សំបុត្ររបស់ បារ៉ាក់ អូបាម៉ា សរសេរផ្ញើទៅមិត្តស្រី កាលរៀនមហាវិទ្យាល័យ

2017-10-25 07:25:20
ចំនួនមតិ 0 | ចំនួនចែករំលែក 0

ចន្លោះមិនឃើញ

សំបុត្រសរសេរដោយដៃ រវាងអតីតប្រធានាធិបតីអាមេរិក បារ៉ាក់ អូបាម៉ា និងអតីតមិត្តស្រីឈ្មោះ Alexandra McNear ដែលលោកបានជួបនៅរដ្ឋ California កាលជានិស្សិតមានអាយុខ្ទង់២០ឆ្នាំ រៀបរាប់អំពីសញ្ជាតិ ឋានៈ និង ទ្រព្យសម្បត្តិ ត្រូវបានបង្ហាញ។

អតីតប្រធានាធិបតីអាមេរិក បារ៉ាក់ អូបាម៉ា កាលមានអាយុខ្ទង់២០ឆ្នាំ

អ្នកស្រី Alexandra McNear

សំបុត្រមួយនេះត្រូវបានរក្សាទុក នៅក្នុងបណ្ណាល័យ Rose Library របស់សកលវិទ្យាល័យ Emory University ក្នុងឆ្នាំ២០១៤ និងទើបតែបានបង្ហាញនាពេលថ្មីៗនេះ។ វាត្រូវបានសរសេរនៅចន្លោះឆ្នាំ ១៩៨២ និង ១៩៨៤ ពោលគឺរយៈពេល ៥ឆ្នាំ មុនពេល លោក អូបាម៉ា ណាប់ជួបភរិយាបច្ចុប្បន្ន គឺលោកស្រី Michelle ជាលើកដំបូងបង្អស់។

ឃ្លាមួយនៅក្នុងសំបុត្រ អតីតប្រធានាធិបតីអាមេរិក វ័យ ៥៦ឆ្នាំរូបនេះ បានសរសេរថា «ខ្ញុំជឿថា អ្នកដឹងថាខ្ញុំនឹកអ្នកណាស់ ហើយការព្រួយបារម្ភរបស់ខ្ញុំចំពោះអ្នក គឺធំធេងដូចខ្យល់អាកាស ទំនុកចិត្តរបស់ខ្ញុំលើអ្នក ជ្រាលជ្រៅប្រៀបបីដូចជាទឹកសមុទ្រអីចឹង»។

ផ្ទុយទៅវិញ ទំនាក់ទំនងរវាងអ្នកទាំង ២ មិនបានយូរនោះទេ។ នៅឆ្នាំ១៩៨៣ លោក អូបាម៉ា បានប្រាប់អ្នកស្រី Alexandra ថា «ខ្ញុំគិតពីអ្នកញឹកញាប់ណាស់ ប៉ុន្តែខ្ញុំនៅតែយល់ច្រឡំអំពីអារម្មណ៍របស់ខ្ញុំ។ វាហាក់បីដូចជា យើងចង់បានអ្វី ដែលយើងមិនអាចមាន... វាជាអ្វីដែលរារាំងយើង ហើយវាជាអ្វីដែលធ្វើឲ្យយើងឃ្លាតឆ្ងាយពីគ្នា»។

យ៉ាងណាមិញ នាយកបណ្ណាល័យ លោក Rosemary Magee បាននិយាយថា «ពួកគេបានបង្ហាញនូវចំណង់ចំណូលចិត្ត និងបញ្ហាដូចគ្នា ដែលសិស្សរបស់យើងប្រឈមមុខ និងសិស្សនៅគ្រប់ទីកន្លែងជួបប្រទះ»។

គួរបញ្ជាក់ថា ក្រៅពីនិយាយអំពីទំនាក់ទំនងរវាងអតីតមិត្តស្រី សំបុត្រនោះក៏បានរៀបរាប់អំពី ខ្សែជីវិតរបស់លោក អូបាម៉ា បន្ទាប់ពីបញ្ចប់ការសិក្សា និងដំណើរក្លាយជាប្រធានាធិបតីវ័យក្មេងផងដែរ៕