គ្រាប់បាល់ពីចម្ងាយរបស់ Asensio ជាការរៀបផែនការ មិនមែនចៃដន្យទេ

2017-11-07 03:33:45
ចំនួនមតិ 0 | ចំនួនចែករំលែក 0

ចន្លោះមិនឃើញ

Marco Asensio ជាអ្នករកគ្រាប់ទីពីរក្នុងការប្រកួតដែល Real Madrid យកឈ្នះ Las Palmas ៣-០ កាលពីថ្ងៃអាទិត្យ។

គ្រាប់បាល់មួយនោះមិនខុសពីគ្រាប់បាល់មុនៗរបស់ខ្សែបម្រើសញ្ជាតិអេស្ប៉ាញទេពោលវាជាការទាត់ពីចម្ងាយចូលកែងយ៉ាងល្អឥតខ្ចោះ។ យ៉ាងណា Asensio បានបកស្រាយថាដើម្បីសម្រេចបានគឺខ្លួនមានផែនការមុនរួចជាស្រេចនៅអំឡុងពេលប្រកួត ហើយវាមិនមែនជារឿងចៃដន្យឡើយ។

កីឡាករវ័យ២១ឆ្នាំបាននិយាយដូច្នេះ៖ "ពួកយើងដឹងថាកីឡាករក្រុម Las Palmas នឹងមានគម្លាត នៅពេលព្យាយាមទាត់បាល់ចោល។ ខ្ញុំត្រូវឈរនៅក្បែរតំបន់ដំបូងទូកនៅពេលបាល់សល់ពីការលើកជ្រុង។ នៅវគ្គទីមួយខ្ញុំមានឱកាសទាត់ម្ដងដែរ តែបាល់មករកជើងស្ដាំ ហើយនៅវគ្គទីពីរឱកាសមានម្ដងទៀតជាមួយជើងឆ្វេងហើយខ្ញុំធ្វើវាបានយ៉ាងល្អ"។

គ្រាប់បាល់របស់ Asensio ទល់នឹង Las Palmas មានល្បឿន៩៩គីឡូម៉ែត្រក្នុងមួយម៉ោង និងចម្ងាយ ២៤,៧៥ម៉ែត្រ៕