ផលិតករ និងសិល្បករខ្មែរ រឹតតែមានឱកាស បើប្រសាសន៍រដ្ឋមន្រ្តីក្រសួងព័ត៌មានក្លាយជាការពិតឆាប់ៗ

2017-11-01 02:44:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តមរដ្ឋមន្រ្តី ក្រសួងពត៌មាន លោក ខៀវ កាញារីទ្ធ ថ្លែងក្នុងកម្មវិធីបិទមហោស្រពភាពយន្តខ្លីចតុមុខកាលពីយប់ម្សិលមិញថា ក្រសួងមានផែនការបិទការផ្សព្វផ្សាយពាណិជ្ជកម្មលើទូរទស្សន៍ ដែលមិនសម្តែងដោយសិល្បករខ្មែរ ឬផលិតដោយផលិតករខ្មែរ។

ឯកឧត្តមរដ្ឋមន្រ្តី ក្រសួងពត៌មាន លោក ខៀវ កាញារីទ្ធ

ស្របពេលបញ្ហាពាក់ព័ន្ធជុំវិញវិបតិ្តពន្ធ សេចក្តីថ្លែងរបស់ឯកឧត្តមរដ្ឋមន្រ្តីក្រសួងព័ត៌មាន បានធ្វើឲ្យផលិតករ និងសិល្បករទាំងឡាយស្វាគមន៍ និងមានសេចក្តីត្រេអរជាអនេក។ លើសពីនេះក៏ស្នើឲ្យមានការសម្រេចឲ្យបានកាន់តែឆាប់កាន់តែល្អ ដើម្បីលើកទឹកចិត្ត និងជំរុញស្នាដៃផលិតករ និងសិល្បករខ្មែរ ប៉ុន្តែក៏ក្រើនរំលឹកដល់គុណភាព និងការចូលរួមអនុវត្តពីម្ចាស់ក្រុមហ៊ុនផងដែរ។

ក្រុមសិល្បករ និងផលិតករខ្មែរ

ផលិតករ Studio4 និងជាអតីតក្រុមការងារផលិត (Film Crew) រឿង «ដំបូងខ្មែរក្រហមសម្លាប់ប៉ារបស់ខ្ញុំ» លោក ទូច យីមមុន្នី បានលើកឡើងថា៖ «នេះជារឿងល្អដែលរដ្ឋាភិបាលផ្តើមគំនិតដ៏ល្អបែបនេះ វាមិនត្រឹមតែជួយឲ្យផលិតករ និង Talents (សិល្បករ) មានឱកាសច្រើនដើម្បីបង្ហាញសមត្ថភាព និងកាន់តែមានបទពិសោធន៍ថែមទៀត»។

បើតាមការអង្កេតឃើញរបស់លោក បច្ចុប្បន្នផលិតករខ្មែរក៏មានសមត្ថភាព ព្រមជាមួយបច្ចេកទេសកាន់តែប្រសើរ ហើយសិល្បករខ្មែរក៏មានសមត្ថភាពខ្ពស់ៗផងដែរ។ បន្ថែមពីនេះលោកថា៖ «យើងក៏ត្រូវរៀនសូត្របន្ថែមលើការផលិតស្ប៉តពាណិជ្ជកម្មឲ្យកាន់តែល្អជាងបណ្តាប្រទេសជិតខាងយើង ដូចជាថៃ ឬម៉ាឡេស៊ីជាដើម ហើយខាងក្រុមហ៊ុនក៏គួររួមសហការជ្រើសរើសផលិតករខ្មែរ និង Talents ខ្មែរយើងផងដែរ»។

