរដ្ឋក្រីក្រជួបការលំបាកនៅជនបទ។

អង្គការ តាប៊ីតា ខាំបូឌា មានទីតាំងស្ថិតនៅផ្លូវបាស្ទ័រ កែងនឹងផ្លូវ 360 សង្កាត់បឹងកេងកង ខណ្ឌចំការមន រាជធានីភ្នំពេញ៕