Icardi ដាក់គោលដៅរកឲ្យបាន ១០០ គ្រាប់ឲ្យ Inter

2017-10-16 07:13:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធជម្រើសជាតិអាហ្សង់ទីន Mauro Icardi ប្តេជ្ញារកឲ្យបាន ១០០ គ្រាប់សម្រាប់ក្លឹប Inter Milan បន្ទាប់ពីធ្វើបាន hat-trick កាលពីយប់មិញជូយក្លឹបឈ្នះ AC Milan ៣-២ ក្នុងជំនួបសប្ដាហ៍ទី៨ នៃក្របខ័ណ្ឌ Italy Serie A ។

បុរសសញ្ជាតិអ៊ីតាលី Giuseppe Meazza ធ្លាប់រកបាន ២៤៣ គ្រាប់ក្នុងចន្លោះពេលលេងឲ្យ Inter ឆ្នាំ១៩២៧-១៩៤០ ហើយក៏បានក្លាយជាវីរបុរសនៅទីនោះ។ ប៉ុន្តែ Mauro Icardi រកបាន ៨៤ គ្រាប់ ក្នុងការបង្ហាញខ្លួនចំនួន ១៣៣ លើក ដែលចាប់លេងជាមួយម្ចាស់ជើងឯក Serie A ១៨ ជំនាន់មួយនេះនាឆ្នាំ២០១៣មក។

Mauro Icardi បាននិយាយថា ៖«ខ្ញុំចង់រកឲ្យបាន ១០០គ្រាប់ឲ្យ Inter ។ បើទោះជាការរកគ្រាប់បាល់ឲ្យបានច្រើនជាងគេក្នុងក្លឹបគឺជារឿងពិបាកក្ដី។ ខ្ញុំសប្បាយចិត្តដែលមានឈ្មោះជាប់ក្នុងប្រអប់ Top 10 ក្នុងតារាងអ្នករកគ្រាប់បាល់បានច្រើនជាងគេជូន Inter។ ប៉ុន្តែវាស្ថិតនៅឆ្ងាយពីកំពូល។ សម្រាប់គោលបំណងរបស់ខ្ញុំគឺប្រឹងប្រែងរកគ្រាប់បាល់បន្ថែមទៀតជូនក្លឹបមួយនេះ»។

បើគិតត្រឹមសប្ដាហ៍ទី៨ ក្នុងក្របខ័ណ្ឌកំពូលរបស់អ៊ីតាលីខ្សែប្រយុទ្ធ Icardi ស្ថិតនៅលេខ ៣ ក្នុងតារាងអ្នករកគ្រាប់បាល់បានច្រើនជាងគេ ដោយរកបាន ៩ គ្រាប់ ខណៈ Dybala របស់ Juventus រកបាន ១០ គ្រាប់ និង Immobile របស់ Lazio រកបាន ១១ គ្រាប់ស្ថិតនៅកំពូលតារាង៕