មិនមែនលំៗទេ! ប៊ី សុធារី ទទួលបានការហ្វឹកហាត់លំដាប់អន្តរជាតិមុនចេញទៅប្រកួត
- 2017-11-10 04:20:00
- ចំនួនមតិ 0 | ចំនួនចែករំលែក 0
មិនមែនលំៗទេ! ប៊ី សុធារី ទទួលបានការហ្វឹកហាត់លំដាប់អន្តរជាតិមុនចេញទៅប្រកួត
ចន្លោះមិនឃើញ
មុនចេញទៅដណ្ដើមមកុដ Miss Universe 2017 កញ្ញាឯកកម្ពុជាឆ្នាំ២០១៦ ប៊ី សុធារី បានហ្វឹកហាត់យ៉ាងយ៉ាងច្រើនជាមួយស្ថាប័ននានាក្នុងស្រុក ថែមទាំងចេញទៅដុះខាត់បន្ថែមនៅក្រៅប្រទេសទៀត។
បវរកញ្ញាចក្រវាលតំណាងកម្ពុជាដំបូងបង្អស់ ប៊ី សុធារី បានចាកចេញពីមាតុប្រទេសកាលពីយប់មិញនេះ ដើម្បីឆ្ពោះទៅបំពេញបេសកកម្មប្រឡងកម្មវិធីប្រកួតសម្រស់ធំជាងគេលំដាប់ថ្នាក់ពិភពលោក ដែលប្រព្រឹត្តឡើងនៅទីក្រុង Las Vegas សហរដ្ឋអាមេរិក។
ជាមួយស្នាមញញឹមដ៏ស្រស់សោភា សុធារី និយាយថា នាងបានត្រៀមរួចជាស្រេចសម្រាប់ការចេញទៅប្រកួតកម្មវិធីនេះ។ "មិនមែនទើបតែពេលនេះទេ ខ្ញុំបានត្រៀមខ្លួនតាំងពីខ្ញុំជាប់ជាកញ្ញាឯកកម្ពុជាឆ្នាំ២០១៦មកម្ល៉េះ។ ខ្ញុំបានហាត់ពត់ទាំងការដើរ អត្តចរិត ការនិយាយស្ដី ភាសា និងបានរៀនសូត្រចំណេះដឹងទូទៅជាច្រើន ហើយកាលពីខែមុននេះ ខ្ញុំបានចេញទៅទទួលការហ្វឹកហាត់ពិសេសនៅក្រៅប្រទេសទៀតផង"។ ស្រីស្អាត ថ្លែង។
នាងបានឲ្យដឹងថា ការហ្វឹកហាត់ពិសេសនេះ បានធ្វើឡើងកាលពីខែមុននៅប្រទេសហ្វីលីពីន ដោយហាត់ជាក្រុមរៀបចំបវរកញ្ញាខ្នាតធំតែម្ដង។ មូលហេតុជ្រើសរើសចេញហ្វឹកហាត់នៅទីនោះ គឺព្រោះតែ ហ្វីលីពីន ជាប្រទេសលេចធ្លោ និងខ្លាំងជាងគេ ក្នុងចំណោមប្រទេសអាស៊ីទាំងអស់លើកម្មវិធីប្រកួតសម្រស់ទាំងឡាយ។ ម្យ៉ាង អ្នកគ្របគ្រងថ្នាក់ជាតិរបស់នាងចង់ឲ្យបេក្ខភាពដំបូងរបស់កម្ពុជាមានលក្ខណៈសម្បត្តិល្អគ្រប់គ្រាន់លើឆាកអន្តរជាតិ ហើយលោកគឺជាជនជាតិហ្វីលីពីនស្រាប់ ទើបអាចត្រួសត្រាយ និងណែនាំនាងទៅហ្វឹកហាត់ទីនោះបានយ៉ាងជោគជ័យ។
បវរកញ្ញាចក្រវាលតំណាងកម្ពុជាទី១ក្នុងប្រវត្តិសាស្ត្រ រៀបរាប់ពីបទពិសោធន៍ពេញ១ខែនៅលើទឹកដីដែលមានដែនកោះស្អាតជាងគេនេះថា ៖ "ការហ្វឹកហាត់នៅទីនោះ មានដូចជាការដើរ ការរៀបចំខ្លួន កាយវិការ និងអត្តចរិតដូចហាត់នៅប្រទេសយើងដែរ តែក្បួនខ្នាតគេគឺលំដាប់អន្តរជាតិ ពិសេសការដើរ គឺខុសដាច់តែម្ដង។ នៅទីនេះខ្ញុំហាត់ដើរត្រឹម CatWalk ទេ តែទៅដល់ខាងគេ គេបង្ហាត់ដើរបែប Queen CatWalk ដែលវាពិតជាប្លែក និងអស្ចារ្យ។ នាងបន្ថែមថា នៅខ្មែរនាងយល់ថាខ្លួនខ្លាំងហើយ តែពេលទៅឃើញគេទើបដឹងថាគេខ្លាំងជាងទៀត នេះក៏ជាចំណុចដែលនាងបានរៀនសូត្រ និងអភិវឌ្ឍន៍ខ្លួនបន្ថែម៕