រ៉ូលីន ប្រាប់តិចនិកប្ដូរសំឡេងងាយៗ
- 2017-10-20 03:42:10
- ចំនួនមតិ 0 | ចំនួនចែករំលែក 0
រ៉ូលីន ប្រាប់តិចនិកប្ដូរសំឡេងងាយៗ
ចន្លោះមិនឃើញ
ទស្សនិកជនបានឃើញពីទេពកោសល្យរបស់ រ៉ូលីន ទាំងការសម្ដែង និងកំប្លែងធ្វើឱ្យទស្សនិកជនសើចស្ទើរគ្រប់ពេល តែអ្វីដែលគួរឱ្យកត់សម្គាល់ជាងនេះទៅទៀតនោះ គឺទេពកោសល្យប្ដូរសំឡេងរបស់លោក ជាប្រុសក៏បាន ជាស្រីក៏បាន ព្រមទាំងអាចច្រៀងជាសំឡេងស្រីបានយ៉ាងពីរោះ។
ដោយមានឪពុកជាអ្នកច្រៀងចម្រៀងកូរ៉ាល់ស្រាប់ រូលីន ត្រូវបានឪពុកបង្ហាត់ពត់សំឡេងតាំងពីក្មេង ហើយដោយក្ដីព្យាយាម និងមានជំនឿលើខ្លួនឯងថា ខ្លួនពិតជាអាចធ្វើបាន លោកក៏ពត់សំឡេងបានដូចបំណង។ តារាកំប្លែងរូបនេះបានប្រាប់ Sabay ពីវិធីសាស្ត្រប្ដូរសំឡេងថា ការហ្វឹកហាត់ប្ដូរសំឡេងមិនមែនជារឿងងាយទេ តែក៏មិនអាចថាពិបាករហូតហ្វឹកហាត់មិនបានដែរ តែវាត្រូវការការព្យាយាម និងផ្ដោតអារម្មណ៍ទៅលើសំឡេងដែលខ្លួនចង់បាន ហើយព្យាយាមពត់សំឡេង។
៤ចំណុចវិធីសាស្ត្រហ្វឹកហាត់ប្ដូរសំឡេងពីប្រុសទៅស្រី ពីស្រីទៅប្រុស របស់រ៉ូលីន៖
ជំហានដំបូងត្រូវប្រមូលអារម្មណ៍ឱ្យមូល
វិញ្ញាណនិងអារម្មណ៍ត្រូវផ្ដោតទាំងស្រុងទៅលើសំឡេងដែលចង់បាន
ចាប់ផ្ដើមហ្វឹកហាត់និយាយដោយព្យាយាមពត់សំឡេងឱ្យទៅរកសំឡេងដែលចង់បាន
ហ្វឹកហាត់រាល់ថ្ងៃ
លោកបញ្ជាក់បន្ថែមថា វាអាចនិយាយបានថា លោកចេះប្រើសំឡេងនេះ ជាទេពកោសល្យដែលទេវតាប្រទានឱ្យដែរ ព្រោះលោកគ្រាន់តែហ្វឹកហាត់តាមវិធីបែបនេះរាល់ថ្ងៃគឺអាចប្ដូរសំឡេងបានតាមតែខ្លួនចង់បាន។
“វាទាក់ទងនិងអារម្មណ៍ វិញ្ញាណ និងសំឡេង បើយើងផ្ដោតថាចង់បានអី គឺវាបានហ្នឹង អ្វីក៏ដោយយើងសុទ្ធតែអាចហ្វឹកហាត់បានឱ្យតែយើងព្យាយាម ពីតូចបងចូលចិត្តហ្វឹកហាត់នៅមុខកញ្ចក់ លេងចឹងទៅណា បានអាចប្រើសំឡេងប្ដូរបាន”។
តារាសម្ដែងរូបនេះត្រូវបានគេស្គាល់ដំបូងតាមរយៈកម្មវិធី Miss photo city ហើយកាន់តែមានប្រជាប្រិយភាពខ្លាំងឡើងបន្ទាប់ពីបានចូលក្នុងកម្មវិធីទូរទស្សន៍មួយចំនួន និងបានសម្ដែងរឿង និងលេងកំប្លែង ជាពិសេសទេពកោសល្យការប្រើសំឡេងរបស់លោក។