កោះឯកជនដាក់លក់តម្លៃ ១២៥លានដុល្លារ ដឹងថាទេសភាពអស្ចារ្យយ៉ាងណាទេ?

2017-10-20 03:44:47
ចំនួនមតិ 0 | ចំនួនចែករំលែក 0

ចន្លោះមិនឃើញ

កោះឯកជនមួយដែលមានទំហំប្រមាណជាង ១៩ហិកតារ ស្ថិតនៅតាមបណ្ដោយឆ្នេរនៃកោះ Long Island រដ្ឋញីវយ៉ក សហរដ្ឋអាមេរិក ត្រូវបានដាក់លក់ក្នុងតម្លៃមហាសាល ១២៥លានដុល្លារ ដែលជាការដាក់លក់បន្តលើកទី៣ ក្នុងប្រវត្តិសាស្ត្រ។ ទោះបីតម្លៃថ្លៃមែនពិត តែបើមើលពីប្រវត្តិសាស្ត្រ និងសំណង់នៅលើកោះនេះ ពិតជាមិនធម្មតាទេ។

ប្រវត្តិដំបូងតាំងពីជិត ១០០ឆ្នាំមុន ពោលគឺនៅឆ្នាំ១៩១៩ លោក Junius Morgan ដែលជាចៅរបស់លោក J.P. Morgan បានសាងសង់វិមានដ៏ធំមួយនៅលើកោះនេះ។ បន្ទាប់មក នៅទសវត្សឆ្នាំ១៩៤០ លោក Morgan បានអនុញ្ញាតឲ្យមិត្តភក្តិដែលជាអ្នកមានទ្រព្យដូចគ្នា សង់ផ្ទះផ្ទាល់ខ្លួនច្រើនខ្នងទៀត ដើម្បីទុកសម្រាកលំហែ។

លោក Junius Morgan និងជីតា J.P. Morgan

លោក Morgan បានស្លាប់ក្នុងឆ្នាំ១៩៦០ ប៉ុន្តែទ្រព្យសម្បត្តិទាំងនោះ បានធ្លាក់ទៅលើប្រពន្ធជាអ្នកកាន់កាប់បន្ត។ ក្រោយអតីតប្រធានាធិបតីអាមេរិក John F. Kennedy ត្រូវគេលួចធ្វើឃាតនៅឆ្នាំ១៩៦៣ ប្រពន្ធប្រធានាធិបតីរូបនោះឈ្មោះ Jackie Kennedy បានទៅជួលផ្ទះមួយស្នាក់លំហែរដូវក្ដៅ ខណៈបងថ្លៃ Robert F. Kennedy ជួលកន្លែងស្នាក់នៅជិតនោះដែរ។

ក្រោយមក នៅទស្សវត្តឆ្នាំ១៩៧០ វិមានដ៏ស្កឹមស្កៃ និងដីជាង ៧ហិកតារ ត្រូវបានលក់ឲ្យលោក John Samuels ដែលល្បីថាជាអ្នកមានចិត្តសប្បុរសម្នាក់នៅក្រុងញីវយ៉ក។ ប៉ុន្តែនៅទស្សវត្តឆ្នាំ១៩៩០ ជំនួញរបស់លោកបានដួល និងប្រកាសក្ស័យធន ហើយចាប់ផ្ដើមលក់កោះនៅឆ្នាំ១៩៩៣ ក្នុងតម្លៃដេញថ្លៃទាបបំផុតចាប់ពី ៥,៧លានដុល្លារ។ អ្នកជំនួញអចលនទ្រព្យ Margo Walker បានទិញយកកោះនោះបន្តក្នុងពេលដេញថ្លៃ ប៉ុន្តែមិនបង្ហាញតម្លៃទេ។

បន្ទាប់ពីកាន់កាប់អស់ច្រើនឆ្នាំ អ្នកជំនួញរូបនេះ បានប្រកាសដាក់លក់បន្តក្នុងតម្លៃប្រមាណ ១២៥លានដុល្លារ។ ទោះបីមានប្រវត្តិជិត ១០០ឆ្នាំក្ដីសំណង់ទាំងឡាយ នៅតែមានភាពល្អប្រណីត ជាពិសេសគឺវិមានដ៏ស្កឹមស្កៃ និងគ្រឿងតុបតែងលម្អបែបបុរាណជាច្រើន៕