ថៃ បន្ថែមថ្ងៃកាន់ទុក្ខ អតីតស្តេចថៃ ភូមិបុល អាឌុលយ៉ាដេត កាន់តែយូរ
- 2017-10-11 07:49:14
- ចំនួនមតិ 0 | ចំនួនចែករំលែក 0
ថៃ បន្ថែមថ្ងៃកាន់ទុក្ខ អតីតស្តេចថៃ ភូមិបុល អាឌុលយ៉ាដេត កាន់តែយូរ
ចន្លោះមិនឃើញ
យោងតាមសេចក្ដីប្រកាសមួយ ពីការិយាល័យនាយករដ្ឋមន្ត្រី កាលពីម្សិលមិញនេះ បានឲ្យដឹងថា ប្រទេសថៃបានបន្ថែមថ្ងៃកាន់ទុក្ខអតីតស្ដេចថៃ ភូមិបុល អាឌុលយ៉ាដេត ចំនួន ២ថ្ងៃទៀត រហូតដល់ថ្ងៃទី២៩ ខែតុលា ឆ្នាំ២០១៧។
ព្រះរាជពិធីបុណ្យសពរបស់អតីតព្រះមហាក្សត្រអង្គនេះ ត្រូវបានគ្រោងធ្វើនៅថ្ងៃទី២២ ដល់ ២៩ ខែតុលា ឆ្នាំ២០១៧ ដូច្នេះគណៈរដ្ឋមន្ត្រី បានសម្រេចបន្ថែមរយៈពេលកាន់ទុក្ខតែម្ដង។ កាលបរិច្ឆេទនៃការកាន់ទុក្ខជាផ្លូវការ ត្រូវបានផ្លាស់ប្ដូរចាប់ពីថ្ងៃទី១៣ ដល់ ២៧ ខែតុលា ទៅ ថ្ងៃទី១៣ ដល់ ២៩ ខែតុលា ឆ្នាំ២០១៧ វិញ សរុបចំនួន ១៧ថ្ងៃ។
ទង់ជាតិថៃ នឹងត្រូវបង្ហូតទម្លាក់ត្រឹមពាក់កណ្ដាល ហើយអ្នកធ្វើការរដ្ឋនឹងស្លៀកពាក់ខ្មៅ រហូតដល់ចប់ពិធីកាន់ទុក្ខ។ ស្លាកសញ្ញា និងបដាកាន់ទុក្ខទាំងអស់ នឹងត្រូវដកចេញ នៅយប់ថ្ងៃទី២៩ ខែតុលា ឆ្នាំ២០១៧។ សាធារណជនអាចនឹងបន្តការស្លៀកសំលៀកបំពាក់ពណ៌វិញ នៅថ្ងៃទី៣០ ខែតុលា ឆ្នាំ២០១៧។
ធនាគារថៃ Bank of Thailand ក៏បានប្រកាសនៅសប្ដាហ៍នេះផងដែរថា ធនាគារទាំងអស់នឹងត្រូវបិទទ្វារ នៅថ្ងៃទី២៦ ខែតុលា ឆ្នាំ២០១៧ ដែលជាថ្ងៃថ្វាយព្រះភ្លើងអតីតព្រះមហាក្សត្រថៃ ភូមិបុល អាឌុលយ៉ាដេត។ ជាមួយគ្នានេះដែរ ថ្ងៃទី២៦ ខែតុលា ក៏ត្រូវបានប្រកាសជាថ្ងៃបុណ្យជាតិផងដែរ។
គួររំលឹកឲ្យដឹងថា ព្រះមហាក្សត្រថៃ ភូមិបុល អាឌុលយ៉ាដេត បានចូលទិវង្គត ក្នុងព្រះជន្ម ៨៨ ព្រះវស្សា នៅមន្ទីរពេទ្យសិរីរាជ្យ នៃទីក្រុងបាងកក នៅវេលាម៉ោង ១៥:៥២នាទីរសៀល ថ្ងៃទី១៣ ខែតុលា ឆ្នាំ២០១៦ ក្រោយពីបានគ្រងរាជសម្បត្តិអស់រយៈពេល ៧០ឆ្នាំ។ សាកសពព្រះអង្គ ត្រូវបានតម្កល់ទុករយៈពេល ១ឆ្នាំមកហើយ៕
ចុចអាន៖