អ្នកនយោបាយឥណ្ឌាប្រកាសជួលឃាតកសម្លាប់តារាសម្ដែង Deepika Paukone ក្នុងតម្លៃរាប់លានដុល្លារ

2017-11-22 02:55:05
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Surajpal Amu ជាសមាជិកគណបក្ស Bharatiya Janata របស់នាយករដ្ឋមន្ត្រីឥណ្ឌាសព្វថ្ងៃ បានប្រកាសឲ្យសម្លាប់តារាសម្ដែង Deepika Paukone និងអ្នកដឹកនាំរឿង Sanjay Leela Bhansali ដោយសារតែភាពយន្តថ្មីរបស់ពួកគេ បានបង្ហាញពីរឿងព្រេងរបស់ប្រវត្តិសាស្ត្រហិណ្ឌូមិនបានត្រឹមត្រូវ។

ការចាប់ផ្ដើមដាក់បញ្ចាំងភាពយន្តកំពូលមួយរបស់បូលីវូដថ្មីនេះត្រូវបានគេពន្យារពេលដោយសារ អ្នកនយោបាយម្នាក់របស់គណបក្សកាន់អំណាចនៅឥណ្ឌាប្រកាសថានឹងឲ្យទឹកប្រាក់ ១,៥លានដុល្លារដល់ជនណា ដែលអាចយកក្បាលអ្នកដឹកនាំនិងតារាសម្ដែងរឿង ដោយសារតែបញ្ហាទាក់ទងនឹងរឿងព្រេងហិណ្ឌូ។

រឿងដែលមានចំណងជើងថា "Padmavati” ដកស្រង់ចេញពីខ្សែជីវិតរបស់ម្ចាស់ក្សត្រីនៅសតវត្សទី១៤ឈ្មោះ Padmini ប៉ះពាល់ខ្លាំងដល់ក្រុមអភិរក្សនិយម ដែលកាន់កាប់ដោយនាយករដ្ឋមន្ត្រី Narendra Modi ជាខ្លាំង ដោយបានចាត់ទុកហិណ្ឌូជាផ្នែកសំខាន់មួយនៃគោលនយោបាយខ្លួន។

ជាធម្មតាបញ្ហាទាក់ទងនឹងហិណ្ឌូគឺកើតឡើងនៅពេលអ្នកកាន់សាសនាអិស្លាមបរិភោគសាច់គោ ដែលជាសត្វមួយស័ក្ដិសិទ្ធិសម្រាប់វប្បធម៌ហិណ្ឌូ ប៉ុន្តែបញ្ហាលើកនេះគឺពិតជាស្មុគស្មាញជាងនេះទៅទៀត។

បញ្ហានៅក្នុងរឿងនេះគឺ សាច់រឿងបានបង្ហាញពីម្ចាស់ក្សត្រីរូបនោះ មានទំនាក់ទំនងស្នេហាជាមួយអ្នកឈ្លានពានម៉ូស្លីមម្នាក់ ដែលធ្វើឲ្យពួកគេខឹងសម្បារជាខ្លាំង។ ក៏ប៉ុន្តែអ្នកដឹកនាំរឿង បានបញ្ជាក់ថាមិនមានឈុតឆាកស្នេហាមួយកើតឡើងលើតួអង្គទាំងពីររូបនេះឡើយ។

នេះមិនមែនជាលើកទី១ ទេដែលបញ្ហាស្រដៀងនេះកើតឡើង ហេតុដូច្នេះហើយទើបបណ្ដាអ្នកដឹកនាំនិងនិពន្ធរឿងបូលីវូដជាច្រើនមានបញ្ហាលំបាកច្រើនដើម្បី ជៀសវាងជម្លោះជាមួយពួកអភិរក្សនិយម៕

Trailer រឿង "Padmavati"៖