លោក ទូច យីមមុន្នី ជាមួយក្រុមការងារ

សម្រាប់លោក ជុំ សុភា ផលិតករ ដែលធ្លាប់មានបទពិសោធន៍ ថតស្ប៉តពាណិជ្ជកម្មដែលមានការចូលរួមពីបរទេស ក្នុងតម្លៃចាប់ពី ១ម៉ឺនដុល្លាកន្លះ រហូតដល់ ៦ម៉ឺនដុល្លា ក៏សាទរចំពោះចំណាត់ការរបស់ក្រសួងព័ត៌មានដែរ ប៉ុន្តែលោកពន្យល់ថា ដោយសារយើងអត់មានសាលាបណ្តុះបណ្តាលលើការសម្តែង ឬផលិតស្ប៉តពាណិជ្ជកម្ម ដូចបរទេសនោះទេ ហេតុដូចនេះផលិតផលវីដេអូរបស់យើង នៅមានកម្រិតច្រើន ដែលក្រុមហ៊ុនភាពច្រើនគ្មានជម្រើសត្រូវតែយកបរទេសមកផលិត ឬសម្តែងសម្រាប់បង្ហាញពីផលិតផលរបស់គេ។

លោក ជុំ សុភា (រូបខាងស្តាំ)

លោក ជុំ សុភា ផលិតករវ័យ ២៦ឆ្នាំដដែលលើកឡើងថា៖ «បើយកល្អគួរតែកំណត់ចំនួនការចូលរួមរបស់បរទេស ៣០% ខ្មែរ៧០% វិញ ដើម្បីយើងមានឱកាសរៀនសូត្រ ផ្លាស់ប្តូរបទពិសោធន៍វិញល្អជាង»។ លោកថា ផលិតករ និងតារាសម្តែងបរទេស ហេតុតែគេមានប្រៀបជាងយើង ព្រោះគេមានសាលាបណ្តុះបណ្តាលជំនាញសម្តែង និងបច្ចេកទេសផលិតត្រឹមត្រូវ ហើយគេក៏មានបទពិសោធន៍ជាងយើងដែរ ដូចនេះយើងជាផលិតករ ឬសិល្បករគួរតែរៀនសូត្របន្ថែមពីគេជាជាងរុញគេចេញភ្លាមៗ។

លោក ជុំ សុភា ជាមួយក្រុមការងារ

សម្រាប់តារាសម្ដែង និងបង្ហាញម៉ូដ កញ្ញា ទឹម រដ្ឋា វិញបានលើកឡើងថា នាងពិតជាគាំទ្រយ៉ាងខ្លាំងនូវចំណាត់ការរបស់ក្រសួងព័ត៌មាន ដែលមិនអនុញ្ញាតឲ្យផ្សាយស្ប៉តពាណិជ្ជកម្មណាមានតារាបរទេសនៅលើប៉ុស្តិ៍ទូរទស្សន៍ ដោយជំនួសមកវិញជាមួយសិល្បករខ្មែរ។

នាងថា៖" ចំពោះចំណាត់ការនេះ មិនត្រឹមតែធ្វើឲ្យសិល្បករខ្មែររកចំណូលបានបន្ថែមទៀតនោះទេ។ អ្វីដែលពិសេសជាងនេះអាចជួយលើកស្ទួយសិល្បៈវប្បធម៌ដ៏ស្រស់ផូរផង់របស់ខ្មែរបានមួយកម្រិតទៀត ព្រោះសមត្ថភាព និងរូបសម្រស់តួខ្មែរសព្វថ្ងៃមិនចាញ់បរទេសប៉ុន្មានឡើយ"៕

ចុចអាន

-យី កក្កដា សិល្បករពហុជំនាញ ចេះគូរគំនូរ២ផ្ទាំងក្នុងពេលតែមួយ មានប្រវត្តិកំសត់នឹកស្មានមិនដល់

-សិល្បករចាប់ផ្ដើមបារម្ភខ្លាំង ក្រោយផលិតករចង់បិទទ្វារផលិតកម្ម

-ថតរឿងឲ្យតារាហូលីវូដ ទេព រិន្ទដារ៉ូ ទទួលបានតម្លៃខ្លួនខ្ពស់មិនធម្មតា

អត្ថបទ៖ Sunny