រឿងបញ្ចាំងថ្ងៃបើកមហោស្រពភាពយន្តជប៉ុនធ្វើឱ្យពលរដ្ឋកម្ពុជានឹកដល់អតីតកាល

2017-11-09 07:24:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តជប៉ុន ដែលបានដាក់បញ្ចាំងក្នុងថ្ងៃបើកមហោស្រពភាពយន្តជប៉ុន កាលពីម្សិលមិញត្រូវបានជម្រើសរឿងមួយដែលល្អបំផុតក្នុងចំណោមរឿងទាំង១២ ដែលមហោស្រពនេះ ត្រៀមដាក់បញ្ចាំងឱ្យសាធារណៈជនបានទស្សនា។ រឿងមួយនេះ បានបង្ហាញអំពីជីវិតស្ត្រីម្នាក់ តស៊ូជម្នះនឹងភ្លើងសង្គ្រាមរហូតសង្គ្រាមត្រូវបានបញ្ចប់។

ខ្សែភាពយន្តដែលបានជ្រើសយកមកដាក់បញ្ចាំងក្នុងថ្ងៃបើកមហោស្រពជប៉ុននេះ មានចំណងជើងថា "In this Corner of the World” (ជ្រុងមួយនៃពិភពលោក) ជាប្រភេទភាពយន្តគំនូរជីវចល ដែលផលិតដោយលោក Sunao Katabuchi។ រឿងនេះបាននិយាយពីសង្គ្រាមក្នុងតំបន់មួយ នៃប្រទេសជប៉ុន ក្នុងឆ្នាំ១៩៤៤ និងបាននិយាយពីជីវិតស្ត្រីម្នាក់ ដែលហែលឆ្លងសម័យសង្គ្រាមដោយអត់ធ្មត់។នាងបានរងគ្រោះជាច្រើនលើកច្រើនសា ពីការប្រកាសអាសន្ន។ អ្វីដែលនាងស្រលាញ់ហួងហែងត្រូវបានបាត់បង។ ទោះជាយ៉ាងណា នាងនៅតែជម្នះបាននូវរាល់ឧបសគ្គ ដោយភាពវៃឆ្លាតរបស់នាង។

ឯកឧត្ដម សោម សុគន្ធ រដ្ឋលេខាធិកា ក្រសួងវប្បធម៌ និងវិចិត្រសិល្បៈ មានប្រសាសន៍ក្នុងឱកាសនោះថា មហោស្រពភាពយន្តជប៉ុននេះ បានបង្ហាញពីទំនាក់ទំនងដ៏ល្អរវាងកម្ពុជា និងជប៉ុន។ មហោស្រពនេះនឹងបង្ហាញអំពីជីវភាពរស់នៅ និងវប្បធម៌របស់ប្រជាជនជប៉ុន។ លើសពីនេះ មហោស្រពនេះ ផ្ដល់ឱកាសឱ្យផលិតករខ្មែរបានស្វែងយល់បន្ថែមពីបទពិសោធ និងបច្ចេកទេស ផលិតភាពយន្តប្រកបដោយគុណភាព។ បន្ថែមពីនោះបានសិក្សាពីបទពិសោធក្នុងការស្វែងរកមូលនិធិដើម្បីផលិតភាពយន្ត។

“វិស័យភាពយន្តមានសារសំខាន់ណាស់ សម្រាប់ផ្សព្វផ្សាយពីវប្បធម៌នៃប្រទេសនីមួយៗ។ នេះជាឱកាសល្អមួយសម្រាប់ផលិតករខ្មែរ បានសិក្សាបន្ថែមពីការរៀបចំអត្ថបទកុនឱ្យបានល្អនិងបច្ចេកទេសមួយចំនួនទៀត”។

មហោស្រពភាពយន្តជប៉ុនឆ្នាំ២០១៧ នៅថ្ងៃទី៨ ម្សិលមិញនេះ បានប្រព្រឹត្តទៅនៅសាលមហោស្រពចតុមុខ ដោយមានការយាងចូលរួមពីសម្ដេចព្រះរាមបុប្ផាទេវី ឯកឧត្តមរដ្ឋមន្ត្រីក្រសួងព័ត៌មាន ខៀវ កញារីទ្ធ ឯកឧត្ដម សោម សុគន្ធ រដ្ឋលេខាធិកា ក្រសួងវប្បធម៌ និងវិចិត្រសិល្បៈ ឯកអគ្គរដ្ឋទូតជប៉ុន ប្រចាំប្រទេសកម្ពុជា ផលិតករភាពយន្តជប៉ុន តំណាងក្រសួង ស្ថាប័ន និងភ្ញៀវជាច្រើនរូបទៀតចូលរួម៕

ចុចអាន៖

ឱកាសល្អសម្រាប់ផលិតករខ្មែរស្វែងយល់បទពិសោធន៍ពីផលិតករភាពយន្តបរទេសល្បីៗ ភាពយន្តខ្មែរ ៦រឿង កំពុងប្រកួតយកលេខ១ភាពយន្តឆ្នើមប្រចាំឆ្នាំ២០១៧

អត្ថបទ៖ ប៉ូ សាគុន