គួរធ្វើបែបណា ពេលអ្នកមានអារម្មណ៍ថាវង្វេងបាត់គោលដៅ?
- 2017-09-30 02:47:05
- ចំនួនមតិ 0 | ចំនួនចែករំលែក 0
គួរធ្វើបែបណា ពេលអ្នកមានអារម្មណ៍ថាវង្វេងបាត់គោលដៅ?
ចន្លោះមិនឃើញ
ស្ថានភាពមួយចំនួនដែលជួបប្រទះក្នុងជីវិត អាចធ្វើឲ្យអ្នកមានអារម្មណ៍ថាគ្មានអ្វីក្នុងខ្លួន មិនដឹងត្រូវធ្វើអ្វី មិនដឹងថាគោលដៅនៅឯណា ឬគិតថាគ្មានអ្វីសោះក្នុងខ្លួន ហើយអារម្មណ៍នេះមនុស្សជាច្រើនសុទ្ធតែធ្លាប់ជួបប្រទះ។ បើមានបញ្ហាទាំងនេះ អ្នកអាចស្វែងយល់ពីវិធី ៤យ៉ាងដើម្បីបំបាត់អារម្មណ៍មិនល្អទាំងនោះ ហើយស្វែងរកភាពភ្លឺថ្លាមកវិញ៖
១.ជួបជុំមិត្តភ័ក្ដិ និងគ្រួសារ៖ ជួនកាល ពេលអ្នកវង្វេងបាត់គោលដៅ ចង់ដកខ្លួនចេញពីពិភពលោក ប៉ុន្តែនៅក្នុងភាពស្ងៀមស្ងាត់មានសេចក្ដីឈឺចាប់ ហើយវិធីល្អបំផុតក្នុងការស្វែងរកខ្លួនឯងត្រលប់មកវិញ និងអាចឈរជើងម្ដងទៀត គឺការទទួលគំនិតពីអ្នកដទៃ។ ចូរទៅអង្គុយជាមួយមិត្តដែលជឿទុកចិត្ដ ឬក៏សមាជិកគ្រួសារ ហើយប្រាប់ពួកគេពីអារម្មណ៍របស់អ្នក។ ការនិយាយវាចេញមកអស់ អ្នកនឹងផ្ដើមរកឃើញដំណោះស្រាយ។
២.ធ្វើការងារស្ម័គ្រចិត្ត៖ ការមានអារម្មណ៍វង្វេងខ្លួនឯង ឬអស់សង្ឃឹម ច្រើនកើតឡើងដោយសារ អ្នកផ្ដោតទៅលើរឿងផ្ទាល់ខ្លួន និងបញ្ហាសំខាន់ក្នុងជីវិតច្រើនពេក។ នោះជាពេលដ៏ឥតខ្ចោះក្នុងការបង្វែរខ្លួនមកជួយអ្នកដទៃវិញ។ ចូរចំណាយពេលវេលានិងថាមពលអ្នកទៅធ្វើអំពើល្អ និងជួយអ្នកដទៃដែលកំពុងត្រូវការ។ អ្នកនឹងឃើញក្រុមមនុស្សសុទិដ្ឋិនិយមជាច្រើននៅកន្លែងការងារស្ម័គ្រចិត្ដ។ បេះដូងពួកគេវិជ្ជមាន និងមានព្រលឹងព្រលះដែលនឹងផ្ដល់ឱ្យអ្នកនូវក្ដីសង្ឃឹមហើយក្រុម សង្គមមនុស្សថ្មីនឹងបំផុសចិត្តគំនិតអ្នកឡើងវិញ។ ការចូលរួមនោះនឹងដាស់បំភ្លឺភ្លើងសុបិនអ្នកឱ្យឆាបឆេះឡើងវិញ។
៣. អាន៖ មនុស្សទូទៅចំណាយពេលច្រើនពេកទៅលើបណ្ដាញសង្គមអ៊ីនធឺណិត សម្រាប់ស្វែងរកចម្លើយជីវិត។ ផ្ទុយទៅវិញ ចូរទុកទូរសព្ទចុះ ហើយអានសៀវភៅ។ ការអានគឺជាផ្លូវដ៏ល្អបំផុតក្នុងការទទួលបានភាពភ្លឺថា្លត្រចះត្រចង់។ ការអានមានអានុភាពបំផុសគំនិតអ្នកអំពីការរស់នៅក្នុងជីវិតដែលមានគុណភាពល្អជាងនេះ។ វាអាចផ្ដល់ឱ្យអ្នកនូវមហិច្ឆតានិងការប៉ងអ្វីដែលល្អប្រសើរ។ ដូចនេះ ចូររើសយកសៀវភៅអភិវឌ្ឍខ្លួន ឬសៀវភៅចិត្តវិញ្ញាណ មួយចំនួន ហើយចាប់ផ្ដើមអាន!
៤. ប្រមូលអារម្មណ៍ធ្វើកិច្ចការជាប្រចាំ៖ អ្នកអាចផ្លាស់ប្ដូរអារម្មណ៍អ្នក ដោយការប្រមូលអារម្មណ៍ធ្វើការជាប្រចាំ។ ចូរព្យាយាមបំពេញគោលដៅតូចៗមួយចំនួនជារៀងរាល់ថ្ងៃ។ គោលដៅទាំងនោះមិនចាំបាច់ត្រូវនឹងគោលបំណងក្នុងជីវិតអ្នកទេ ព្រោះប្រហែលអ្នកមិនទាន់គិតឃើញគ្រប់យ៉ាងចេញនៅឡើយ។ ប៉ុន្តែការធ្វើសកម្មភាពនេះធ្វើឱ្យអ្នកផ្ដើមរកឃើញអ្វីដែលមានអត្ថន័យក្នុងជីវិត។ វាជាជំហានទៅមុខដែលអ្នករកឃើញទំនុកចិត្ត ហើយផ្លូវនានា នឹងផុសចេញបន្តបន្ទាប់នៅមុខអ្នក៕