តារាកំពូលៗបង្ហាញមុខលើគ្របប្រលោមលោកស៊ើបអង្កេតប្រចាំឆ្នាំ
- 2017-11-01 07:50:56
- ចំនួនមតិ 0 | ចំនួនចែករំលែក 0
តារាកំពូលៗបង្ហាញមុខលើគ្របប្រលោមលោកស៊ើបអង្កេតប្រចាំឆ្នាំ
ចន្លោះមិនឃើញ
តារាជួរមុខប្រទេសកម្ពុជាជាច្រើនរូប រួមមានកញ្ញា ហ៊ិន ច័ន្ទនីរ័ត្ន លោក ទេព រិន្ទដារ៉ូ ម៉េង ប៊ុនឡូ លឹម រដ្ឋា ជាដើម បានបង្ហាញមុខជាលើកដំបូងលើគ្របប្រលោមលោកថ្មីសន្លាងរបស់ Sabay គឺរឿង «គម្រោងការសម្ងាត់ ២០៣៥»។
នេះជាខ្សែរឿងស៊ើបអង្កេតទី៤ របស់«សុភាប្រុស»ដែលជាឈ្មោះសម្រាប់ប្រើក្នុងរឿងស៊ើបអង្កេតរបស់អ្នកនិពន្ធ ម៉ីសន សុធារី។
ទាក់ទងនឹងមូលហេតុនៃការបង្ហាញមុខលើគ្របប្រលោមលោក ជាលើកទី១ នេះ កញ្ញា ហ៊ិន ច័ន្ទនីរ័ត្ន បានឲ្យដឹងថា ទី១ ដោយសារសាច់រឿងប្រលោមលោកថ្មីនេះល្អ ទាក់ទាញចំណាប់អារម្មណ៍ រីឯទី២ គឺវាជាស្នាដៃអ្នកនិពន្ធល្បី។ «និយាយទៅនេះជាលើកទីមួយសម្រាប់ខ្ញុំដែលមកថតគម្របប្រលោមលោក!»នាងនិយាយទំាងញញឹម។
ត្បិតតែថតឲ្យគ្របប្រលោមជាលើកដំបូងក៏ពិតមែន តែពិធីការិនីរូបស្រស់បានបង្ហាញនូវការជឿជាក់ថា រឿង «គម្រោងការសម្ងាត់ ឆ្នាំ២០៣៥» នឹងទទួលបានការគាំទ្រពីប្រិយមិត្តអ្នកអាន ព្រោះអ្នកនិពន្ធរឿងនេះមានស្នាដៃលេចធ្លោច្រើនរឿងមកហើយ ពិសេសរឿង «ស្រទន់មន្តស្នេហ៍»។ ហេតុផលស្រដៀងគ្នានេះដែរតារាសម្តែងជើងចាស់ ដែលមានទីផ្សារមិនដាច់ ទេព រិន្ទដារ៉ូ ថា លោកជឿជាក់លើស្នាដៃរបស់អ្នកនិពន្ធ ម៉ីសន សុធារី និងប្រលោមលោក Sabay ដែលមានប្រិយមិត្តគាំទ្ររាប់លាននាក់ ដូច្នេះហើយទៅកំណាញ់នឹងបង្ហាញខ្លួនលើគ្របប្រលោមលោកធ្វើអ្វី?
ដោយស្តែងជាតួអង្គឧត្តមសេនីយ ក្នុងរឿង «គម្រោងការសម្ងាត់ ២០៣៥» លោកថា ពិតជាសប្បាយចិត្តដែលបានបង្ហាញមុខលើគ្របប្រលោមជាលើកដំបូង ហើយលោករីករាយនឹងសម្តែងជាតួអង្គពិត ប្រសិនបើរឿងនេះថតជាភាពយន្តនៅថ្ងៃអនាគត។ ក្នុងសាច់រឿង កញ្ញា ហ៊ិន ច័ន្ទនីរ័ត្ន គឺជាកូនស្រីរបស់លោក ទេព រិន្ទដារ៉ូ ដែលមានឋានៈជាឧត្តមសេនីយ ឈ្មោះ អមរាដា។ លោកឪពុកជាឧត្តមសេនីយរូបនេះត្រូវដោះស្រាយរឿងក្តីដ៏ស្មុគស្មាញសម្រាប់ក្រុមប៉ូលិស គឺជាការបាត់ខ្លួនរបស់កូនស្រីត្រកូលអភិជនបន្តបន្ទាប់គ្នា។ «គម្រោងការសម្ងាត់ ២០៣៥» គឺជាប្រលោមលោកបែបស៊ើបអង្កេតដ៏សម្រិតសម្រាំង ដែលអ្នកនិពន្ធ ម៉ីសន សុធារី បានសន្យាតាំងពីឆ្នាំ២០១៤ បន្ទាប់ពីរឿង «សំណុំឯកសារ Z22»។ តាមគម្រោង រឿងនេះ ប្រលោមលោក Sabay នឹងចេញផ្សាយនៅដើមឆ្នាំ ២០១៨ ខាងមុខនេះ ដើម្បីជាចំណីអារម្មណ៍ឆ្នាំថ្មី សម្រាប់ប្រិយមិត្តប្រលោមលោក Sabay ទាំងអស់។
អ្នកស្រី អ៊ុច ថាវី អ្នកគ្រប់គ្រងគម្រោងប្រលោមលោកSabayបញ្ជាក់ថានេះជាស្នាដៃដ៏ល្អទុកជាអំណោយឆ្នាំថ្មីដល់អ្នកគាំទ្រទំាងអស់ដែលបានរង់ចាំយ៉ាងអន្ទះសារ។ អ្នកស្រី ម៉ីសន សុធារី ជាអ្នកនិពន្ធដ៏មានស្នាដៃ មិនថាប្រលោមលោក ភាពយន្ត ល្ខោនទូរទស្សន៍ ឬវិទ្យុ។ អ្នកស្រីមានប៉ាកានាមថា «សុភាប្រុស»សម្រាប់បណ្តារឿងស៊ើបអង្កេតជ្រាលជ្រៅ និងប៉ាកានាម«ពេជ្របណ្ឌិត»សម្រាប់រឿងមន្តគមអូមអាម៕