មូល​ហេតុ​ជុំ​វិញ​ការ​ហាម​ឃាត់​មិន​ឲ្យ​ដាក់​បញ្ចាំង​រឿង "Kingsman 2” នៅ​កម្ពុជា

  • 2017-10-13 03:03:46
  • ចំនួនមតិ

ចន្លោះមិនឃើញ

ប្រទេស​កម្ពុជា​បាន​ហាម​ឃាត់​ការ​ដាក់​បញ្ចាំង​រឿង​ហូលីវូដ​ "Kingsman: The Golden Circle” ដោយ​សារ​តែ​មាន​ការ​បង្ហាញ​​លក្ខណៈ​អវិជ្ជមាន​ពី​ប្រទេស​កម្ពុជា​ទៅ​កាន់​ពិភពលោក។

ការ​សម្រេច​ចិត្ត​នេះ​បាន​ធ្វើ​ឡើង​កាល​ពី​សប្ដាហ៍​មុន ដែល​កំណត់​ថា​សាច់​រឿង​ដ៏​ល្បី​មួយ​នេះ​មិន​សម​រម្យ​សម្រាប់​ដាក់​បញ្ចាំង​ឲ្យ​ទស្សនិកជន​ជន​ក្នុង​ស្រុក​មើល​នោះ​ទេ។

អាជ្ញាធរ​បាន​និយាយ​ថា៖ "ភាព​យន្ត​នេះ​ប្រើ​ប្រាស់​ទឹក​ដី​កម្ពុជា​ជា​កន្លែង​ដែល​ពួក​ភេរវករ​ស្នាក់​នៅ និង​ធ្វើ​ឲ្យ​ពិភពលោក​មាន​បញ្ហា​"។

ស្រប​ពេល​នោះ​ដែរ ក្រុម​ហ៊ុន​ចែក​ចាយ​សិទ្ធិ​ដាក់​បញ្ចាំង​ភាព​យន្ត​ Westec Media បាន​ឆ្លើយ​តប​ថា​ ការ​សម្រេច​ចិត្ត​នេះ​គឺ "ពិត​ជា​គិត​ដូច​កូន​ក្មេង" នេះ​បើ​តាម​ការ​ផ្តល់បទសម្ភាសឲ្យ​ Phnom Penh Post។

ចាប់​តាំង​ពី​ភាព​យន្ត​នេះ​បាន​ដាក់​បញ្ចាំង​រយៈ​ពេល​ជិត​មួយ​ខែ​កន្លង​មក​ វគ្គ​ថ្មី​របស់​រឿង "Kingsman: The Secret Service” រក​ចំណូល​បាន​​ជាង ២៦១លាន​ដុល្លារ​ទៅ​ហើយ។

ភាព​យន្ត​នេះ​ ជា​ប្រភេទ​ភាព​យន្ត​វាយ​តប់​បាញ់​ប្រហារ​ និង​កំប្លែង​ និយាយ​អំពី​ភ្នាក់​ងារ​សម្ងាត់ទាំង​នៅ​អាមេរិក​ និង​ចក្រភព​អង់គ្លេស​ ពួត​ដៃ​គ្នា​ដើម្បី​ស្វែង​រក​បន្ទាយ​អាថ៌កំបាំង​របស់​ស្ដេច​គ្រឿង​ញៀន​ម្នាក់។

ទីបំផុតពួក​គេ​ក៏​បាន​រក​ឃើញ​បន្ទាយ​នោះ​ គឺ​ជា​ប្រាសាទ​មួយ​ដែល​ហ៊ុំ​ព័ទ្ធ​ដោយ​ព្រៃ​ឈើ​នៅ​ក្នុង​ប្រទេស​កម្ពុជា​ហើយ​ក៏​មាន​ឈុត​ឆាក​បាញ់​ប្រហារ​ និង​វាយ​តប់​នៅ​ទី​នោះ។

លោក ប៉ុក​ បូរក្ស ប្រធានស្តីទី នៃនាយកដ្ឋានសិល្ប:ភាពយន្ត និងផ្សព្វផ្សាយវប្បធម៌ នៃក្រសួង​វប្បធម៌​ និង​វិចិត្រ​សិល្បៈ​បាន​ប្រាប់ Phnom Penh Post ថា៖ "បន្ទាប់​ពី​យើង​បាន​វិភាគ​រឿង​នេះ​ហើយ យើង​ឃើញ​ថា​មាន​បញ្ហា​ខ្លះៗ"។

​លោក​​បាន​កំណត់​យក​ហេតុ​ការណ៍​កើត​ឡើង​នៅ​ក្នុង​សាច់​រឿង ដែល​យក​ប្រទេស​កម្ពុជា​ជា​កន្លែង​ស្នាក់​នៅ​ (បន្ទាយ)​របស់​តួ​ចិត្ត​អាក្រក់​ និង ធ្វើ​ឲ្យ​ពិភពលោក​មាន​បញ្ហា គឺ​ជា​ចំណុច​ដែល​ព្រួយ​បារម្ភ​ជាង​គេ។

ទោះ​បី​ជា​សាច់​រឿង​នេះ​មិន​បាន​ប្រាប់​ពី​ឈ្មោះ​របស់​ប្រាសាទ​ក៏​ដោយ ក៏​លោក​ ប៉ុក​ បូរក្ស បាន​និយាយ​ថា​ វា​តំណាង​ឲ្យ​ប្រាសាទ​ តា​ព្រហ្ម ជា​ប្រាសាទ​ប្រវត្តិសាស្ត្រ​មួយ​ដែល​ជាប់​ឈ្មោះ​ជា​បេតិកភណ្ឌ​ពិភពលោក​របស់ UNESCO ក្នុង​ឆ្នាំ ១៩៩២។

នេះ​មិន​មែន​ជា​លើក​ទី​១​ទេ ដែល​កម្ពុជា​ហាម​ឃាត់​មិន​ឲ្យ​រឿង​ហូលីវូដ​យក​មក​ដាក់​បញ្ចាំង​នៅ​កម្ពុជា ដែល​មានរឿង​មួយ​ចំនួន​ដូច​ជា "Fifty Shades of Grey”, "No Escape” និងថ្មីៗ​នេះរឿង​ "Jigsaw" សុទ្ធ​តែ​មាន​បញ្ហា​ស្រដៀង​គ្នា​ទាក់​ទង​ទៅ​នឹង​អំពើ​ហិង្សា​ ឫឈុត​ឆាក​ស្រើប​ស្រាល​ខ្លាំង​ពេក៕

អាន​អត្ថបទ៖


ប្រភព៖ BBC ប្រែ​សម្រួល៖ ធារ៉ូ