ដឹងមូលហេតុ ឡុង សុភី វ៉ៃខ្លាំងមួយរយៈនេះហើយ

2017-11-01 09:50:22
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់អ្នកនិយមវិស័យប្រដាល់គុនខ្មែរប្រហែលជាដឹងហើយថា មួយរយៈចុងក្រោយនេះអ្នកលេងជង្គង់ ឡុង សុភី ហាក់មានសមត្ថភាពប្រកួតប្លែកខុសពីធម្មតា ហើយលទ្ធផលទៀតសោតគឺផ្ដួលដៃគូឲ្យសន្លប់មុនទឹកទី៥រហូត។

កីឡាករ ឡុង សុភី ពេលឈ្នះថៃ

បើតាមឲ្យដឹងពីលោកគ្រូ ឡុង សាលវ័ន្ត លើកឡើងថា ពីមុនកូនសិស្សរបស់លោកហាក់ធ្លាក់សមត្ថភាពនោះបណ្ដាលមកពីមានជំងឺខ្លះៗ ស្របពេលគេទើបរៀបការរួចផង ហើយចិត្តក៏រអាបន្តិចទើបការប្រកួតរបស់គេធ្លាក់ដូច្នេះ។

គ្រូប្រដាល់គុនខ្មែរខាងលើបន្តថា លោកបានប្រាប់ដល់កូនសិស្សជាពិសេស «ឡុង សុភី» តែម្ដងថា ត្រូវតែប្ដូររបៀបវ៉ៃឡើងវិញ ពេលឡើងវ៉ៃគឺវ៉ៃយកប្រជាប្រិយភាព មិនមែនវ៉ៃលំលំឲ្យតែរួចនោះទេ ហើយចំពោះស្នៀតប្រយុទ្ធនិមួយៗត្រូវតែច្បាស់ បើប្រើកែង ទាត់ ឬជង្គង់មួយៗត្រូវតែធ្ងន់តែម្ដង នៅពេលប្រកួតក៏ដូចគ្នាដែរផ្ដាច់បានត្រូវតែវ៉ៃផ្ដាច់។

លោកគ្រូ ឡុង សាលវ័ន្ត

អតីតអ្នកប្រដាល់ជើងខ្លាំងលើកឡើងទៀតថា លោកពិតជាសប្បាយចិត្តក្រោយឃើញលទ្ធផលល្អបែបនេះ ក៏ដូចជាកូនសិស្សស្ដាប់នូវអ្វីដែលលោកបានប្រាប់ និងបង្ហាត់បង្ហាញ ហើយកីឡាករខ្លួនឯងមានការប្ដេជ្ញាថានឹងធ្វើឲ្យបានល្អដូចទៀត។

កីឡាករថៃ សន្លប់ដោយសារជង្គង់ ឡុង សុភី

កីឡាករ ឡុង សុភី ឬ នី សុភី ជាកូនសិស្សរបស់លោកគ្រូ ឡុង សាលវ័ន្ត មកពីក្លឹបប្រដាល់សាលវ័ន្តកីឡា ហើយកីឡាកររូបនេះផ្ដួលជើងខ្លាំងមកពីប្រទេសថៃឲ្យសន្លប់មុនទឹកទី៥ ចំនួន៤លើកជាប់ៗគ្នា នាការប្រកួតមិត្តភាពអន្តរជាតិតាមសង្វៀនក្នុងស្រុកនានាកន្លងទៅនេះ៕

អត្ថបទ៖ នួន ស៊ីណា