មក​ស្វែង​យល់​ពី​ដំណើរការ​លម្អិត​ Face ID លើ iPhone X

  • 2017-11-12 01:58:00
  • ចំនួនមតិ 0 | ចំនួនចែករំលែក 0

ចន្លោះមិនឃើញ

iPhone X ជំនាន់​ថ្មី​របស់​ Apple មិន​មាន​មុខងារ​ស្កេន​ក្រយៅ​ដៃ​នោះ​ទេ​ ប៉ុន្តែ​មក​ជាមួយ​នឹង​ Face ID ដើម្បី​ Unlock ឧបករណ៍​ និង​ផ្ទៀងផ្ទាត់​ការ​ចំណាយ​។ ចុះ​វា​សម្គាល់​មុខ​អ្នក​ដោយ​របៀប​ណា​។

លោក​សាស្ត្រាចារ្យ​ Anil Jain និយាយ​ថា​ វា​ប្រៀបធៀប​នូវ​រូបភាព​ពីរ​ ហើយ​កំណត់​លក្ខណៈ​ស្រដៀង​គ្នា​។ អ្នក​អាច​ពិនិត្យ​លក្ខណៈ​សម្គាល់​របស់​វា​បន្ថែម​នៅ​ខាងក្រោម​៖

- ការ​ចាប់​យក​រូបភាព​

ក្នុង​ការ​ដំឡើង​ Face ID អ្នក​ត្រូវ​រំកិល​ក្បាល​អ្នក​ជា​រាង​រង្វង់​ ដូច្នេះ​កាមេរ៉ា​អាច​ចាប់​យក​រូបភាព​ជា​ច្រើន​ប្រភេទ​នៃ​មុខ​អ្នក​ ដើម្បី​បង្កើត​ជា​គំរូ​មុខ​ 3D។ វា​ប្រើប្រាស់​នូវ​ពន្លឺ​ Infrared ដើម្បី​បំភ្លឺ​មុខ​អ្នក​ ពេល​ចាប់​យក​រូបភាព​ទាំង​ពេល​ថ្ងៃ​ និង​យប់​។

- ដំណាក់​កាល​សម្រាប់​ចាប់​យក​រូបភាព​៖

  • Proximity sensor និង​ Ambient light sensor ជួយ​ដល់​ប្រព័ន្ធ​កាមេរ៉ា​ TrueDepth កំណត់​នូវ​ចំនួន​ពន្លឺ​ត្រូវការ​សម្រាប់​សម្គាល់​មុខ​។

  • Flood illuminator ផលិត​នូវ​ពន្លឺ​ Infrared (IR) ជា​ផ្នែក​នៃ​ Electromagnetic spectrum ដែល​មិន​អាច​មើល​ឃើញ​នឹង​ភ្នែក​ទទេ​ក្នុង​ការ​បំភ្លឺ​មុខ​អ្នក​។

  • Dot projector ផលិត​ច្រើន​ជាង​ ៣០,០០០ dots នៃ​ពន្លឺ​ IR ដែល​មិន​អាច​ឃើញ​នឹង​ភ្នែក​ទទេ​ ក្នុង​ការ​បង្កើត​នូវ​លក្ខណៈ​ 3D map នៃ​ទិដ្ឋភាព​មុខ​អ្នក​។

  • កាមេរ៉ា​ Infrared ចាប់​យក​នូវ​រូបភាព​គំរូ​ Dot និង​ពន្លឺ​ IR ដែល​បាន​ជះ​ត្រលប់​ពី​មុខ​អ្នក​។

TrueDepth camera system

- ការ​សម្គាល់​មុខ​

គ្រប់​ប្រព័ន្ធ​ផ្ទៀងផ្ទាត់​ Biometric ប្រៀបធៀប​គំរូ​ស្មុគស្មាញ​ពីរ​ ហើយ​គណនា​លក្ខណៈ​ស្រដៀង​គ្នា​។ គំរូ​ទាំងនោះ​អាច​ជា​ រលក​សំឡេង​ ក្រយៅ​ដៃ​ សំណុំ​ពណ៌​នៃ​ប្រស្រី​ភ្នែក​ ឬ​រូបភាព​ផ្ទៃ​មុខ​។

ពេល​ប្រព័ន្ធ​ Biometric ដំឡើង​ កុំព្យូទ័រ​ដូចជា​ Processor របស់​ Smartphone នឹង​ចាប់​យក​ ហើយ​រក្សាទុក​គំរូ​ជា​អំណះអំណាង​ ដែល​ហៅថា​គំរូ​រូបភាព​ ឬ​រូបភាព​បាន​ចុះឈ្មោះ​រួច​រាល់​។ បន្ទាប់​មក​ពេល​អ្នក​ចង់​ចូល​ប្រើ​ Device អ្នក​បង្ហាញ​កុំព្យូទ័រ​ នូវ​រូបភាព​អ្នក​។

