អាណាចក្របៃតង ថា ការឈ្នះសម្ព័ន្ធមូស្លីមជាជោគជ័យដ៏មហាសាល

2017-10-09 02:17:06
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ម៉ុក ចាន់កុរណា ប្រធានក្លឹបអាណាចក្របៃតងបានបង្ហាញចំណាប់អារម្មណ៍ថា ការយកឈ្នះទៅលើក្រុមសម្ព័ន្ធមូស្លីមកម្ពុជា ២-១ នៅវគ្គផ្ដាច់ព្រ័ត្រកាលពីម្សិលមិញនេះជាជោគជ័យដ៏មហាសាល ដែលការប្រកួតធ្វើឡើងនៅពហុកីឡដ្ឋានជាតិ ពានរង្វាន់សម្ដេចអគ្គមហាពញាចក្រី ហេង សំរិន។

ម៉ុក ចាន់កុរណា

ប្រធានក្លឹបរូបនេះបានឲ្យដឹងថា វាជារឿងនឹកស្មានមិនដល់មួយដែលអាចយកឈ្នះក្រុមខ្លាំង សម្ព័ន្ធមូស្លីមត្រឹម ៩០នាទី ពីព្រោះលោកគិតថា ដៃគូមួយនេះមានប្រព័ន្ធលេងល្អ ហើយថែមទាំងមានបទពិសោធលេងទីលានធំច្រើនទៀតផង។ លោកគិតថា ការប្រកួតវគ្គផ្ដាច់ព្រ័ត្រម្សិលមិញនេះ នឹងអាចចូលដល់វគ្គបន្ថែមម៉ោង ពីព្រោះកម្រិតក្រុមទាំងពីរប្រហាក់ប្រហែលគ្នា។

សម្រាប់គោលដៅបន្ទាប់របស់អាណាចក្របៃតងលោកបញ្ជាក់ថា ក្លឹបគឺផ្សារភ្ជាប់ជាមួយស្មៅបៃតងជានិច្ច ពោលគឺបណ្ដុះយុវជនកម្ពុជាមិនឲ្យធ្វើអ្វីប៉ះពាល់ដល់សង្គមជាតិ ដោយឲ្យពួកគេងាកមកលេងកីឡាជារឿងសំខាន់។ ចំណែកគម្រោងដែលពានសម្ដេចនេះចង់បង្កើតឡើងនាឆ្នាំក្រោយៗ ទៀតនោះលោកមិនទាន់ច្បាស់ ១០០ % បានចូលរួមឬយ៉ាងណានោះទេ ដោយសារនៅរង់ចាំពិចារណាជុំវិញការឧបត្ថម្ភជាមុនសិន។

ការប្រកួតបាល់ទាត់ដណ្ដើមពានរង្វាន់ សម្ដេចអគ្គមហាពញាចក្រី ហេង សំរិន រដូវកាលទី១ មាន ១៨ក្រុមចូលរួម ។ ជើងឯកបានទៅក្រុមអាណាចក្របៃតង ទទួលបានប្រាក់រង្វាន់ ២៥លានរៀល, ជើងឯករងក្រុមសម្ព័ន្ធយុវជនមុស្លីមកម្ពុជា ទទួលបានប្រាក់រង្វាន់ ២០លានរៀល និងក្រុមលេខ៣ បានទៅក្រុមពិស្ណុការ ទទួលបានប្រាក់រង្វាន់ ១៥លានរៀល ។ អ្នករកគ្រាប់បាល់បានច្រើនជាងគេទទួលបានពានមួយ និងថវិកា ៨០ម៉ឺនរៀល អ្នកចាំទីល្អទទួល ៨០ម៉ឺនរៀល ពានមួយ និងចុងក្រោយក្រុម Fair Play ទទួលបានពានមួយ និងទឹកប្រាក់ ៤លានរៀលផងដែរ៕