មានកន្លង់ក្រឡឹងច្រើន តែស្រីអ៊ីត មិនខ្ចីខ្វល់

2017-10-27 02:19:30
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងមេម៉ាយកូនមួយ ស្រីអ៊ីត បានបង្ហើបឲ្យដឹងថា ចាប់តាំងពីនាងមានឈ្មោះជាស្ត្រីមេម៉ាយមក មានបុរសជាច្រើនចង់ភ្ជាប់ទំនាក់ទំនងជាមួយក្នុងន័យស្នេហា ប៉ុន្តែតារាកំប្លែងស្រីរូបនេះហាក់ដូចជាមិនទុកចិត្ត ដោយចង់សិក្សាចិត្តឲ្យបានច្រើន និងចង់បន្តភាពមេម៉ាយឲ្យបានយូរបន្តិច។

ជិត២ ឆ្នាំហើយដែល ស្រីអ៊ីត បានលែងលះប្ដី ខណៈដែលអតីតស្វាមីរបស់នាងបានរៀបការប្រពន្ធថ្មីរួចទៅហើយកាលពីថ្ងៃទី២០ ខែ តុលា ឆ្នាំ២០១៦ ។ ស្រីអ៊ីតថា រយៈពេលដែលខ្លួនមានងាជាស្ត្រីមេម៉ាយមកនេះ មានបុរសជាច្រើនចង់មកផ្សារសាច់ផ្សារឈាមជាមួយ ប៉ុន្តែនាងមិនទាន់សម្រេចចិត្តបែបណានៅឡើយទេ។

"បងអើយ! កំលោះក៏មាន ពោះម៉ាយក៏មាន តែខ្ញុំមិនទាន់គិតទេ ចាំកូនធំបន្តិចសិន ម្យ៉ាងខ្ញុំទើបលែងលះបានជាង១ឆ្នាំ ចង់នៅឲ្យយូរបន្តិច កុំឲ្យញាតិគេថា យើងឆាប់យកប្ដីពេក" ប្អូនស្រីនាយ ក្រូចលើកឡើង។

ទោះបីជាបង្ហើបថា មានកន្លង់តាមឆ្វែលច្រើនបែបនេះក្ដី ស្រីអ៊ីត មិនបានបង្ហាញអត្តសញ្ញាណ បុរសទាំងនោះឡើយ ដោយនាងលើកឡើងថា បើសិនជាគូ ហើយច្បាស់ជាមួយនាង១០០% ពិតមែននោះ នាងនឹងបញ្ចេញជាសាធារណៈ មិនលាក់លៀមឡើយ។ ស្រីអ៊ីតថា បុរសដែលនាងគ្រោងសម្រេចយកធ្វើជាគូអនាគត ខ្លួនមិនបានដាក់លក្ខខណ្ឌលើទ្រព្យសម្បត្តិ អាយុ ឬលុះត្រាតែកំលោះបានយកឡើយ កត្តាដែលសំខាន់នោះ គឺបុរសនោះដាច់ខាតត្រូវចេះស្រលាញ់នាង ចេះស្រលាញ់គ្រួសារនាង ពិសេសស្រលាញ់កូនស្រីនាង និង ម្ដាយរបស់នាងដែលកំពុងតែរស់នៅជាមួយនាង ត្បិតអីស្រីអ៊ីតជាកូនពៅ ដូចនេះត្រូវរស់នៅជាមួយម្ដាយរហូតដល់បង្ហើមចុងក្រោយ។ ចំពោះការរៀបការវិញ ក៏មិនមែនជារឿងសំខាន់សម្រាប់នាងដែរ ត្បិតអីដូចបានដឹងស្រាប់ស្រីអ៊ីត ធ្លាប់រៀបការម្ដងរួចមកហើយ។

ការចង់អូសបន្លាយឲ្យភាពមេម៉ាយនៅយូរដូចបានលើកឡើងខាងលើ ស្រីអ៊ីត លើកឡើងលាយនឹងសំណើចថា "មិនឲ្យយូរពេកទេ ២ទៅ៣ឆ្នាំទៀតហ្នឹង ខ្ញុំយកប្ដីហើយ មេម៉ាយយូរពេកនោះទេ ខ្លាចហួសឌីឡេដែរហ្នឹង"។

កន្លងមកស្រី អ៊ីត ត្រូវបានគេសារព័ត៌មានចេញផ្សាយថា មានទំនាក់ទំនងយ៉ាងស៊ីជម្រៅជាមួយ តារាសម្ដែងវ័យក្មេងម្នាក់ឈ្មោះ អ៊ុក ដារ័ត្ន ប៉ុន្តែដំណឹងស្នេហ៍មួយនេះ ត្រូវបានអ្នកទាំងពីរប្រកែក ដោយពួកគេលើកឡើងថា គ្រាន់តែដៃគូសម្ដែង និងជាមិត្តភ័ក្ដិប៉ុណ្ណោះ៕

អត្ថបទៈ ស៊ុនហួត