ការ​គណនា​ផ្ដល់​ពិន្ទុ​មាន​ចន្លោះ​ពី​ ០ ទៅ​ ១។ ប្រសិនបើ​ពិន្ទុ​កៀក​នឹង​ ១ នោះ ​មុខ​ ឬ​ក្រយៅ​ដៃ​ដូចគ្នា​ តែ​បើ​ពិន្ទុ​កៀក​នឹង​ ០ នោះ​ជា​មនុស្ស​ផ្សេង​។ មួយ​វិញ​ទៀត​ ទូរស័ព្ទ​ប្រើ​កម្រិត​ពន្លឺ​ដើម្បី​កំណត់​លក្ខណៈ​ផ្សេង​គ្នា​ ហើយ​ក្រុមហ៊ុន​ទូរស័ព្ទ​បាន​កំណត់​ពន្លឺ​ខុស​គ្នា​ ដោយ​បើ​ចូល​ប្រើ​ (Unlock) ទូរស័ព្ទ​ធម្មតា​នោះ​ កម្រិត​ពន្លឺ​មាន​ ០,៥ ឬ​ ០,៦ ហើយ​បើ​ប្រើ​សម្រាប់​ទិញ​ទំនិញ​វិញ​កម្រិត​ពន្លឺ​មាន​ដល់​ទៅ​ ០,៩ ដើម្បី​ផ្ទៀងផ្ទាត់​ឲ្យ​កាន់​តែ​ច្បាស់​។

-ដំណើរការ​សម្គាល់​មុខ​៖

រូបភាព​ IR បញ្ជូន​ពី​កាមេរ៉ា​ទៅ​កាន់​កុំព្យូទ័រ​ Processor ដែល​ជា​ Neural Engine របស់​ iPhone X ដើម្បី​បង្កើត​នូវ​គំរូ​រូបភាព​ 3D នៃ​មុខ​អ្នក​។

គំរូ​រូបភាព​ 3D ឬ​រូបភាព​សម្រាប់​បញ្ជាក់​បង្ហាញ​ទៅ​នឹង​ Algorithm របស់​កុំព្យូទ័រ​ ហើយ​បាន​ប្រៀបធៀប​នឹង​គំរូ​រូបភាព​អ្នក​ដែល​បាន​រក្សាទុក​ ពេល​ដំឡើង​ដំបូង​។

Processor ធ្វើ​ការ​គណនា​ថា​តើ​រូបភាព​បង្ហាញ​សម្រាប់​បញ្ជាក់​ និង​រូបភាព​បាន​រក្សាទុក​ត្រូវ​គ្នា​ ឬ​អត់​ ដោយ​អាស្រ័យ​លើ​ការ​ប្រៀបធៀប​ពិន្ទុ​នៃ​លក្ខណៈ​ស្រដៀង​គ្នា​រវាង​រូបភាព​ទាំង​ពីរ​នេះ​។ ទូរស័ព្ទ​កំណត់​សម្គាល់​អត្តសញ្ញាណ​ ហើយ​ Unlock ក្នុង​ការ​ប្រើប្រាស់​ ប្រសិនបើ​ពិន្ទុ​ក្នុង​ការ​ប្រៀបធៀប​ខ្ពស់​ជាង​តម្លៃ​កម្រិត​ពន្លឺ​ជាក់លាក់​មួយ​។

- ការ​ផ្ទៀងផ្ទាត់​ឲ្យ​បាន​ត្រឹមត្រូវ​

មាន​ធាតុ​បី​សំខាន់​ក្នុង​ការ​សម្គាល់​មុខ​ឲ្យ​បាន​ត្រឹមត្រូវ​ដូចជា​ Pose, illumination និង​ Expression ដែល​មាន​អក្សរ​កាត់​ PIE។

ការ​សម្គាល់​កាន់​តែ​មាន​ភាព​ត្រឹមត្រូវ​ពេល​មុខ​មិន​មាន​អ្វី​បាំង​។ ក្រោយ​មាន​ធាតុ​ PIE នោះ​ នៅ​មាន​ចំណុច​មួយ​ទៀត​ Facial occlusion (លក្ខណៈ​បាំង​លើ​មុខ​) មាន​ន័យ​ថា​មុខ​អ្នក​មិន​គួរ​បាំង​ពី​ធាតុ​នានា​ដូចជា​ វ៉ែនតា​ការពារ​ពន្លឺ​ព្រះអាទិត្យ​ ឬ​ ស្លាក​ស្នាម​។

យ៉ាង​ណា​មិញ​ Face ID មាន​ការ​វិវត្តន៍​ច្រើន​ ដោយ​ក្រុមហ៊ុន​ Apple អះអាង​ថា​ប្រព័ន្ធ​អាច​សម្គាល់​អ្នក​ សូម្បី​តែ​ពេល​រូបរាង​មុខ​អ្នក​ប្រែប្រួល​ ដូចជា​ពេល​ពាក់​វ៉ែនតា​ ពាក់​មួក​ កាត់សក់​ ឬ​ដុះ​ពុក​ចង្កា​ជា​ដើម​។ ការ​សម្គាល់​ដ៏​ល្អ​ប្រសើរ​នេះ​ជា​គុណសម្បត្តិ​របស់​បច្ចេកវិទ្យា​ Neural។

លោក​ Schiller បាន​និយាយ​ថា​ Neural Engine របស់​ iPhone X ជា​ Hardware បង្កើត​សម្រាប់​ Machine learning algorithms ហើយ​ក្រុមហ៊ុន​ Apple បាន​អភិវឌ្ឍន៍​នូវ​ Neural networks ជា​ច្រើន​ដើម្បី​បង្កើត​ជា​ Face ID។ ដូច្នេះ​ Face ID មាន​ការ​កំណែ​ទម្រង់​ជា​បន្តបន្ទាប់​ ដើម្បី​បង្កើន​ប្រសិទ្ធភាព​ក្នុង​ការ​សម្គាល់​មុខ​ ពេល​រូបរាង​មុខ​មាន​ភាព​ប្រែប្រួល​៕

ទស្សនាវីដេអូខាងក្រោម

ចុច​អាន​បន្ត៖

ប្រភព៖ Forbes   ប្រែសម្រួល៖ ប៊ុន ធឿន