ភ្ញាក់ផ្អើល! Katy Perry ចូលរួមពិធីរៀបការរបស់អ្នកគាំទ្ររបស់ខ្លួនស្ងាត់ៗ

2017-10-24 03:20:53
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងដ៏ល្បីរបស់អាមេរិក Katy Perry បានបង្កការភ្ញាក់ផ្អើលទៅអ្នកគាំទ្ររបស់ខ្លូន ពេលបានចូលរួមពិធីរៀបអាពាហ៍ពិពាហ៍របស់គូស្នេហ៍ជនជាតិអាមេរិកមួយគូកាលពីចុងសប្តាហ៍។

Katy និងគូស្វាមីភរិយាដែលជាអ្នកគាំទ្ររបស់ខ្លូន

ម្ចាស់បទ "Roar” រូបនេះបានធ្វើការប្រគំតន្ត្រីក្នុងទីក្រុងមួយនៅប៉ែកបស្ចិមប្រទេស ខណៈនោះនាង និងជំនួយការ ក៏ធ្វើរឿងដ៏ភ្ញាក់ផ្អើលមួយទៅកាន់គូស្វាមីភរិយាថ្មីឈ្មោះ Hayley Rosenblum និងBlonie Dudney នៅសណ្ឋាគារ Four Seasons Hotel កាលពីយប់ថ្ងៃសៅរ៍។

Amy Prada ដែលជាភ្ញៀវម្នាក់ចូលរួមពិធីអាពាហ៍ពិពាហ៍នោះបាននិយាយថា៖ "តាមពិតទៅ Katy បានសុំកូនក្រមុំកូនកំលោះ ថានាងអាចចូលរួមកម្មវិធីរបស់ពួកគេបាន ឫក៏អត់? ហើយពួកគេនិយាយថាប្រាកដជាបាន"។

នាងបន្ថែមទៀតថា៖ "គ្រប់គ្នាពិតជាមានការភ្ញាក់ផ្អើល និងរំភើបជាខ្លាំង"។ Amy ចាំថា Katy បានចំណាយពេលប្រហែល ១៥នាទី ក្នុងកម្មវិធី ដោយបានរាំជាមួយនឹងគូស្នេហ៍ថ្មីថ្មោង និងថតរូបជាមួយភ្ញៀវផ្សេងៗទៀត។

Ray Prop អ្នកថតរូបឲ្យកម្មវិធីអាពាហ៍ពិពាហ៍នោះបាននិយាយប្រាប់ទស្សនាវដ្តី St Louis ថា ការភ្ញាក់ផ្អើលនោះកើតឡើងពេលយប់ជ្រៅ ខណៈលោករៀបខ្លួននឹងចាកចេញទៅហើយ។

គួរបញ្ជាក់ថា Katy បានមកទីក្រុងនេះ ដើម្បីប្រគំតន្ត្រីទេសចរណ៍ “Witness” របស់នាង។ ជាមួយគ្នានោះ តារាស្រីរូបនេះ ក៏បានបញ្ជាក់ពីរឿងចូលរួមពិធីរៀបការ អំឡុងពេលសម្តែង នៅថ្ងៃអាទិត្យផងដែរ នេះបើតាមអត្ថបទដែលបង្ហោះនៅលើបណ្ដាញសង្គម៕

ចុចអាន៖

ប្រភព៖ Asiaone ប្រែសម្រួលៈ អន សុភក្រ្តា